Jan n diani U Tienu Laabaaliŋamo maama 9 - U TIENU MAAMA TILI 2013

Jesu noadi yaa joa n mali ki tie juamo

¹ Jesu n den cuoni, o den laa yaa joa n mali ki tie juamo.

² O ŋoadikaaba den buali o: «Canbaa, ŋme n den tieni ti tuonbiadi ke o naa nilo mali ki tie juamo? Wani o ba, bi o danbe?»

³ Jesu den guani ki yedi ba: «Laa tie ke wani o ba bi o danba n tieni ti tuonbiadi, ama li tie ke U Tienu tuonli n doagidi o niinne.

⁴ Hali ke u yienu da ye, li tie tiladi tin yaa tuuni yua n den soani nni yaa tuona. Ku ñiagu baa bii, ke oba kuli kan go fidi ki soani tuonli.

⁵ Hali ke n da ye ŋanduna nni, n tie ŋanduna yenma.»

⁶ Wan den maadi yeni, o den sii ti ñinsandi tiipo, ki buuni ti tandi, ki taa ki sogi o juamo yeni nuni,

⁷ ki yedi o: «Ŋan gedi Silowe ñinbuugu po, ki ban fa.» Silowe bua ki yedi, ban soani yua. Lani, o den gedi ki ban fa, ki lebidi ki guani ki ji nua.

⁸ O yieninlieba leni yaaba n den kpa laadi o ke o tie miado den buali biyaba ki tua: «One ka tie yua n den kaa ki miadi yeni?»

⁹ Bine den tua: «Wani de,» bine mo: «Aa-a, o nannanle!» Wani o ba den yedi: «Li tie mini lige.»

¹⁰ Lan, bi den buali o: «A gaa lede ki noadi?»

¹¹ O den guani ki yedi ba: «Ban yi yaa nilo Jesu yeni n buuni ti tandi ki sogi n nuni ki yedi nni: ‹Gedi Silowe po ki ban fa.› N gedi ki ban fa, ki ji nua.»

¹² Bi den yedi o: «Laa joa ye le?» O den guani ki yedi: «Mii bani.»

¹³ Bi den gedini yua n den kpa tie juamo yeni Farisieninba kani.

¹⁴ Li den sua ke Jesu n buuni ti tandi ki noadi o yaa daali yeni tie U Tienu fuodima daali.

¹⁵ Lani yaa po, Farisieninba moko den buali o lan gaa maama ke o ji nua. O den yedi ba: «O sogi n nuni ti tandi ke n fa, ki ji nua.»

¹⁶ Farisieninba yeni siiga nni bi tianba den tua: «O naa joa ki tie U Tienu n soani yua, kelima waa kubi mi fuodima daali kuali.» Bi tianba mo den tua: «Yaa nilo n tie ti tuonbiadi daano baa gaa lede ki tieni yaa bancianma n tie ne buolu?»

¹⁷ Lani yaa po, mi paadima den tieni bi siiga. Bi go den yedi o juamo: «Amo yedi o po be, wan teni ke a ji nua yeni?» O den yedi: «O tie saawalipualo.»

¹⁸ Jufinba ki den daani ke o joa yeni den tie juamo, ki go den noadi, kali ban yini o danba.

¹⁹ Bi den buali ba: «Naani one n tie yi bijua, yin tua ke yua n den mali ki tie juamo yeni? Li gaa lede ke o ji nua?»

²⁰ O danba den yedi: «Ti bani ke o tie ti bijua, ki go bani ke o den mali ki tie juamo.

²¹ Ama tii bani lan gaa maama ke o ji nua. Tii bani yua n teni ke o ji nua mo. Buali mani wani o ba, o fandi, o baa fidi ki maadi o yuli po.»

²² O danba den yedi yeni, kelima bi jie Jufinba. Jufinba den kpa juogi ki bili ke o nilo yaa tuo ke Jesu tie U Tienu n Gandi Yua, bi baa deli ki ñani o li bali maama bangima dieli nni.

²³ Lani n teni ke o danba den yedi: «O fandi, buali mani wani o ba!»

²⁴ Farisieninba go den yini yua n den kpa joa yeni miliema, ki yedi o: «Kpiagi U Tienu li po. Tinba wani bani ke laa nilo tie tuonbiadi daano yo.»

²⁵ O den guani ki yedi: «Mii bani o yaa tie tuonbiadi daano. Ama n bani bonyenla, lani n tie ke n den joa, ke moala n nua.»

²⁶ Bi den guani ki buali o: «O den tieni a be? O tieni lede ki teni ke a ji nua?»

²⁷ O den guani ki yedi ba: «N bi waani yi, ama yii cengi. Be yaa po ke yi go bua ki gbadi ki pugini? Naani yimo bua ki tua o ŋoadikaaba yo?»

²⁸ Bi den sugi o ki yedi: «Fini n tie o ŋoadika, tinba wani tie Musa yaa ŋoadikaabe.

²⁹ Ti bani ke U Tienu den maadi leni Musa, ama one, tii bani ba wan ñani naani.»

³⁰ O den guani ki yedi ba: «Li tie bonludikaala ke yii bani wan ñani naani, ama o nan teni ke n nua.

³¹ Ti bani ke U Tienu ki cengi ti tuonbiadi danba maama, ama o cengi yua n jigini o ki tiendi o yanbuama.

³² Hali ŋanduna cilima, ti daa gbadi ke bi teni ke yua n mali ki tie juamo noadi.

³³ O naa joa yàá bi tie U Tienu n soani yua, o kan bi fidi ki tieni puu.»

³⁴ Bi den guani ki yedi o: «Fini yua n mali ki go fandi ti tuonbiadi nni, fini n bangi tinba?» Bi den deli ki ñani o.

Li yantiali juandi maama

³⁵ Jesu den gbadi ke bi deli ki ñani o. Jesu n den tuogi o, o den buali o: «Naani a daani o Joa Bijua?»

³⁶ O den guani ki yedi: «Canbaa, waani nni wan tie yua min daani o.»

³⁷ Jesu den yedi o: «A laa o, yua n maadi leni a yeni, tie wane.»

³⁸ O den yedi o: «N Daano, n daani,» ki gbaani ki kpiagi o.

³⁹ Lani, Jesu den yedi: «N cua ŋanduna nni ke li bujiali n tieni bi niba siiga, ke a juama n noadi, yaaba n nua mo n juani.»

⁴⁰ Farisieninba tianba den ye leni o, ki gbadi laa maama ki yedi o: «Naani timoko joa yo?»

⁴¹ Jesu den yedi ba: «Yi yàá bi joa, yi kan bi yaa pia tuonbiadi. Yin tua: ‹Ti nua› yeni, yi tuonbiadi ye.