Jan n diani U Tienu Laabaaliŋamo maama 7 - U TIENU MAAMA TILI 2013

Jesu waamu naa tuo ki daani o

¹ Lani n pendi, Jesu den goadi Galile nni. Waa go den bua ki yaa goadi Jude nni, kelima Jufinba den lingi ki bua ki kpa o.

² Jufinba jaanma yaama n yi a suga jaanma den kuli.

³ Lani yaa po, Jesu waamu den yedi o: «Ŋan fii nekanba ki gedi Jude, ke a ŋoadikaaba mo n le ŋan tuuni yaa tuona.

⁴ Yua n bua bi niba kuli n yaa bani o, kan yaa wuondi wan tiendi yaala. Ŋan tiendi laa bonla yeni, teni ŋanduna kuli n bandi.»

⁵ Ba o waamu mo naa den tuo ki daani o.

⁶ Jesu den yedi ba: «N yogunu daa pundi, ama yinba wani yaa po, yogunu kuli dagidi.

⁷ Ŋanduna yaaba kan fidi ki yaa nani yi, ama bi nani mini wani, kelima n tiendi siedi ke ban tuuni yaa tuona bia.

⁸ Yin gedi mani mi jaanma. Mini n wani da kan gedi, kelima n yogunu daa pundi.»

⁹ Wan den yedi ba yeni, o go den sedi Galile.

Jesu gedi Jerusalemi a suga jaanma yogunu

¹⁰ O waamu n den fii ki gedi mi jaanma yeni, wani o ba moko den yuandi ki gedi, ama waa den gedi ke bi niba bani. O den gedi ŋasiili nne.

¹¹ Jufinba den lingi o mi jaanma nni ki tua: «O ye le?»

¹² Ku niligu mo den soabidi soabidi leni biyaba, ki maadi o maama. Bine den tua ke o tie niŋamo, bine mo n yaa tua: «Yeni ka, o boandi bi nibe.»

¹³ Ama oba ki den maadi o maama ke bi niba gba, kelima bi den jie Jufinba.

¹⁴ Mi jaanma dana yeni siiga, Jesu den kua U Tienu diegu nni ki bangi bi niba.

¹⁵ Li den paki Jufinba, ke bi tua: «O naa nilo gaa lede ki bandi i Diani maama fuuli, wani yua n kaa kua li cogu?»

¹⁶ Jesu den guani ki yedi ba: «Min bangi yaa bangima, maa tie n yaama ka. Ama mi tie yua n soani nni yaa bangime.

¹⁷ O nilo yaa bua ki tieni U Tienu yanbuama, o baa bandi n bangima yaa ñani U Tienu kani, bi n yaa maadi n yuli po yo.

¹⁸ Yua n maadi o yuli po, lingi o yuli po ti kpiagidi. Ama yua n lingi yua n soani o yaa kpiagidi, tie moamoandaano, waa pia boandiba.

¹⁹ Musa n den soagini yi po li bali maama. Bi yeni ka? Ama yi siiga nni, ba niyendo naa tiendi man bili yaala. Be yaa po ke yi lingi ki bua ki kpa nni?»

²⁰ Ku niligu den guani ki yedi o: «A pia ki cicibiadiga. Ŋme n lingi ki baa kpa ŋa?»

²¹ Jesu den guani ki yedi ba: «N den soani tuonyenli ke li paki yikuli.

²² Musa den bili yi po ku koanciagu ŋantaado, laa cili Musa yaa kani ka, li den cili ti yaajanba kane. Lani yaa po, yi yen kuani o nilo ku koanciagu, ba U Tienu fuodima daali.

²³ Li yaa tie ke yi kuani o nilo ku koanciagu mi fuodima daali, ke yin da miidi Musa bali maama, be yaa po ke yi pala nan be leni nni, kelima n paagi o nilo cain mi fuodima daali?

²⁴ Yin da ja ti buudi nani yin nua maama, ama yin yaa ja ti buudi ke li tiegi.»

Naani Jesu n tie U Tienu n Gandi Yua?

²⁵ Jerusalemi yaaba siiga nni bi nitianba den tua: «Naani one ka tie ban lingi ki bua ki kpa yua yeni?

²⁶ Diidi ki le, o maadi bi niba siiga ke baa tua o liba. Naani ti yudanba tuo ke o tie U Tienu n Gandi Yua?

²⁷ Wani, ti bani wan ñani naani, ama U Tienu n Gandi Yua yaa cua, oba kuli kan bandi wan ñani naani.»

