Jan n diani U Tienu Laabaaliŋamo maama 4 - U TIENU MAAMA TILI 2013

Jesu leni Samari diema pua

¹ Farisieninba den gbadi ke yaa niba n den tua Jesu ŋoadikaaba ke o batisi ba, yabi ki cie Jan yaaba.

² Ama Jesu wani o ba ka den batisi bi niba, o ŋoadikaaba n den batisi ba.

³ Wan den bandi ke bi yedi yeni, o den ñani Jude ki baa guani Galile diema nni.

⁴ Li den tie tiladi wan tagi Samari diema nni.

⁵ Lani, o den pundi Samari dogu yuu n yi Sikari. Laa dogu den kuu leni Jakob n den puni o bijua Josefi yaa kuanu.

⁶ Jakob n den gbini yaa caali mo den ye likani. Jesu den cuoni ki coagi, ki kali li caagbanli po. Li den bua ki pundi u yensiinu.

⁷ Samari pua den cua li caali kani ki baa yidi mi ñima. Jesu den yedi o: «Pa nni min ño.»

⁸ Li den sua ke o ŋoadikaaba kua u dogu nni ki baa n daa mi jiema.

⁹ Samari pua yeni den buali o: «Li gaa lede ke fini yua n tie Jufi mia mini Samari pua, ke min pa ŋa ŋan ño?» O den yedi yeni kelima Jufinba naa den pia ŋantaadi leni Samari yaaba.

¹⁰ Jesu den guani ki yedi o: «A yaa bi bani U Tienu paabu n tie yaala leni mini yua n yedi a: ‹Pa nni min ño› yeni n tie yua, fini n bi baa mia. Lani, o bi baa pa a yaa ñima n pia li miali.»

¹¹ O pua yeni den yedi o: «Canbaa, ŋaa pia loangu, ke li caali mo nan ñua. A baa baa yaa ñima n pia li miali le?

¹² Naani a tama ke a cie ti yaaja Jakob yua n den puni ti li naa caali? Wani o ba n den ñuni li ñima, wani, o bijaba leni o yandi kuli.»

¹³ Jesu den guani ki yedi o: «Yua n ñuni mi naa ñima kuli, u ñuñuunu go baa cuo o.

¹⁴ Ama yua n ñuni min baa pa o yaa ñima kuli, u ñuñuunu kan go cuo o abada. Min baa pa o yaa ñima baa tua ñinbunli o niinni, ki yaa pudi ki puubi hali yaa miali n kan gbeni nni.»

¹⁵ O pua yeni den yedi o: «Canbaa, pa nni laa ñima, ke u ñuñuunu n da go cuo nni, ke min da go cua ne ki luuni.»

¹⁶ Jesu den yedi o: «Gedi ki ban yini a calo ne.»

¹⁷ O pua yeni den guani ki yedi o: «N naa pia joa.» Jesu den yedi o: «A maadi moamoani leni ŋan yedi ke ŋaa pia joa,

¹⁸ kelima a den kuni jabimuu ke bi tua a ciaba. Ŋan ye leni yua moala naa tie a calo. Lani yaa po, a maadi moamoani.»

¹⁹ O pua yeni den yedi o: «Canbaa, n sua ke a tie saawalipualo.

²⁰ Ti yaajanba den kpiagidi U Tienu li naa juali po. Ama yinba Jufinba yedi ke tiladi bi niba n baa yaa kpiagidi U Tienu naani tie Jerusalemi.»

²¹ Jesu den yedi o: «Pua, daani n maama. U yogunu kpendi ke yi kan go yaa kpiagidi Baa U Tienu li naa juali po, bi Jerusalemi po.

²² Yinba Samari yaaba, yii bani yin kpiagidi yaala, ama tinba Jufinba wani, ti kpiagidi tin bani yaala, kelima mi tindima baa ña Jufinba kane.

²³ Ama u yogunu kpendi, u pundi ba moala, ke yaa niba n kpiagidi Baa U Tienu moamoani, baa yaa kpiagidi o bi pala nni leni i moamoani. Baa U Tienu lingi yaaba n baa yaa kpiagidi o yene.

²⁴ U Tienu tie fuoma. Lani yaa po, li tie tiladi ke yaaba n baa yaa kpiagi o kuli n yaa kpiagidi o bi pala nni leni i moamoani.»

²⁵ O pua yeni den yedi o: «N bani ke U Tienu n Gandi Yua n baa cua. Wani, ban yi yua Kilisiti yeni. O yaa cua, o baa waani ti li bonla kuli.»

²⁶ Jesu den yedi o: «Mini yua n maadi leni a yeni n tie wani.»

