Jobi 12 - U TIENU MAAMA TILI 2013

Jobi n guani Tisofari yaala

¹ Jobi den guani o ki yedi:

² «Moamoani po, li naani nni Ke yinba bebe n tie bi nisaaliba, Ke yi yàá ti ye yaa daali mo, Mi yanfuoma baa gbeni.

³ Mini moko li pia mi yama Nani yinba yene, yii cie nni ba. Yin yedi yaala yuakuli bani la.

⁴ N tua li ñuali bonla n danlinba po. Mini yua n moandi ki baa maadi Leni U Tienu yua n den gaani n yedima. O niteginka, wani o papiendaano N ji tua li ñuali bonla.

⁵ Mi yemanma danba tua: ‹Ki faliga tie o ninñinnilo po yo.› Bi maadi laa maama yaaba n jadibi po yo.

⁶ Bi sanjiaba, yaaba n cidi U Tienu Leni yaaba n tama ke bi kubi U Tienu bi nuu nni, Ye leni mi yanduanma bi diedi nni.

⁷ Ama buali ti yandi, ti baa bangi a, Tanpoli nuani mo baa doagidi a po la.

⁸ Boe leni ki tinga, ki baa waani a. Mi ñincianma nni jami mo baa togidi a la.

⁹ Bi siiga ŋme n kaa bani, Ke o Diedo yaa nuu n tieni laa bonla kuli?

¹⁰ Wani n muubi o nuu nni mialifo kuli naano Leni nisaalimiali kuli fuoma.

¹¹ Nani ban tua maama: ‹Li tubili gba ki gagidi mi maama, Nani bu lanbu n lengi ki gagidi Mi jiema maama yeni.

¹² Mi yanfuoma ye a nikpela kane, Li miafoagili nni mo n pia mi yanfuoma.›

¹³ Mi yanfuoma leni u paalu ye U Tienu kani, I tundi leni mi yanfuoma ye o yaa kane.

¹⁴ O yaa biidi yaala, Oba kan fidi ki ŋanbi la. O yaa luoni nilo mo, Oba kan fidi ki luodi o.

¹⁵ O yaa sieni ki taaga, Li bonla kuli baa kuodi. O yaa luodi ki ŋaa ka mo, Kan biidi ki tinga.

¹⁶ U paalu leni mi banma ye o nuu nni. Yua n yaadi leni yua n teni Ke o yaadi kuli ye o yaa nuu nne.

¹⁷ O caani a bandimoana ti yonbidi, Ki pua ki lengi bi bujiaba mo yaa yama.

¹⁸ O faabidi bi niba leni bi badibiadiba tugumoangu, Ki luo bi badiba yeni leni i baabi.

¹⁹ O caani bi kopadicianba ti yonbidi, Ki tudi ki lu yaa badiba n se bonŋanla.

²⁰ O yie ke yaaba n bani mi maama Bonŋanla kan maadi, Ki teni ke a nikpela mo yaa yama bodi.

²¹ O teni ke bi badijaba laa i fe, Ki lodi bi gbanmandanba gbanñagiditi.

²² O doagidi yaala n bi duagi li biigili nni. O taa mi kuuma jinjingu, Ki cuani mi yenma nni.

²³ O teni ke i nibuoli yen pili, Wan go guani ki bolini yi. O yen teni ban yabidi wan yuandi, Ki gedini ba ti yonbidi.

²⁴ O ñani mi diema yudanba yanfuoma, Ki teni ke bi puagi mi fanpienma nni, Sanu n ki ye naani.

²⁵ O teni ke bi tulibi li biigili nni, Yenma n ki ye naani. O teni ke bi puagi nani yaa niba N ñuni ki gaadi yeni.