²⁸ Lani yaa po, Jesu n den bangi ba U Tienu diegu nni, o den kpaani: «Yi bani nni, ki go bani min ñani naani. Mii cua n yuceli cuama ka. Yua n soani nni tie o moamoandaano. Yii bani o.

²⁹ Ama mini n bani o, kelima n ñani o yaa kane. Wani n soani nni.»

³⁰ Lani yaa po, bi den lingi ki bua ki cuo o, ama oba kuli ki den cuo o, kelima o yogunu daa den pundi.

³¹ Ku niligu siiga boncianla den tuo ki daani o, ki tua: «Naani U Tienu n Gandi Yua yaa cua, o go baa tieni yaa bancianma n cie o naa nilo n tiendi yaama?»

Bi soani U Tienu diegu jiidikaaba ban cuo Jesu

³² Farisieninba den gbadi ke ku niligu soabidi leni biyaba, ki maadi Jesu maama yeni. Lani, bi kopadicianba yudanba leni Farisieninba den soani U Tienu diegu jiidikaaba, ban cuo o.

³³ Lani yaa po, Jesu den yedi: «N da baa waagi leni yi u yogunu waamu, lani yaa pendi, n baa guani ki gedi yua n soani nni po.

³⁴ Yi baa lingi nni, ama yi kan le nni. Min baa yaa ye naani yeni, yi kan fidi ki cua likani.»

³⁵ Lanwani, Jufinba den buali biyaba: «One baa gedi hali le, ke ti kan go le o? Naani o baa gedi Jufinba yaaba n yadi yadi, ki ye bi nilanba siiga, ki ban bangi bi nilanba yeni bi?

³⁶ Wan maadi yaa maama ki yedi: ‹Yi baa lingi nni ki nan kan le nni,› ki go yedi: ‹Min baa ye naani, yi kan fidi ki cua likani.› Laa maama mo bua ki yedi be?»

³⁷ Laa jaanma juodidaali, lani n tie mi jaanma dacianli, Jesu den se ki kpaani: «U ñuñuunu n pia yua kuli, wan cua n kani ki ño.

³⁸ Yaa nilo n tuo ki daani nni, li miali kpenciami baa yaa puubi ki ña o niinni, nani i Diani n yedi maama.»

³⁹ Jesu n den maadi yeni, o den maadi U Tienu Fuoma yaa maame, yaa niba n tuo ki daani wani Jesu n baa baa yua. U Tienu daa den puni ba o Fuoma yeni, kelima Jesu daa baa o kpiagidi.

⁴⁰ Ku niligu siiga nitianba den gbadi laa maama ki tua: «Moamoani, one n tie tin guu yaa saawalipualo.»

⁴¹ Bine mo den yedi: «One n tie U Tienu n Gandi Yua.» Bine mo den tua: «Naani U Tienu n Gandi Yua baa ña Galile?

⁴² Naani i Diani ki yedi, ke U Tienu n Gandi Yua baa yaa tie Davidi puoliŋuanu ka? Naani o kan ña Betelemi, Davidi dandogu nni ka?»

⁴³ Lanwani, mi paadima den tieni ku niligu nni, kelima Jesu po.

⁴⁴ Bi nitianba den bua ki cuo o, ama oba ki den cuo o.

⁴⁵ U Tienu diegu jiidikaaba n den guani bi kopadicianba yudanba leni Farisieninba yeni kani, bi den buali ba: «Be n teni ke yii cuani o?»

⁴⁶ Bi jiidikaaba den guani ki yedi ba: «Niloba kuli daa maadi nani laa joa n maadi maama.»

⁴⁷ Farisieninba den guani ki buali ba: «O boandi yinba moko bi?

⁴⁸ Naani yi sua ke bi yudanba leni Farisieninba siiga, ba yendo tuo ki daani o?

⁴⁹ Ama ku naa niligu, yaaba n ki bani Musa bali maama fuuli tie ban soli yaaba.»

⁵⁰ Nikodemi, yua n den kpa gedi Jesu kani ku ñiagu, ki tie Farisieninba siiga yua, den yedi ba:

⁵¹ «Naani ti bali maama tuo ban jia o nilo buudi ki cuo o, kaa kpa cengi ki gbadi wan yedi yaala o yuli po, ki bandi wan tiendi yaala?»

⁵² Bi den yedi o: «Naani amoko tie Galile yua yo? Ŋan lingi i Diani nni, a kan le ke saawalipualoba ñani Galile.» [

Yaa pua n conbi maama

⁵³ Bi den yadi ke yuakuli kuni o denpo.