²⁷ Lanyogunu, o ŋoadikaaba den guani ki cua. Li den paki ba leni wan boe leni o pua yeni, ama oba ki den buali: «A bua be?» Yaa ka, «Be yaa po ke a maadi leni o?»

²⁸ O pua yeni den ŋaa o cuali, ki guani ki kua u dogu nni ki yedi bi niba:

²⁹ «Cua mani ki ban le yaa nilo n waani nni min tieni yaala kuli. Waa baa yaa tie U Tienu n Gandi Yua ka?»

³⁰ Bi niba den ñani u dogu nni ki cua Jesu kani.

³¹ Lanyogunu Jesu ŋoadikaaba den yedi o: «Canbaa, a di.»

³² Ama o den yedi ba: «N pia yin ki bani yaa jiema ki baa je.»

³³ Lani, o ŋoadikaaba den buali biyaba: «Naani niloba cuani o po bonjekaala bi?»

³⁴ Jesu den yedi ba: «N yaa jiema tie min yaa tiendi yua n soani nni yanbuama, ki yaa tuuni o tuonli hali ki dudi.

³⁵ Yii tua ke ŋmaalinaa ka sieni yin taani ti kpaandi? Ama mini wani n yedi yi, yaadi mani ki nuali i kuani n beni maama. Li pundi yin taani ti kpaandi.

³⁶ Yua n yendi baadi o panpaani ki taagi ti kpaandi yaa miali n kan gbeni po, ke yua n buli leni yua n yendi kuli, n taani ki mangi bi pala.

³⁷ Ban pua yaa kpanjama na tie moamoani: ‹One buu, one mo yendi.›

³⁸ N soani yi ke yin yendi yin ki den soani yaala yaa po. Nitoaba den soani li tuonli, moala yimo taani ti kpaandi, kelima bi den soani.»

³⁹ Samari diema yaaba, yaaba n den ye laa dogu nni, niba boncianla den tuo ki daani Jesu, kelima o pua yeni den yedi ba: «O waani nni min den tieni yaala kuli.»

⁴⁰ Samari niba yaaba n den cua Jesu kani yeni den mia o ke wan sedi leni ba. O go den tieni likani danalie.

⁴¹ Yaaba n tuo ki daani o den pugini hali boncianla, kelima ban den gbadi yaa maama o kani po.

⁴² Bi den yedi o pua yeni: «Moala, laa ji tie ŋan bi waani ti yaa maama bebe ka teni ke ti tuo ki daani o, tinba ti ba gbadi o maama, ki bandi ke moamoani wani n tie ŋanduna Candaano.»

Jesu paagi o bado koanbali bijua

⁴³ Laa dalieda n den pendi, Jesu den fii ki ñani lankani ki gedi Galile diema nni.

⁴⁴ Wani o ba den yedi ke bi kan kpiagi saawalipualo o dandogu nni.

⁴⁵ Wan den pundi Galile, laa diema yaaba den gaa o cangu bonŋanla, kelima bimoko den gedi Jerusalemi ki jaani mi Pendima jaanma, ki laa wan den tieni yaala kuli laa jaanma yogunu.

⁴⁶ Jesu den guani ki gedi Galile yaa Kana, wan den teni ke mi ñima lebidi ki tua duven naankani yeni. O bado koanbali den ye Kafarnawum dogu nni ke o bijua yia.

⁴⁷ Li koanbali yeni n den gbadi ke Jesu ñani Jude diema nni ki cua Galile diema nni, o den cua o kani ki mia o ke wan yegi leni o ki gedi Kafarnawum, ki ban paagi o bijua kelima o nagini mi kuuma.

⁴⁸ Jesu den yedi o: «Yi yàá laa mi bancianma leni li bonlindinkaala yaa ka, yi kan daani nni.»

⁴⁹ Li koanbali den yedi o: «Canbaa, cua tin yegi ki gedi ke n biga daa kpe.»

⁵⁰ Jesu den yedi o: «Kuni, a biga baa laafia.» O joa yeni den daani Jesu n maadi o yaa maama, ki kuni.

⁵¹ Wan den ye u sanu nni, o naacenba den tuogi o ki waani o ke o biga baa laafia.

⁵² O den buali ba wan li baa laafia yaa yogunu. Bi den waani o ke wonli li yenlebidile, ke o gbananbiendi den kagidi o po.

⁵³ Ki biga baa den bandi ke li den tie lanyogunu cap, ke Jesu yedi o: «A biga baa laafia.» Wani leni o deni yaaba kuli den tuo ki daani Jesu.

⁵⁴ Lani n tie Jesu n den tieni yaa bancianliema, wan den ñani Jude diema nni ki guani Galile diema nni.