Jobi 13 - U TIENU MAAMA TILI 2013

Jobi bua ki boe leni U Tienu

¹ Yeni de! N nunbu laa laa bonla kuli. N tubili mo gbadi la, ki gaa la.

² Yin bani yaala nmoko bani la, Yii bani ki cie nni ba.

³ Ama mini wani, n bua ki maadi Leni U Paaciamu Daano yo. N bua ki maadi ki gaa n yuli o kane.

⁴ Yinba wani se faama leni miyama. Yi tie yaa lotola n ki pia fuoma.

⁵ Be n teni ke yii bi ŋmini? Mi yanfuoma sanu bigi n yeni.

⁶ Cengi mani min baa maadi yaala Ki gaa n yuli! Cengi mani bonŋanla, N ñoacuuna n fu yaala yaa po!

⁷ Naani yi tama ke yi baa maadi Yaala n ki tiegi yo ki todi U Tienu? Naani yi tama ke yi baa pua Mi faama yo ki todi o?

⁸ Naani yi tama ke yi baa maadi Yene ki taani o po? Naani yi bua ki fu ki gaa U Tienu yo?

⁹ Naani o yaa diidi yi yantugu nni, O baa le yaala n ŋani? Bi, yi baa fidi ki boandi o Nani ban boandi o nilo maama yeni?

¹⁰ Moamoani po o baa jaligi yi, Li yaa tie ke yi taani o po ŋasiili nni.

¹¹ Naani U Tienu bali ki jiendi yi? Naani o fangili jeje kan cuo yi?

¹² Yi kpanjama kuli ki pia fuoma Nani mi fantanpienma yeni. Yi mabanma mo tie nani ti tandi bilini yeni.

¹³ Suo mani ki cedi nni! Mini n ba n baa maadi! Yaala n baa tieni nni n tieni!

¹⁴ Ba n yaa baa kpe kelima lipo, n tuo!

¹⁵ Ba o yaa baa kpa nni, n baa yaa dugi o po. Ama o nintuali n baa waani o Ke mii pia tagili.

¹⁶ Ba lani moko fidi ki todi nni, Kelima tuonbiadi daano Kan fidi ki sedi o nintuali.

¹⁷ Cengi mani n maama bonŋanla, Ki diadi yi tuba ki cengi Min baa doagidi yi po yaa maama.

¹⁸ Diidi n cuani n maama ti buudi kani, Kelima n bani ke mini n pia i moamoani.

¹⁹ Ŋme n baa fidi ki maadi ki cuo nni? Lanwani, n baa tuo n tagili ki yaa ŋmini ki kpe.

²⁰ Tieni n po bonla bonlilie, Lani, n kan buli a n nunga. Lani n tie line:

²¹ Yindi n po a nuu yuu n coagini nni, Ki da go jiendi nni mo.

²² Li yaa puoli ŋan maadi, n baa guani a. Bi, n baa maadi ŋan guani nni.

²³ N tuonbiadi leni n tagili coali da lede? Teni min bandi n biili Leni n tuonbiadi n tie yaala.

²⁴ Be n teni ke a nan buli nni a nunga, Ki nua nni nani a yibali yeni?

²⁵ Naani a baa yaa ŋua ki deli u faalu N tugi yaa faagu? Naani a baa yaa ŋua ki deli ti muakuondi?

²⁶ A diani n po yaa maama n to, Ki teni ke n tugi n panma nni tagili.

²⁷ A kpaa n taana ti kpaadi, Ki faami min tiendi yaala kuli, Ki ŋua ki coadi ba n taayaagidi.

²⁸ N gbanandi bedi ki cabidi ki baali Nani o dudulo n kua yaa daagu yeni, Bi nani ti lulugidi n kua yaa tiayiekaagu yeni.