Jobi 2 - U TIENU MAAMA TILI 2013

Jobi falalielo

¹ Dayenli U Tienu malekinba go den cua o Diedo nintuali, ke Sutaani ku tuotabigu yudaano moko den cua ki sedi bi siiga.

² O Diedo den buali Sutaani: «A ñani le yo?» Sutaani den yedi o Diedo: «N da li goadi n goada ki gangi ki lindi ki tinga nne!»

³ O Diedo den yedi Sutaani: «A nan ko laa n naacemo Jobi? Waa pia olie kuli ki tinga nni. O tie papiendaano, ki go tiegi mo. O fangi U Tienu, o naa tiendi yaala n bia. Ba ke a tigini nni min bolini o, o baa ki se o papienli nni.»

⁴ Sutaani den guani ki yedi o Diedo: «O nilo kan daa o miali ki gbali! O nilo n pia yaala kuli, o baa teni la o miali po.

⁵ Tandi a nuu ki sii o kpaba leni o gbanandi, n bani cain ke o li baa teli ki sugi a a nunbu nne.»

⁶ O Diedo den yedi Sutaani: «Diidi o ye a nuu nni, ama ŋan da sii o miali wani.»

⁷ Lanwani, Sutaani den ñani o Diedo kani, ki cua ki luni Jobi po, yaa gbansoama n bia boncianla, ki cili o taajenfaadi ki ban do hali o yuli siiga.

⁸ Jobi den kaa ku tinbengu po mi fantanpienma nni, ki taa li tancancali ki kpiadi oba.

⁹ O pua den yedi o: «A baa ki se a papienli nni yo? Sugi U Tienu ki yuandi ki kpe.»

¹⁰ Ama Jobi den guani ki yedi o: «A maadi nani yaa pua n ki pia yama yene! Be yaa po yo ke ti baa yaa gaani U Tienu kani yaala n ŋani, Ki nan kan gaa yaala n bia wani?» Ba laa bonla kuli yaa niinni, Jobi naa den tieni ti tuonbiadi o maama nni.

Jobi danlitaadiba cua ki laa o

¹¹ Jobi den pia danlinbitaa: Elifasi, Temani diema yua, Bilidadi, Suwa diema yua leni Tisofari, Naama diema yua. Bi danlitaadiba yeni n den gbadi yaa yebiadima n ŋmaa o. Bi den taani ki juogi ki cua ki baa mua o po, ki go baagi o.

¹² Ban den ye foagima ki yaadi ki noanli o, baa den bandi o. Ban den nagine ke bi den bandi o. Bi den mua ki figindi hali boncianla. Bi den cuo bi liadiciama ki padi, ki wuliti bi yula po mi tama.

¹³ Bi den kali leni o tiipo danalele leni ñiadilele ke oba kuli ki den yaadi o ñoabu ki maadi leni o, kelima ban den nua o fala n yabi ki kandi maama po.