Jobi 14 - U TIENU MAAMA TILI 2013

O nisaalo yema kuli fala bebe

¹ Pua n mali yua kuli miali koabi, Ki go gbie leni ti yanyagidi.

² O yigidi nani mi puuma yeni ki suodi. O yen tiine nani u soangu yeni ki kan sedi.

³ Ama a ŋubidi a nunbu ki nua o, Ki yi nmo ti buudi.

⁴ Ŋme n baa fidi ki teni yaala n ŋani N ña yaala n joagini nni? Niloba kuli.

⁵ Fini n bili o miali dana, Leni o ŋmaali coali kuli, O kan fidi ki pendi laa dana bianu.

⁶ Lanwani, ŋan pegidi a nunga Ki noanli poto wan baa ki fuo. Lani n tie omo n baa ki jiini O tuonli leni mi yanduanma.

⁷ Bu tibu pia mi suginma, Bi yaa pedi bu, bu baa guani ki bundi. Bu kan luo yaa benkpela n guani ki bundi.

⁸ Baa bu jiini yaa waagi ki tinga nni, Ke bu ñiali mo kpe,

⁹ Mi ñima yaa ti cua, bu baa guani ki faadi, Ki go bundi nani bu tipanbu yeni.

¹⁰ Ama o jakoando yaa kpe, O fidu gbeni yeni. O nisaalo yaa kpe o yen kua le?

¹¹ Mi ñincianma ñima yaa sani, I kpenciami yen ñuudi ki kuodi.

¹² Yua n kpe kan go fii abada, Hali tanpoli n baa n bodi yaa yogunu. O kan go fundi abada.

¹³ A yaa bua ki wuoni nni bi tinkpiba diema nni, Ki kubi nni lienni ŋasiili nni, Hali a pali n kuugi, Ki bili yaa yogunu ke a baa tiadi n po,

¹⁴ Naani yaa nisaalo n kpe, Go baa faadi ki guani ki fii? N yebiadima kuli nni n baa yaa guu, Hali ŋan baa cua ki faabi nni yaa yogunu.

¹⁵ Lanyogunu, a baa yini nni, nmo baa tuo, A go baa lingi mini a nii tuonli.

¹⁶ Ama moala po, a coadi n taayaagidi kuli, Ki kan go yaa faami n tagili po.

¹⁷ A baa loli n tagili kuli ku kpalipiagu nni, Ki go wuoni n tuonbiadi mo.

¹⁸ Ama nani li juali n baa mudi maama Ke ku tangu mo fii ki ŋmiagi ku kaanu,

¹⁹ Nani mi ñima n cadi a tana, Ke mi ñinpuubikaama mo koadi ki tinga tama Ki ban caa maama yeni, A teni ke o nisaalo n daani yaala moko bodi yene.

²⁰ Yogunu kuli a paagidi o yema, Ki teni ke o pendi. A teni ke mi kuuma lebidi o nunga ke a deli o.

²¹ O bila n baa ti jigidi, waa bani. Ban fiagi, waa didi bani.

²² O gbanandi laadi fala wani bebe yaa po yo. Wani bebe yaa po yo ke o naano ye leni li paboanli.»