Jobi 20 - U TIENU MAAMA TILI 2013

Tisofari mayedikaliema Jobi po

¹ Tisofari, Naama diema yua den yedi:

² «Diidi yaala yaa po ke n yantiana Tigini nni ke min maadi. Kelima n kan fidi ki juuni min gbadi yaala po.

³ N gbadi jaligiba ke yii mani n po. N yanfuoma mo baa waani nni Min baa guani yaala.

⁴ Naani ŋaa bani ke yaa yogu n tuu yaa yogu, Hali U Tienu n li kaani o nilo ki tinga nni,

⁵ Ke o nibiado gbanmanu kan gedi kaanu, Ke yua n ki daani U Tienu mo yaa pamanli kan waagi?

⁶ Ba o yaa kpedi ki pundi hali tanpoli, Ke o yuli mo ban siigi ti tawadi,

⁷ O baa bodi nani ti baadi yeni yaa yogunu kuli po. Yaaba mo n den nua o baa yedi: ‹O ye le?›

⁸ O baa bodi nani ti dangidi yeni ke bi kan go le o. O baa pendi nani ku ñiagu bonlekaala yeni.

⁹ Yaa nunbu n den diidi o, kan go le o. Wan den ye naani mo kan go le o.

¹⁰ A luoda baa gedi ki baa o bijaba ki fie o piama, Wani o ba mo baa guani wan den fie yaa ŋalimano.

¹¹ O den paani ki go pia u fidu, Ama o baa taani leni lani kuli Ki duani mi tama nni.

¹² Ba mi biadima yaa mani o ñoabu nni, Ke o kubini ma o lanbu tinga,

¹³ Ki kpibi ma ki kan sii ma, Ki kubi ma o nialu nni,

¹⁴ Mi baa n lebidi o tugu nni Ki tua lienni nani li waalabili loabidi yeni.

¹⁵ Wan den dini yaa ŋalimano, O baa guani ki sii o. U Tienu n baa dadi ki ñani o, O tugu nni.

¹⁶ O fuagi a waalaba loabidi, O duduuno mo n baa ñidi ki kpa o.

¹⁷ O kan go le ke ti siadi Leni mi naaŋankpama kuli Puubi o po nani i kpenciami yeni.

¹⁸ O baa guani wan baa yaala leni fala, Ki kan go le li fuoma mo. O kan gbadi o kpendu ñuadi manu,

¹⁹ Kelima o ñii ki midi a luoda ki ŋaa ba, Ki fie wan ki maa yaa diegu.

²⁰ Nani o nunponbiadili n den yabi maama po, O kan ñani liba kuli o ŋalimano nni.

²¹ Waa den di ki sengi liba kuli, Lani n teni ke o yemanma mo kan waagi.

²² O yemancianma siiga li paboanli baa nandi o. Mi yebiadima buoli kuli baa ŋmaa o.

²³ Yaa yogunu ke o gbiendi o tugu yeni, U Tienu baa soani o po o pabiencianli, Ki teni i piemi n jiidi o gbanu nni.

²⁴ O yaa sani ti kuboandi jatiadi kani, Ti kumoandi dabanli baa toa ki cuo o.

²⁵ O yaa dadi ki fobi u piemu o gbanu nni, Ki ñani yaa pengu n muu o puali, Lanyogunu mi kuuma jawaanciandi baa baa o.

²⁶ Li biigili wuo ki bili ki guu o, Niloba kuli n kan tigi yaa mu baa je o, Ki buoni yaala n baa sieni o diegu nni.

²⁷ Tanpoli baa doagidi o tagili, Ki tinga mo baa fii ki sedi o po.

²⁸ Ki tabolinkaaga baa bolini O diegu nni bonbaakaala kuli, Likuli baa pendi U Tienu pabienli daali.

²⁹ Lani n tie U Tienu n bili o nibiado po yaa biinu. Lani n go tie U Tienu n bili o po yaa panpaani.»