Jobi 18 - U TIENU MAAMA TILI 2013

Bilidadi waani Jobi yaa diagu n ye o nibiado po

¹ Bilidadi Suwa diema yua den yedi:

² «Beyogune ke a baa ŋmini? Baa mi yama no yo, Tin nan yuandi ki maadi.

³ Be yaa po yo ke a nua ti nani ti yandi yeni? Be n teni ke a nua ti nani bi yanluodanba yeni?

⁴ Fini yua n coagini a yuli a pabienli nni, Naani li dagidi ki tinga n da go pia Niba kelima fini yaa po? Naani li dagidi fini yaa po, Ke a juana n ŋmiagi a kaanu?

⁵ O nibiado yenma baa gbindi. Fantama mo kan go ŋubidi o diegu nni.

⁶ O diegu nni yenma baa gbindi. O miali fidisanga baa gbindi.

⁷ Wan den cuoni leni yaa jama kuli baa gbeni, O yuceli jaga mo n baa guli o,

⁸ Kelima o baa baa i taali nni. O cuoni bu ganbu po yo.

⁹ Ku diagu cuo o taajentindili, U baabu mo soadi ki mubini o.

¹⁰ Yaa baabu n baa cuo o, wuo ki tinga nni, Ke ti cuadi mo ye o sanu nni.

¹¹ I jeje muubi o i kaani kuli, Ki ŋua ki deli o.

¹² Mi koma gbeni o gbanmanu, Ke mi yebiadima ŋua ki baali o,

¹³ Ki cabidi o gbanandi waamu waamu. Mi kuuma baa je o taana leni o buadi kuli.

¹⁴ Bi baa dadi ki ñani o o diegu nni, O yama n den dua naani, Ki fuli ki gedini o mi kuuma diema bado kani.

¹⁵ Li cidibili baa baa o diegu po, A baa fidi ki kua ki sedi ku niinni, Kelima kuu go tie o yaa yaagu.

¹⁶ O jiini baa cili ki kuodi, Ki yaa caa hali o benjoma.

¹⁷ Bi baa sundi o po mi diema nni, O yeli mo kan go yaa ye li coali tili nni.

¹⁸ Bi ñani o mi yenma nni, Ki pieni ki luni o li biigili nni, Ki deli ki ñani o li ŋandunli nni.

¹⁹ Waa ŋaa bila, bi yaabila o buolu nni, Oba kuli ki sieni o diegu nni.

²⁰ I jeje baa cuo yaaba n ye puoli leni nintuali, Nuganu leni nujienu o bodima po. Lan paki yaa nifiima n kpendi mo Leni yaa yebiadima n baa o.

²¹ Yaaba n ki tiegi yekaanu n yeni, Yua n ki bani U Tienu mo yaa deni yeni.»