Jobi 1 - U TIENU MAAMA TILI 2013

Jobi fala 1—2 Jobi falakpialo

¹ O joa den ye Utisi diema nni, ke bi yi o Jobi. Laa joa den tie papiendaano, ki go tiegi mo. O den fangi U Tienu, kaa tiendi yaala n bia.

² O den mali bonjalalele leni bonpolataa.

³ O den pia yanbidi tudalele (7 000), yuoyuodi tudataa (3 000), naakpakpaadi tudili (1 000), ŋunñoe kobimuu. O tuonsoanba den yabi hali boncianla. Lani n den teni ke Palesitini diema puoli niba kuli siiga, wani n den cie.

⁴ O bijaba den caa biyaba deni ki lebidi, ki tiendi u badu, ki yen soani ban yini bi naataanpotaada ban cua ki je ki go ño leni ba.

⁵ U badu dana yaa den gbeni, Jobi yen soani ban yini o bila wan gagidi ki ŋanbi ba. O yen yagidi ki fii ki padi bikuli yendo yendo po li padijuukaali, kelima Jobi yen yedi o pali nni: «Daalinba n bijaba tieni ti tuonbiadi, ki tudi U Tienu po bi pala nni.» Jobi den li tiendi yene yogunu kuli.

⁶ Dayenli, U Tienu malekinba den cua o Diedo nintuali, Sutaani ku tuotabigu yudaano moko den cua ki sedi bi siiga.

⁷ O Diedo den buali Sutaani: «A ñani le yo?» Sutaani den guani ki yedi o Diedo: «N da li goadi n goada yo, ki gangi ki lindi ki tinga nni.»

⁸ O Diedo den yedi Sutaani: «A nan ko laa n naacemo Jobi? Waa pia kuli olie ki tinga nni. O tie papiendaano, ki go tiegi mo. O fangi U Tienu, waa tiendi kuli yaala n bia mo.»

⁹ Sutaani den guani ki yedi o Diedo: «Naani fanma fanma po yo, ke Jobi fangi fini o Diedo?

¹⁰ Naani ŋaa kubi o, wani, o diegu leni wan die yaala kuli ka? A seligi o nii tuonli, o yankuli mo wuli ki ladi, ki gbie mi diema nni.

¹¹ Ama tandi a nuu ki fie wan pia yaala kuli, n bani cain ke o li baa teli ki sugi a a nunbu nne.»

¹² O Diedo den yedi Sutaani: «Diidi wan die yaala kuli ye a nuu nni. Ama ŋan da sii wani o ba!» Lanwani, Sutaani den ñani o Diedo kani.

¹³ Dayenli Jobi bijaba leni o bisiaba den di, ki go ñu duven bikuli kuli kpelo ki bonjaga deni.

¹⁴ O tondo den cua Jobi kani ki yedi o: «I ne bi ko bu kpaabu ke i ŋunñoe baali ba ki ŋmani ti muadi.

¹⁵ Ama Sabe diema yaaba cua ki baa ba, ki taa ti yandi, ki kpa bi naacenba leni mu jugisiemu. Mini nbebe n sani ki cia ki cua ki baa pa ŋa laabaali.»

¹⁶ Hali ke o daa den maadi ki gbeni, nitoa den cua ki yedi: «U Tienu mu ñani tanpoli ki baa ki buoni ti yanbidi leni bi naacenba, ki bolini ba. Mini bebe n sani ki cia, ki cua ki baa pa ŋa laabaali.»

¹⁷ Hali ke omo daa den maadi ki gbeni, nitoa den cua ki yedi: «Kalide diema yaaba cagataa bi cua ki baa ti yuoyuodi po, ki taa ti ki ban cuoni, ki kpa bi naacenba leni ki jugisiega. Mini nbebe n sani ki cia ki cua ki baa pa ŋa laabaali.»

¹⁸ Hali ke omo daa den maadi ki gbeni, nitoa den cua ki yedi: «A bijaba leni a bisiaba bi di ki go ñu duven, bikuli kpelo ki bonjaga diegu nni,

¹⁹ ke ku tafaaciangu ñani mi fanpienma kalu po, ki pua ki guli li dieli goannaada kuli. Li dieli ŋmadi ki baa bi nipanba yeni po, ke bi kpe. Mini nbebe n sani ki cia ki cua ki baa pa ŋa laabaali.»

²⁰ Lani, Jobi den fii ki sedi ki padi o liadicianli, ki kuo o yuli. Li yaa puoli, o den labini ki pugi U Tienu,

²¹ ki yedi: «N ñani n naa tugu nni mubime. N go baa guani min ñani naani mubime. O Diedo n bi puni nni, O Diedo n go gaa. O Diedo yeli n baa ti pagidi.»

²² Laa bonla kuli nni, Jobi naa den tieni tuonbiadi, waa den maadi U Tienu po mabiadimiba kuli.