Jobi 22 - U TIENU MAAMA TILI 2013

Elifasi mayedikataama: Elifasi wani li nua ke Jobi tude

¹ Elifasi Temani yua den yedi:

² «Naani o nilo baa fidi ki yaa pia Mi fuoma U Tienu po? Yaa nilo n pia mi yanfuoma, Pia ma o yuli po bebe yo.

³ A teginma tie be yo U Paaciamu Daano po? Ba a pali yaa pieni, o baa ŋmani be lienni?

⁴ Naani ŋan ŋua U Tienu bonŋanla yeni po N teni ke o wangi a fala, Ki ja leni a ti buudi?

⁵ Moamoani a tuonbiadi yabi ki kandi, Ke a tagili mo ki pia bianu.

⁶ Ŋaa den guandi a kpiiba n den Ledi a kani ki bili yaala. A den fenli bi niba tiadi ki ŋaani ba mubima.

⁷ Ŋaa den puuni u ñuñuunu n gbadi yaaba mi ñima. Ŋaa den puuni mi koma n muubi yua mo mi jiema.

⁸ U paalu daano n den die mi diema, O japaadaano mo n den yeni u kaanu.

⁹ A yen yaadi a kpepuona ban gedi nikuomi, Ki cie a kpienbila mo yaa jigi.

¹⁰ Lani n teni ke ti dadi gaani ki lindi a, Ke i jeje mo cuo ŋa yenma.

¹¹ Li biigi a po lim ke ŋaa go nua puu, Ke mi ñima mo fii ki bua ki milini a.

¹² Naani U Tienu ki ye hali tanpolijoma ka? Diidi a ŋmabila n kpedi maama!

¹³ Amo yedi: ‹U Tienu bani be? Naani o baa fidi ki le li biigili nni?

¹⁴ Ti tawadi doagini o ke waa nua liba kuli, Wan goadi tanpoli fanma nni yaa yogunu.›

¹⁵ Naani amoko bua ki ŋoadi Bi nibiadiba n den ŋoadi yaa sanu yo?

¹⁶ Bi den cuo ba ke u yogunu daa pundi, Ke bi pendi nani mi ñima n tugi yaa bilinu yeni!

¹⁷ Bi den tua U Tienu: ‹Ña ti maama nni. U Paaciamu Daano baa fidi ki tieni ti be?›

¹⁸ Ama wani n nan den gbieni Bi diedi leni ŋalimani. Mii ye bi nibiadiba maama nni.

¹⁹ Bi niteginkaaba baa le la, Ki mangi bi pala. Yua n ki pia tagili baa ñuadi ba ki yedi:

²⁰ ‹Yaaba n fii ki sedi ti po bodi. U mu mo sia bi baali.›

²¹ Fini, guani ki mangi leni U Tienu, Lani n tie ŋan baa mi yanduanma, A yema mo n guani ki mangi a po.

²² Cengi o ñoabu nni tundi, Ki kuani o maama a pali nni.

²³ A yaa guani U Paaciamu Daano kani, A yema baa guani ki mangi, Lani, ŋan teni ti tuonbiadi N foagidi leni a diegu.

²⁴ A yaa luni a wula mi tama nni, Bi i kpeni siiga,

²⁵ U Paaciamu Daano n baa tua a wula, Ki go tua a po ŋanjilifa.

²⁶ Yeni, a baa teni U Paaciamu Daano N tua ŋan bua yua hali boncianla, A baa yaadi a nunga ki nuali wani U Tienu.

²⁷ Lani, a yaa jaandi ki mia o, o baa gaa a jaandi, Yeni, a baa fidi ki kuani ŋan niani o yaala.

²⁸ A yaa jagi yaala, li baa tieni nani ŋan bua maama, Mi yenma mo n yendi a sani nni kuli.

²⁹ U Tienu biandi bi japaadanba jaga fanma, Ama o todi li yumiinli danba.

³⁰ O baa gaa yaaba n ki pia tagili mi biadima nuu nni, Ki faabi a mo kelima a teginma po.»