Jan n diani U Tienu Laabaaliŋamo maama 8 - U TIENU MAAMA TILI 2013

¹ Jesu den gedi Olivie Tiidi juali po.

² Ku tiŋaapanpangu, o go den guani U Tienu diegu nni, ke bi niba kuli cua o kani, ke o kali ki bangi ba.

³ U Tienu bali maama banda leni Farisieninba den cuani o kani ban cuo yaa pua ke o conbi.

⁴ Bi den sieni o bi niba kuli siiga, ki yedi Jesu: «Canbaa, bi cuo o naa pua wan conbi yaa yogunu.

⁵ Li bali maama nni, Musa bili ti po ke tin lugidi yaa puoba n tieni yeni a tana. Amo yedi lede?»

⁶ Bi den yedi yeni, ki bua ki biigi o, ki fidi ki kuli o. Ama Jesu den tibini ki dangi tiipo leni o nubili.

⁷ Nani ban den suagi liiga ki buali o yeni, o den yaadi ki sedi, ki yedi ba: «Yi siiga nni yua n kaa pia tuonbiadi, n kpa lugidi o li tanli.»

⁸ Lani, o go den tibini ki dangi tiipo.

⁹ Ban den gbadi wan yedi yaala, bi pala siedi den cuo ba, ke bikuli ña yendo yendo, ki cili a nikpela, ki ban pundi hali puoli yaaba. Bi den ban ŋaa Jesu bebe leni o pua yeni, ke o se wan bi se naankani.

¹⁰ Lanwani, Jesu den yaadi ki sedi, ki buali o: «Pua, yaaba n kuli a ye le? Oba kuli ki buni ki cuo ŋa?»

¹¹ O den yedi o: «Canbaa, oba kuli.» Jesu den yedi o: «Nmoko kan bu ki cuo ŋa. Kuni, die ŋan da go faa ki tieni tuonbiadi.»]

Jesu tie ŋanduna yenma

¹² Jesu go den yedi bi niba: «Mini n tie ŋanduna yenma, yua n ŋua nni kuli, kan go cuoni li biigili nni, ama o baa baa li miali yenma.»

¹³ Lani yaa po, Farisieninba den yedi o: «A tiendi a yuli po siedi, a siedi yeni ki tie moamoani.»

¹⁴ Jesu den guani ki yedi ba: «Ba ke n tieni n yuli po siedi, n siedi tie moamoani, kelima n bani min ñani naani, ki go bani min caa naani. Ama yinba, yii bani min ñani naani ki cua, yii go bani min caa naani mo.

¹⁵ Yi ja ti buudi nani bi nisaaliba n nua maama, ama mii ja niloba buudi.

¹⁶ Ba n yaa baa jia ti buudi, n bujiali baa yaa tiegi, kelima mii ye nbebe. Baa U Tienu yua n soani nni, ye leni nni.

¹⁷ Yi bali maama nni, li diani ke nibilie siedo tie moamoani.

¹⁸ N tiendi n yuli po siedi, Baa yua n soani nni moko tiendi n po siedi.»

¹⁹ Lanwani, bi den buali o: «A Baa ye le?» Jesu den guani ki yedi ba: «Yii bani nni, yii bani n Baa mo. Yi yaa bi bani nni, yi bi baa bandi n Baa moko.»

²⁰ Jesu den maadi laa maama ki kuu ban den biliti ŋalimani naankani, wan den bangi bi niba U Tienu diegu nni yaa yogunu. Oba kuli ki den cuo o, kelima o yogunu daa pundi.

Yi kan fidi ki gedi min caa naanpo

²¹ Lani, Jesu den yedi ba: «N baa gedi. Yi baa lingi nni, ama yi baa kpe yi tuonbiadi nni. Yi kan fidi ki gedi min caa naanpo.»

²² Jufinba den yedi: «Wan yedi: ‹Yi kan fidi ki gedi min caa naanpo yeni,› naani o baa kpa o yule?»

²³ O den yedi ba: «Yi tie tiipo yaaba, nmo tie tanpoli yua. Yinba, yi tie ŋanduna ne yaaba, mini, mii tie ŋanduna ne yua.

²⁴ Lani yaa po yo, ke n waani yi ke yi baa kpe yi tuonbiadi nni, kelima yi yàá daani ke “N Ye,” yi baa kpe yi tuonbiadi nni.»

²⁵ Bi den yedi o: «A tie ŋme?» Jesu den yedi ba: «Min den kpa waani yi ke n tie yua yeni.

²⁶ N pia li bonla boncianla ki baa maadi leni yi, ki go jia yi buudi li po. Ama yua n soani nni tie moamoandaano, min maadi yaa maama moala ŋanduna nni tie min den gbadi o kani yaama.»

²⁷ Baa den bani ke o maadi ba, Baa U Tienu yaa maame.

²⁸ Lani yaa po, Jesu den yedi ba: «Yi yaa yugidi o Joa Bijua yaa yogunu, yi baa bandi ke “N Ye.” Lanyogunu yi baa bandi ke mii tieni liba n yuceli po, ama ke n maadi n Baa n den bangi nni yaala bebe.

²⁹ Wani yua n soani nni yeni ye leni nni, waa ŋaa nni nbebe, kelima yogunu kuli n tiendi yaala n mani o po.»

