Jobi 10 - U TIENU MAAMA TILI 2013

Jobi n go den guani Bilidadi yaala

¹ N yama ñani li miali nni. N kaa ŋmini, N baa maadi n yema ne po. N paboancianli nni n baa maadi.

² N yedi U Tienu: ‹Da jia n buudi ki cuo nni.› Teni min bandi yaala yaa po Ke a koani leni nni!

³ Naani ŋan wangi nni fala yeni li mani a? Naani ŋan yie a nuu n tagi yaala, Ki teni ke a yenma yendi, Bi nibiadiba taanli po yeni li ŋani?

⁴ A pia o nisaalo nuni yo, kaa nua? Naani a nua nani o nisaalo yene?

⁵ Naani a miali dana tie nani O nisaalo yaa dana yene? Naani a miali bina tie nani o nilo yene,

⁶ Ke a ŋua ki lingi n tagili Ki yagini a yama n tuonbiadi po?

⁷ A bani cain ke mii pia biili, Ke oba mo kan fidi ki faabi nni a nuu nni.

⁸ A yaa nii n tagi nni, Ki puni nni li miali, Ama moala a bua ki bolini nni cain!

⁹ Tiadi ke a tagi nni leni ku yoagu yo. Naani a bua ki guani nni mi tama nne?

¹⁰ Naani ŋaa den li kuodi nni Nani mi naaŋanma yeni ka? Naani ŋaa den li teni ke n guani Nani mi naaŋankpama yeni ka?

¹¹ A puni nni u gbanu leni ti nandi, Ki puni nni a kpaba leni i jiini.

¹² A puni nni li miali leni ŋanbili, A kubiŋanli teni ke n baa ki fo.

¹³ Ama diidi ki le ŋan den bili yaala a pali nni. N bani ke lani n den ye a pali nni.

¹⁴ N yaa tieni ti tuonbiadi a nua nni. Ŋan da yedi ke mii pia tagili.

¹⁵ N yaa tie tuonando, li yuboanli n baa nni. Ba n yaa tiegi mo, n kan fidi ki yaadi n yuli, Kelima n laa mi falima leni mi yebiadima.

¹⁶ N yaa tuo ki yaadi n yuli, Se ŋan ŋoadi ki deli ki cuo nni, Nani o yangbanlo yeni. A baa mudi nni yomi yomi leni a paalu.

¹⁷ A teni ke n yema tie fala ki tuu fala. A pugidi a pabienli n po, Ki teni ke a toagola fiidi ki sedi n po, Ki mua mi jama.

¹⁸ Be n teni ke a ñani nni n naa tugu nni? N bi baa kpe ke nunbu kuli ki laa nni.

¹⁹ N bi baa yaa tie nani mii den kpa ye yeni. N den baa ña n naa tugu nni, Ban tugi ki yaa caa li kuli po.

²⁰ N miali yema dana ki fuu. Cedi nni min mangi n pali Leni yaa yoginjenga n sieni n po,

²¹ Hali ke n daa gedi ki kan go guani, Li biigili leni mi kuuma diema nni,

²² Li biigicianli leni li paboanli diema nni, Mi kuuma leni ti yanyagidi n ye naankani, Ke mi yenma tie nani li biigili yeni!»