Jobi 15 - U TIENU MAAMA TILI 2013

Elifasi yedi Jobi: O nibiado kan cia

¹ Elifasi, Temani yua den maadi ki yedi:

² «Naani yanfuodaano baa guani Yaa maama n tie ne? Naani o baa pua mi fanma?

³ Naani o baa maadi ki gaa o yuli Leni yaa maama n ki pia yuli, Bi leni yaa maama n ki pia fuoma?

⁴ Fini wani, ŋaa go fangi U Tienu, Ki teni ke li kpaagili mo gbeni U Tienu nintuali.

⁵ A tagili n gobidi a ñoacuuna, Ki teni ke a taa bi tuofaadanba mataana.

⁶ A ñoabu n cuo ŋa. Laa tie mini ka, A maama n cuo ŋa.

⁷ Naani bi nisaaliba siiga fini n kpa mali? Naani bi kpa mali a ki ŋaa a joabila?

⁸ Naani a den kpa kali U Tienu Leni o juoginkaaba taanli nni, Ki baa mi yanfuoma fini a bebe po?

⁹ A bani be ke tii bani? A gbadi be yo ke tinba wani ki gbadi?

¹⁰ Ti siiga nni pia a nikpela, Yaaba n kpeli ba a baamado moko.

¹¹ Naani a noanli ki fali U Tienu baagi, Leni tin maadi leni a yaa madingima yo?

¹² Be n fiini a pali, Ki teni ke a nuni mo moandi?

¹³ A bieni a pali leni U Tienu yo? A yaadi a ñoabu ki maadi leni wani yo?

¹⁴ O nilo tie ŋme ki baa yedi ke waa pia tagili? Pua n mali yua baa tieni lede ki yaa tiegi?

¹⁵ U Tienu ki dugi ba o malekinba po. Ti tawadi moko naa tiegi cain o nintuali,

¹⁶ O nisaalo yua gundi ki tie janbi daano mo te? Wani yua n tiendi ti tuonbiadi Nani wan ñu mi ñima maama yeni.

¹⁷ Cengi nni n baa doagidi a po, N baa togidi a min laa yaala.

¹⁸ Bi yanfuodanba n doagidi yaala, Bi baanba n den waani ba yaala, Kaa wuoni la ba waamu.

¹⁹ Bi den puni bani bebe ki tinga, Caanoba kuli daa den kua bi siiga.

²⁰ O nibiado wani baa yaa ye Leni fala yo o miali dana nni kuli. O tugumoandaano mo, Ban bili o po yaa bina kuli nni.

²¹ Yaa fuugu n pia ti jawaandi ye o tuba nni, Mi yanduanma siige, Ke yua n bolindi baa cua ki baa o.

²² Waa tama ke o baa fidi ki sani Ki cia li biigili, Ki jugisiega mo bili ki guu o.

²³ O puagi ki lingi li bonjekaala, O nan baa kua le? O bani ke mi kuuma daali bili ki guu o.

²⁴ Li pabiidili leni i yanbani jiendi o, Ki baa o nani yaa bado n bobi O jatiadi bu toabu po yeni.

²⁵ Lani n tie yaala n baa baa yaa nisaalo N fii ki sedi U Tienu U Paaciamu Daano po.

²⁶ O den paagi o pali ki tuogi leni U Tienu, Kelima o den dugi wan pia yaa gbankoanditi po.

²⁷ O nunga kuli den kpiagi leni mi kpama, Ke o loga mo kuli den gbie bonŋanla.

²⁸ Ama o baa yaa ye ban bolini yaa dogi nne, Yaa diedi n ki pia niba nni, Yaa diedi n caa ki baa baa ki wudi nni.

²⁹ O kan go baa piama ki pugini, O bonbaakaala mo kan go yaa ye. O yulolima mo baa gbeni ki tinga nni.

³⁰ O kan fidi ki faabi leni mi kuuma. U mu baa teni o benkpela n kuodi. U Tienu mo baa piebi ki lu o foagima.

³¹ Wan da dugi janbi po, Laa pia fuomiba kuli, Kelima i janbi n baa tua o panpaani.

³² Laa bonla baa tieni Ke o miali dana daa gbeni. O benkpeli mo kan go faadi.

³³ O baa suodi nani duven tiidi bonluonkaala N baa suodi ki daa beni maama, Nani olivie tiidi puuma n suodi maama, Omo baa suodi yene.

³⁴ Yua n ki daani U Tienu diegu kan diadi. U mu mo baa juu i janbi daano diegu.

³⁵ Yua n jagi yaala n bia baa maa fala, Janbi bebe n baa ña o niinni.»