Jan n diani U Tienu Laabaaliŋamo maama 15 - U TIENU MAAMA TILI 2013

Li ñiali leni i beni

¹ Mini n tie duven tibu ñiamoanli. N Baa n tie bu kubido.

² Yaa benu n tuugi leni nni ki naa luoni kuli, o pedi u. Yaa benu n luoni mo kuli, o kpendi ki ŋanbidi u, wun yaa luoni ki pugidi.

³ Moala yi tuodi ki ŋanbi, kelima min maadi yi yaa maama ŋanbi yi no.

⁴ Yin yaa ye n niinni, nmo baa yaa ye yi niinni. Nani u benu n kan fidi ki luoni u yuceli po, kali wun yaa tuugi leni li ñiali yeni, li tie yene leni yimoko. Yi kan fidi ki luoni, yi yàá tuugi leni nni.

⁵ Mini n tie bu duventibu ñiali, yinba mo n tie bu beni. Yua n ye n niinni, ke nmo ye o niinni, o baa luoni li bonluonkaala boncianla. N yàá ye leni yi, yi kan fidi ki tieni puu.

⁶ Yua n kaa tuugi leni nni ki ye n niinni kuli, bi baa lu o niinpo nani ban luni u benu maama, ke u kuodi. Bi taagi yaa beni n kuodi ki lu u mu nni, ke i buodi.

⁷ Yi yaa tuugi leni nni ki ye n niinni, ke n maama mo ye yi niinni, mia mani yin bua yaala kuli, yi baa baa la.

⁸ Yi yaa luoni li bonluonkaala boncianla, n Baa baa yaa baadi ti kpiagidi li po. Yeni, yi baa doagidi ke yi tie n ŋoadikaaba moko.

⁹ Nani Baa n bua nni maama, nmo bua yi yene. Yin yaa ye mani n buama nni.

¹⁰ Yi yaa kubi n bali maama, yi baa ye n buama nni, nani nmo n kubi n Baa yaa bali maama ki ye o buama nni maama.

¹¹ N maadi yi laa maama, ke yin yaa pia n yaa pamanli, ke yi pamanli n pugini ki dagidi.

¹² N bali maama tie line: Yin bua mani yiyaba nani min bua yi maama.

¹³ Oba kuli ki pia yaa buama n cie mine, o nilo n pa o miali o danlinba po.

¹⁴ Yi yaa tuo ki tiendi min bili yi po yaala, yi tie n danlinba.

¹⁵ Mii go yi yi bi naacenba ka, kelima o naacemo naa bani o canbaa n tiendi yaala. Ama n yi yi n danlinba, kelima n waani yi min gbadi yaala n Baa kani kuli.

¹⁶ Laa tie ke yinba ka den gandi nni. Ama mini n den gandi yi, ki go gagidi yi, ke yin gedi ki yaa luoni li bonluonkaala, ke yi bonluonkaala mo n yaa ye. Lanwani, Baa baa pa yi yin mia o yaala kuli, kelima n yeli po.

¹⁷ Min bili yaa bali maama tie line: Yin yaa bua mani yiyaba.

Ŋanduna yaaba nani Jesu leni o ŋoadikaaba

¹⁸ Ŋanduna yaaba yaa nani yi, yin tiadi ke bi den kpa nani mini hali ke bi daa nani yinba.

¹⁹ Ŋanduna bi baa bua yi, yi yaa bi tie o yaaba. Ama, nani yin ki tie ŋanduna yaaba, ke n nan gandi yi, ki paadi leni ŋanduna yeni, n teni ke ŋanduna yaaba nani yi.

²⁰ Yin tiadi mani min den maadi yi yaa maama, naacemoba kuli ki cie o canbaa. Bi yaa waani mini o falaciamo, bi baa waani yinba moko o falaciamo. Bi yaa kubi n maama, bi baa kubi yimoko yaa maama.

²¹ Bi baa yaa tiendi yi lani kuli n yeli nni, kelima baa bani yua n soani nni.

²² N yàá bi den cua ki maadi leni ba, bi kan bi yaa pia tuonbiadi. Ama moala, bi kan baa ki nia ke baa pia tuonbiadi.

²³ Yua n nani nni, nani n Baa moko.

²⁴ N yàá den soani bi siiga nitoa kuli n daa soani yaa tuona, bi kan bi yaa pia tuonbiadi. Moala, bi laa laa tuona ki nani mini leni n Baa kuli.

²⁵ Li tieni yeni ke yaa maama n diani bi bali maama nni na, n tieni ki dudi: ‹Bi den nani nni fanma fanma.›

²⁶ O Todika yaa cua, min baa soani yi po yua, wani i moamoani Fuoma, yua n ñani Baa kani yeni, wani n baa yaa tiendi n po siedi.

²⁷ Yinba moko baa yaa tiendi n po siedi, kelima yi den ye leni nni hali mi cilima.