Jobi 16 - U TIENU MAAMA TILI 2013

Jobi guani ki yedi Elifasi: N pia n siedo tanpoli po

¹ Jobi den yedi:

² «N gbadi mi naa maama buolu boncianla. Yikuli tie yaaba yaa baagi n tie fala.

³ Yi tua: ‹Naani ku naa mawolingu Kuli baa baa u bianu? Be n yen biendi a pali a yaa maadi?›

⁴ Nmoko bi baa fidi ki maadi yeni, Yi yaa bi ye n kaanu. N bi baa yaa maadi ki jaligidi yi, Ki fegi fegi n yuli yi po.

⁵ N bi baa maadi ki paagi yi pala, Ki baagi yi ki jiini yi yama.

⁶ N yaa maadi, n fala naa wadi, N yaa ŋmini mo, Fala baa foagidi leni nni lede?

⁷ Moala wani U Tienu gbeni n fidu, Ki teni ke n diegu kuli bodi.

⁸ A teni ke n gbanandi kuli pali pali, Ke n dondongu mo fii ki sedi ki jaligidi nni.

⁹ O pabienli nni o fii ki baa nni Ki toadi toadi nni, Ki cegini n po o ñina. N yibali pegidi o nunjoma kuli ki teli nni.

¹⁰ Bi yaadi bi ñoana ki teli nni, Ban bua ki fiagi nni yeni, bi pabini nni. Bikuli taani ki lindi nni Ki bua ki koani leni nni.

¹¹ U Tienu teni ke a bonwaala yuali nni, Ki pieni ki luni nni bi nibiadiba nuu nni.

¹² N den li ye leni n yanduanma Ke a yagi n yama. A cuo n tulu ki luni nni, Ki teni ke n tua ŋan baa yaa toa yua.

¹³ O piemi gangi ki lindi nni i kaani kuli. O piemi lugidi n ciaga ke laa pia o po ninñima. O pidi n yama ki wuli ma tiipo.

¹⁴ O kubi nni ki pua ki poagiliti, Ki puubi ki ti dadi n kani, Nani o jakoando yeni.

¹⁵ N ŋali li paboanli liadili n nayiadi po, Ki caani n yutunli mi tama nni.

¹⁶ N buudi hali ke n nuni moandi, Ke n nuni kuli fii ki gbibi.

¹⁷ Ama n nii wani ki tieni biadimiba kuli, Joagindiba mo kuli ki ye n jaandi nni.

¹⁸ Ŋain ki tinga, da piini n soama, Ki teni ke n nialu kan baa ki kpaani.

¹⁹ Diidi moala n siedo ye tanpoli, Yua n baa maadi ki gaa nni ye, Hali naani n kpedi.

²⁰ N danlinba ñuadi nni. Ama mini wani li miadi U Tienu, Leni ti ninsiide.

²¹ N sugini ki baa yua n baa tua N candanbaalo U Tienu kani, Nani o nisaalo leni o danli siiga yeni.

²² N miali bina coali caa ki baa gbeni. N baa tagini yaa sanu n ki pia guanma.