Jobi 11 - U TIENU MAAMA TILI 2013

Tisofari n cili ki yedi Jobi yaala

¹ Tisofari yua n den tie Naama diema yua den yedi:

² «Mi naa macianma kuli ki baa maguankaama? Naani mi mabanma bebe baa fidi Ki pa o nilo i moamoani?

³ Naani a macianma baa fidi Ki teni bi niba n suo? Naani a mañuali baa teni Ke oba kuli kan jaligi a?

⁴ A tuo ki yedi: ‹N banma ki pia tagili, Mii pia tagili o nintuali mo.›

⁵ Hei! U Tienu yaa bi bua ki maadi te? O yaa bi yaadi o ñoabu a nintuali,

⁶ Ki waani a o yanfuoma ŋasiili, Yaama n cie ti jaga kuli, A baa bandi ke U Tienu yen sundi A tagili i tiami po.

⁷ Naani a fidi ki bandi U Tienu ŋasiili ki gbeni? Bi ki bandi U Paaciamu Daano paalu Leni o yabinu fuuli?

⁸ O paalu yabi ki kpedi ki pundi ti tawadi, A baa tieni be? U ñua ki cie bi tinkpiba diema, A baa bandi be lienni?

⁹ U foaginu cie ki tinga, U pianu mo cie mi ñincianma.

¹⁰ U Tienu yaa cuo o tuonando, Ki yini o ti buudi kaanu, Ŋme n baa fidi ki yie o po?

¹¹ O bani yaa niba pua mi faama. O nua yaala n ki tiegi, Ke laa pundi wan kpaagi lipo.

¹² Ama yaa nisaalo n ye fala nni Wani ki go pia yama. Nisaalo kuli yen maa ki tie Nani o fuaŋunbo yene.

¹³ Fini wani, ŋan pegidi a pali Ki teli U Tienu po. A yaa yugidi a nii U Tienu po, Ki jaandi ki miadi o,

¹⁴ A yaa foagidi leni yaala n ki tiegi, Kaa teni ke tuongunda kua a diegu nni,

¹⁵ A baa yaa cuoni ke a yuli yaa. A baa yaa se bonŋanla kaa bangi liba kuli po.

¹⁶ A baa sundi a fala po, A baa tiadi lipo, ama nani Yaa ñima n puubi ki pendi yeni.

¹⁷ A yema baa yaa ŋani ki yieni Ki cie u yensiicocolu. Li biigili baa yaa yieni Nani u tiŋaafaanu yeni.

¹⁸ A baa yaa kaa leni ti dugidi, Kelima a pia ŋan daani yaala. Ba i fe yaa gaani ki lindi a, A baa yaa dua ki goa leni mi yanduanma.

¹⁹ A baa duani ki tandi aba, Niloba kan biidi a guama. Bi niba boncianla baa yaa miadi a todima.

²⁰ Bi nibiadiba wani yaa nuni baa le yaala n bia. Wuonkaanu ki ye bi po. Ban guu yaala kuli tie kuuma bebe!»