Jobi 21 - U TIENU MAAMA TILI 2013

Jobi guani Tisofari: bi nibiadiba pia mi yemanma

¹ Jobi den guani ki yedi:

² «Cengi mani n maama, Lani n tie yi baagi n po.

³ Tuo mani n po min baa ki maadi, N yaa maadi ki gbeni, yi baa fidi ki ñuadi nni.

⁴ Naani nmo fu leni o nisaalo yo? N yama ka ke mii fidi ki baa juuni.

⁵ Pegidi ki noanli nni mani! Li baa paki yi, yin pii yi ñoana.

⁶ N yaa tiadi lipo ti jawaandi Yen cuo nni boncianla, N gbanu mo n jeli kpe kpe.

⁷ Be yaa po ke bi nibiadiba ye ki fo? Be yaa po ke bi yen podi, Bi fidu mo n go yaa baa ki pugidi?

⁸ Bani leni bi puoliŋuani kuli paalu taani ki pugidi, Bi yaabila mo fandi ki pugidi bi nunbu nni.

⁹ Bi diedi nni yanduanma bebe, Jawaandi wani ki ye leni ba, U Tienu gbiamu mo ki maa bi po.

¹⁰ Yogunu kuli bi naañua yaa doni, O yen maa, o kan mii mo.

¹¹ Bi teni ke bi bila tiini nani ti yanbidi yeni, Bi bijaba mo jeli ban bua maama.

¹² Bi yiini i yani ki pua mu lonmu leni ti gogiditi, Ki mangidi bi pala leni ki yeliga.

¹³ Bi ye leni mi yemanma bi miali dana nni kuli, Ki go pundi bi tinkpiba diema nni leni mi yanduanma.

¹⁴ Ama bi den tua U Tienu: ‹Ña ti maama nni, Tii bua ki bandi a sani mo!

¹⁵ U Paaciamu Daano tie ŋme yo Ke ti baa yaa tuuni o po? Ti yaa ŋua ki pugi o ti baa ŋmani be?›

¹⁶ Moamoani de, bi yemanma Naa ye bi yaa nuu nni ka, Mini wani ki ye nibiadiba maama nni.

¹⁷ Ama yogunuba bi nibiadiba Fidisanga yen gbindi, Mi yebiadima n jiidi bi po, U Tienu n tuu ba li panli o pabienli nni.

¹⁸ Bi yen maadi ki tua: ‹Ban tua nani ku faagu n tugi yaa muadi, Nani o pinpinjoa n tugi yaa fengu yeni.›

¹⁹ Naani U Tienu bili o pantuuli O nibiado bijaba po yo? U Tienu bi baa waani wani o nibiado yo, Fala wan bandi o.

²⁰ O yaa nuni n bi pundi Ki le wani o ba yaa fala. Wani n bi baa ño U Paaciamu Daano pabienli.

²¹ O diegu go pia o po be yaa fuome, O miali dana yaa gbeni?

²² Naani bi baa bangi U Tienu laa bonla, Wani yua n ja ba malekinba buudi?

²³ Niloba yen kpe leni mi yanduanma, Kaa bangi liba kuli po.

²⁴ O yen kpe ke o loga guo bonŋanla, Ke o kpaba lonlogo mo soangi.

²⁵ One mo n kpe leni li paboanli Ki naa gbadi o yema manu.

²⁶ Ama bikuli taani ki duani mi tama nni, A sidibila mo n ŋoadi ki pini ba.

²⁷ N bani yi yantiana bonŋanla, Leni yin kpaagi n po yaala kuli.

²⁸ Yi yaa yedi yaa yogunu: ‹O tugumoandaano diegu ye le yo? Bi nibiadiba n den ye yaa diegu nni yeni ye le yo?›

²⁹ Be n teni ke yii buali bi santagiba? Yii bua ki tuo ke ban laa yaala tie moamoani yo?

³⁰ Mi yebiadima daali o nibiado baa cia. U Tienu pabiencianli daali mo, liba kan tieni o.

³¹ Ŋme n baa tuo ki jaligi o o tagu po? Ŋme n baa guani o biadima panpaani?

³² Ba o yaa kpe ke bi piini o, Bi go baa yaa guu o takuli.

³³ Ku joaloangu tangbana ki kpiagi o po, Bi niba kuli ŋua o puoli ki cangi o, Yaa niba n cangi ki pia coali.

³⁴ Be yaa po yo ke yi baagidi nni, Yaa baagi n ki pia fuoma? Yi maguankaama kuli tie boandi bebe.»