³⁰ Wan den maadi laa maama, bi niba boncianla den tuo ki daani o.

Abalahama yaabila

³¹ Lani, Jesu den yedi yaa Jufinba n tuo ki daani o yeni: «Yi yaa tuo ki kubi n maama, yi tie n ŋoadikaaba moamoani.

³² Yi baa bandi i moamoani, i moamoani yeni baa faabi yi.»

³³ Bi den guani ki yedi o: «Ti tie Abalahama puoliŋuani, hali tin ye, tii tua oba kuli yonbi. Be yaa po ke a yedi ke ti baa faabi?»

³⁴ Jesu den guani ki yedi ba: «N waani yi i moamoani, yua n tiendi ti tuonbiadi kuli tie ti tuonbiadi yonbo.

³⁵ O yonbo n ye yaa diegu nni ka tie wan baa yaa ye naani yogunu kuli. Ama yua n tie laa diegu biga, baa yaa ye lienni hali yaa yogunu kuli.

³⁶ Lani yaa po, Bijua yaa faabi yi, yi baa faabi moamoani.

³⁷ N bani ke yi tie Abalahama puoliŋuani, ama ba yeni, yi lingi ki bua ki kpa nni, kelima min maadi yaa maama, naa baa kaanu yi pala nni.

³⁸ N maadi min laa yaala n Baa kani, yimo tiendi yin gbadi yaala yimo yaa baa kani.»

³⁹ Bi den yedi o: «Ti baa n tie Abalahama.» Jesu den guani ki yedi ba: «Yi yaa bi tie Abalahama puoliŋuani, yi bi baa yaa tiendi Abalahama n den tuuni yaa tuona.

⁴⁰ Ama moala yi lingi ki baa kpa nni, mini yua n waani yi min den gbadi yaa moamoani U Tienu kani. Abalahama ki den tieni yeni.

⁴¹ Yi tiendi yi baa n tuuni yaa tuona.» Bi den yedi o: «Tii tie conconbila ka. Ti pia Baayendo, wani n tie U Tienu!»

⁴² Jesu den yedi ba: «U Tienu n yaa bi tie yi Baa, yi bi baa yaa bua nni, kelima n ñani U Tienu kani ki cua. Mii cua n yuceli po ka, wani n soani nni.

⁴³ Be yaa po ke yii gbadi min maadi yaa maama? Li tie ke yii fidi ki gaa min yedi yaale.

⁴⁴ Yi baa n tie Sutaani, yi bua ki yaa tiendi wani yi baa yaa yanbuame. O tie nikpalo hali mi cilima, waa ye i moamoani nni, kelima i moamoani ki ye o niinni. O yaa pua mi faama, o maadi nani wani o ba yantiali n tie maama, kelima o tie o tuofaadaano, ki go tie mi faama kuli yaa baa.

⁴⁵ Mini wani, n maadi i moamoani, ama yii dugi n maama po.

⁴⁶ Yi siiga nni, ŋme n baa fidi ki doagidi ke n pia ti tuonbiadi? N yaa maadi i moamoani, be yaa po ke yii dugi n maama po?

⁴⁷ Yaa nilo n tie U Tienu yua kuli, cengi wani U Tienu maama. Yin kaa cengi yeni, li tie ke yii tie U Tienu yaa yaabe.»

Jesu leni Abalahama

⁴⁸ Jufinba den guani ki yedi o: «Tii pia moamoani ka ki yedi ke a tie Samari yua, ki pia ki cicibiadiga?»

⁴⁹ Jesu den guani ki yedi ba: «Mii pia cicibiadiga ka. N jigindi n Baa yo, ama yinba, yi jigidi nni.

⁵⁰ Mii lingi ti kpiagidi n yuli po ka. Yendo ye yua n lingi n po ti kpiagidi, ki go ja ti buudi.

⁵¹ N yedi yi i moamoani, yua n kubi n maama, o kan kpe abada.»

⁵² Laa maama po, Jufinba den yedi o: «Moala wani, ti li bani ke a pia ki cicibiadige. Abalahama kpe, bi saawalipuaba moko kpe, ama ke fini nan yedi ke yua n kubi a maama, kan bandi mi kuuma abada.

⁵³ Naani a cie ti yaaja Abalahama yua n kpe yo? Bi saawalipuaba moko kpe. A tama ke a tie ŋme?»

⁵⁴ Jesu den guani ki yedi: «N yaa kpiagidi n yuli, n kpiagidi tie fanma fanma. Yua n kpiagidi nni tie n Baa, yin maadi yua yaa maama ki tua ke o tie yi Tienu yeni.

⁵⁵ Yii bani o, ama mini n bani o. N yaa bi yedi ke mii bani o, n bi baa tua tuofaadaano nani yinba. Ama n bani o, ki kubi o maama.

⁵⁶ Yi baa Abalahama den mangi o pali boncianla, ke o baa le n daali. O den laa li ke li mangi o.»

⁵⁷ Lani yaa po, Jufinba den yedi o: «A daa pundi bina piimuu, ki nan laa Abalahama?»

⁵⁸ Jesu den yedi ba: «N yedi yi i moamoani, hali ke Abalahama daa den ye, “N Ye.”»

⁵⁹ Lani yaa po, bi den taa a tana ki baa lugidi o. Ama Jesu den wuoni ki ñani U Tienu diegu nni.