Jan n diani U Tienu Laabaaliŋamo maama 19 - U TIENU MAAMA TILI 2013

¹ Lani, Pilati den teni ke bi toatieba taa Jesu ki pua o i baliji.

² Bi toatieba den taa i konkoni ki piani nani ki badifogiliga yeni, ki cibini o, ki go golini o bu kpalimoanbu.

³ Bi den kpendi o kani ki tua: «Ti fuondi a, fini Jufinba bado!» Bi go den pabini o.

⁴ Pilati go den ñani ki gedi Jufinba kani ki yedi ba: «Diidi, n baa teni ban ñani o yi kani, ke yin bandi ke mii laa ke o tieni liba, yaala n pundi min cuo o.»

⁵ Lani, Jesu den cua bi kani ki ciibi i konkoni, ki goli bu kpalimoanbu. Pilati den yedi ba: «No mani o joa na.»

⁶ Bi kopadicianba yudanba leni bi jiidikaaba n den laa Jesu, bi den tiani: «Joani o li dapoanpoanli po! Joani o li dapoanpoanli po!» Pilati den yedi ba: «Yinba yi ba n taa o ki joani o li dapoanpoanli po, kelima mini, mii laa ke o tieni liba, yaala n pundi min cuo o.»

⁷ Jufinba den guani ki yedi o: «Tinba wani pia li bali maama. Laa bali maama mo yaa po, li bili ke li pundi wan kpe, kelima o den yedi ke o tie U Tienu Bijua.»

⁸ Pilati n den gbadi laa maama, o den jie ki pugini.

⁹ O go den kua o bujiali kani ki buali Jesu, ki yedi: «A ñani lepoe?» Jesu naa den guani o maamiba kuli.

¹⁰ Lani yaa po, Pilati den yedi o: «A yie ke a kan guani mine liba? Naani ŋaa bani ke n pia li bali ki faabi a, bi ki joani a li dapoanpoanli po?»

¹¹ Jesu den guani ki yedi o: «A kan baa n po baliba, bi yàá den puni a li tanpoli po. Li tie lani yaa po, ke yua n den cuo nni ki teni a, pia i tagili ki cie ŋa.»

¹² Ki cili laa yogunu, Pilati den lingi wan baa faabi Jesu maama. Ama Jufinba den tiani: «A yaa faabi o naa nilo, ŋaa tie Sesari danli. Yua n yedi ke o tie bado kuli, o fiini mi yiema Sesari po.»

¹³ Pilati n den gbadi laa maama, o den ñani Jesu niinpo, ki kali u bujiali kaanu po, ke u ye yaa kaanu n yi “Ti Tanpabidi luolu,” Hebilu maama nni, u yi Gabata.

¹⁴ Laa daali den tie mi Pendima jaanma boginli daali, ke li bua ki pundi u yensiinu. Pilati den yedi Jufinba: «Diidi mani yi bado.»

¹⁵ Bi den tiani: «Kpa o! Kpa o! Joani o li dapoanpoanli po!» Pilati den yedi ba: «Min joani yi bado li dapoanpoanli po bi?» Bi kopadicianba yudanba den guani ki yedi o: «Tii pia baditoa, kali Sesari.»

¹⁶ Lanwani, Pilati den teni ba Jesu, ban ban joani o li dapoanpoanli po. Lani, bi den taa Jesu ki gedini o.

Bi joani Jesu li dapoanpoanli po

¹⁷ Jesu den bugi o dapoanpoanli, ki ñani u dogu nni ki ban caa ban yi yaa kaanu “ku Yukuokuogu kaanu.” Hebilu maama nni, bi yi u Goligota.

¹⁸ Lankane ke bi den joani o li dapoanpoanli po. Bi go den joani nibilie a dapoanpoana po, yendo o jienu, yendo o ganu, ke Jesu mo ye siiga nni.

¹⁹ Pilati den diani i diani ki tabini li dapoanpoanli yuli po. Yaala n den diani n tie ne: “Jesu, Nasareti yua, Jufinba bado.”

²⁰ Jufinba boncianla den cogi i diani yeni, kelima ban den joani Jesu li dapoanpoanli po naankani den kuu leni u dogu. Li den diani Hebilu, Laten leni Gireki maama nni kuli.

²¹ Lani yaa po, bi kopadicianba yudanba den yedi Pilati: «Ŋan da diani “Jufinba bado,” ama ŋan diani ke o yedi ke o tie Jufinba bado.»

²² Pilati den guani ki yedi ba: «Min diani yaa maama, n diani ma.»

