Jan n diani U Tienu Laabaaliŋamo maama 2 - U TIENU MAAMA TILI 2013

Li puocaali Kana dogu nni

¹ Li dataali daali, li puocaali den tieni Kana, Galile diema nni. Jesu naa mo den ye likani.

² Bi den yini Jesu leni o ŋoadikaaba moko ban cua li puocaali yeni.

³ Duven n den poadi, Jesu naa den yedi o: «Baa go pia duven.»

⁴ Jesu den guani ki yedi o: «Pua, be n ye mini leni fini siiga? N yogunu daa pundi.»

⁵ O naa den yedi bi naacenba: «Yin tieni mani wan baa yedi yi yaala kuli.»

⁶ Bobiciamaluoba den ye likani ki tie tana, ki tie Jufinba nidiŋanbima bogida po. Bobicianyenli kuli den baa fidi ki gaa litidi kobiga.

⁷ Jesu den yedi ba: «Yin gbieni mani a bobiciama na mi ñima.» Bi den gbieni a ke a landi landi.

⁸ Lani, o den yedi ba: «Kabidi mani ki gedini mi puocaajiema yudaano kani.» Bi den gedini.

⁹ Mi puocaajiema yudaano den leni yaa ñima n lebidi ki tua duven, kaa bani man ñani naani. Ama yaa naacenba n den kabidi den bani.

¹⁰ Lani, o den yini o puocaano calo ki yedi o: «Nilo kuli yen kpa cuani wan yini yaaba po yaa duven n mani boncianle no. Bi yaa ñuni ki guo, wan ji cuani bi po yaa duven n mani waamu. Ama fini wani a bi wuoni yaa duven n mani boncianla, ki ti cuani o moala.»

¹¹ Lani n tie Jesu n den cili ki tieni yaa bancianma Kana, Galile diema nni. O den doagidi o kpiagidi, ke o ŋoadikaaba daani o.

¹² Lani n pendi, Jesu den gedi Kafarnawum, wani, o naa, o waamu leni o ŋoadikaaba kuli, ki tieni likani danaba.

Jesu kua U Tienu diegu nni

¹³ Jufinba jaanma, mi Pendima jaanma yeni n den nagidi, Jesu den doni ki gedi Jerusalemi.

¹⁴ O den laa U Tienu diegu nni yaaba n kuadi i ne, i pe, mu kpaajiemu leni bi ligilebidiba ke bi kaa.

¹⁵ O den taa u baabu ki lebini ke u tua nani u baliju yeni, ki deli bikuli ki ñani U Tienu diegu nni, bani, bi pe leni bi ne kuli. O go den tudi ki luni bi ligilebidiba kpagidi, ki yadi yadi bi ligi,

¹⁶ ki yedi a kpaajekuada: «Ñani mani laa bonla nekanba. Yin da teni n Baa diegu n tua daaga.»

¹⁷ O ŋoadikaaba den tiadi ke li diani ki yedi: «A diegu yankuali cuo nni hali boncianla.»

¹⁸ Lani yaa po, Jufinba den yedi o: «A baa tieni be yaa bancianme ki doagidi ti po ke a pia li bali ki tieni ŋan tieni yaala ne?»

¹⁹ Jesu den guani ki yedi ba: «Bolini mani U Tienu diegu na, n go baa maa gu danataa siiga.»

²⁰ Jufinba den guani ki yedi o: «Li den pundi piinaa n binaluoba ke bi maa U Tienu diegu na, ke fini wani baa guani ki maa gu danataa siiga?»

²¹ Ama wan den maadi U Tienu diegu yaagu yaa maama yeni den tie o gbanande.

²² Wan den fii bi tinkpiba siiga, o ŋoadikaaba den tiadi ke o maadi laa maama, ki daani i Diani n yedi yaala leni Jesu n den maadi yaa maama.

Jesu bani yaala n ye o nilo pali nni kuli

²³ Jesu n den ye Jerusalemi mi Pendima jaanma yogunu yeni, bi niba boncianla den laa wan tiendi yaa bancianma, ki daani o yeli nni.

²⁴ Ama Jesu ki den dugi bi po, kelima o den bani bikuli.

²⁵ Laa den tie o po tiladi ban tieni o po siedi niloba kuli po. Wani o ba den bani yaala n ye o nisaalo niinni.