Jobi 19 - U TIENU MAAMA TILI 2013

Jobi guani Bilidadi: N bani ke n Faabika baa gaa nni

¹ Jobi den maadi ki yedi:

² «Yi baa yaa biidi n pali Ki pundi hali u laa yogunu yo? Yi baa yaa ñundi nni li mutuoli Ki pundi hali u laa yogunu?

³ Diidi mani taalima piiga nne ke yi sugidi nni. I fe ki pia yi leni yin paagidi N yama maama po?

⁴ Li yaa tie moamoani ke n tudi, I tagili yeni jagi n yaa yuli po yo.

⁵ Moamoani yi jigidi nni ki bua ki jigini yi yula, Ki nua ke n tagili n cuani n fe.

⁶ Ama yin nan bandi ke U Tienu n sedi n po, Ki luni ki lani nni o taali.

⁷ Diidi, n yaa mua ban gaa nni, Oba kuli naa cengi n po. N yaa miadi ban todi nni, Oba ki faami n po.

⁸ O luoni n sanu ke min da tagini, Ki teni ke n sanu biigi hali boncianla.

⁹ O teni ke n kpiagidi kuli bodi, Ki cibidi n badifogiliga mo.

¹⁰ O pagini n sani kuli ki caani nni mi kuuma po, Ki dadi ki ŋabi n dugidi nani bu tibu yeni.

¹¹ O pali beni n po boncianla, Ke o faligi nni nani o yibali yeni.

¹² O toagola kuli pua belibeli ki kpendi, Ki puubi ki ti dadi hali n kani. Bi tii bi naga ki lindi n diegu.

¹³ U Tienu teni ke n kpiiba sani ki ŋaa nni, Ke yaaba n bani nni mo loagidi nni.

¹⁴ N bankaaba sani ki ŋaa nni, N buakaaba sundi n po.

¹⁵ N diegu nni yaaba leni n puotuada Nua nni nani o caano yeni. N ji tua nilamo yo bi po.

¹⁶ N yaa yini n naacemo, o kan guani nni, Ba min pugi o maama kuli.

¹⁷ N nuulu ki mani ba n pua po, Ba n bimadimu mo sengi nni.

¹⁸ Ba a biñinda naa bua n kaanu, N yaa fii, se ban yaa ñuadi nni.

¹⁹ N nidugikaaba pala fa n po, Min den bua yaaba fii ki sedi n po.

²⁰ N kpaba sani ki tabini n gbanandi leni n gbangu. N ñina bebe n ji sieni.

²¹ Gbadi mani n ninñima, gbadi mani N ninñima, yinba n danlinba, Kelima U Tienu nuu n pua nni!

²² Be yaa po yo ke yi ŋua ki deli nni, Nani U Tienu n ŋua ki deli nni maama yeni? Naani yii coagi leni yin wangi nni yaa fala?

²³ Ŋain, min li bi sugini maama nne: Ban bi diani n maama ne tili nni!

²⁴ Ban diani ma leni ki celiga ku daagu po, Ki tieni ti noabindi, Ke man yaa ye yaa yogunu kuli ki da bodi.

²⁵ N bani ke n faabika fo, Ke wani n baa juodi ki fii ki tinga nni.

²⁶ N gbanandi yaa bodi yaa yogunu, Mini n ba n baa noanli Ki le U Tienu bonŋanla.

²⁷ Wane ke n nuni baa diidi bonŋanla, Laa tie nitoa ka ke n baa le. N pali coagi boncianla, Kelima n guu lanyogunu yo.

²⁸ Yi yaa yedi: ‹Be n teni ke ti ŋua ki deli o?› Lanyogunu yo ke yi baa le ke n pia i moamoani.

²⁹ Yaa jie mani ki jugisiega yi yula po, Kelima ki jugisiega yaa tundi koani boncianla. Lani n tie yin bandi ke ti buudi ye.»