Jobi 17 - U TIENU MAAMA TILI 2013

Jobi maguankaama: Mii go pia min daani yaala

¹ N fuoma dogi, n dana caa ki baa gbeni, Li takuli bebe n ji guu nni.

² A ñuañuada gaani ki lindi nni. Bi sugidi teni ke mii goa.

³ Kubi nni fini a ba yaa kani, Kelima fini yaa ka, Ŋme n baa tuo ki sedi n puoli?

⁴ A teni ke bi yantiana ki bani bonla gagidima. Ŋan da tuo ban koani ki paadi.

⁵ Bi yini bi danlinba mi jiema boagidima po, Ke mi koma nan baa je ba.

⁶ O den teni ke n tua li ñuali bonla bi niba po, Ki tua ban siini yua yaa nunga nni ti ñinsandi.

⁷ Li pabiidili teni ke n nuni ki go nua bonŋanla, N gbanandi kuli tie nani ku jinjingu yeni.

⁸ Li pakili cuo bi niteginkaaba lipo, O papiendaano mo fii ki sedi o nibiado po.

⁹ O niteginka wani n yaa li suagi liiga o tagu nni, Yua yaa nii n ki pia joagindi mo Yaa fidu n yaa pugidi!

¹⁰ Yinba n danlinba, yikuli n guani ki cua mani ne! Naani n baa le o yanfuodaano yi siiga?

¹¹ N dana gbeni, min den jagi Ke n baa tieni yaala kuli bodi, Ki taani leni n pali n bua yaala kuli.

¹² Bi tua ke ku ñiagu tie yensiinu, Ki tua ke mi yenma cua, Li biigili n ye yaa yogunu.

¹³ Naani min sugini yaala kuli ki tie Ke bi tinkpiba diema n tua n deni ka? N baa bili n duanu li biigili nne.

¹⁴ N kpaani ki yedi n takuli: ‹Fini n tie n baa!› Ki yedi mi bedima mo: ‹Fini n tie n naa Leni n naataanpuoga!›

¹⁵ Min daani yaala nan go ye le yo? Ŋme n baa fidi ki le min bi guu yaala?

¹⁶ Mi baa jiidi bi tinkpiba diema nni, Mini leni mani n yegi ki ban duani mi tama nni.»