²³ Yaa toatieba n den joani Jesu li dapoanpoanli po, den taa o tiadi ki boagidi kaaninaa, ke minteeli kuli den baa kaanyendu. Bi den taa o liadicianli moko, yaali n ki den pia ñialu, kelima li den tie cabiyenli, ki cili tanpoli, ki jiidi hali tinga. Bi den yedi biyaba:

²⁴ «Tin da padi li, tin toa li tiatia, ki le yua n baa baa li.» Lani, li den tieni ke yaala n diani i Diani nni n tieni ki dudi: «Bi boagidi n tiayiekaadi bi siiga, Ki toa tiatia n liadicianli po.» Lani n tie bi toatieba n den tieni yaala.

²⁵ Jesu naa, o naa waalo, Kilopa pua Mariyama leni Mariyama, Magidala dogu yua den se ki nagi Jesu dapoanpoanli.

²⁶ Jesu n den laa o naa leni wan bua yaa ŋoadika ke o se leni o, o den yedi o naa: «Pua, no a bijua.»

²⁷ Lani, o den yedi o ŋoadika yeni: «No a naa.» Lanyogunu liiga, laa ŋoadika den kubi Jesu naa o denpo.

Jesu kuuma

²⁸ Li yaa puoli, Jesu n den bani ke li bonla kuli tieni ki dudi, o den yedi: «U ñuñuunu pia nni.» O den yedi yeni ke yaala n diani i Diani nni n tieni ki dudi.

²⁹ Ku ñintiagu den se likani, ki gbie leni mi ñinmiligima. Niyendo den taa u tuogu ki pagini mi niinni, ki tuuni isope benu, ki gedini Jesu ñoabu kani.

³⁰ Jesu n den fua mi ñinmiligima yeni, o den yedi: «Likuli tieni ki dudi.» Lani, o den tibini o yuli, ki cabi o naano ki kpe.

Bi muu Jesu logili

³¹ Li sua ke li tie li boginli daali, ke li baa fii ki faa ki yaa tie U Tienu fuodima daali, yaali n gagidi ki tie jaancianma. Jufinba naa den bua a tinkpila n yaa ye a dapoanpoana po landaali. Lani, bi den mia Pilati wan teni ban kuakua yaaba n ye a dapoanpoana po taana, ki ñani ba likani.

³² Lani yaa po, bi toatieba den gedi likani ki kua o nikpialo taana leni o nilielo ya, ban den joani yaaba a dapoanpoana po leni Jesu.

³³ Ama ban den pundi Jesu kani ki sua ke o peli ki kpe, baa den kua o taana.

³⁴ Bi toatieba siiga nni yendo den muu Jesu logili li kpaanli. Lanyogunu mi soama leni mi ñima den ñani likani.

³⁵ Yua n den laa lani kuli n tieni siedi lipo. O siedi tie moamoani. O go bani ke o maadi moamoani. O tieni siedi yeni ke yimoko n tuo ki ŋoadi Jesu, ki dugi o po.

³⁶ Lani kuli den tieni yeni, ke i Diani n kua: «Bi kan kua o kpaba siiga ba yenli.»

³⁷ I Diani go yedi kaanto: «Bi baa diidi ban den muu yua.»

Jesu piinma

³⁸ Lani n pendi, Alimate dogu yua Josefi, yua n den tie Jesu ŋoadika, ama ŋasiili nni, kelima o den jie Jufinba, den mia Pilati ke wan pa o u sanu wan taa Jesu o tinkpilo ki piini. Pilati den puni o u sanu, ke o gedi ki ban taa o tinkpilo.

³⁹ Nikodemi, yua n den kpa cua Jesu kani ku ñiagu moko den taani leni Josefi, ki cuani mili leni alowesi ki kali kali ke li kpiagu den pundi kilo piitaa.

⁴⁰ Bi jaliediba yeni den taa Jesu o tinkpilo, ki fini o a cabipiena, ki taani leni tulale yua n pia u nuulumanu, nani Jufinba n maani ki tiendi maama.

⁴¹ U kuanu den nagi ban den joani Jesu li dapoanpoanli po naankani. Yaa takuli n tie takupanli, ke bi daa kuani tinkpilo kuli lienni, den ye u kuanu yeni niinni.

⁴² Nani lan den tie Jufinba n baa bogini mi fuodima daali po yaa daali, ke li takuli mo ye koanma nni yeni, bi den kuani Jesu o tinkpilo laa takuli nni.