Jan n diani U Tienu Laabaaliŋamo maama 14 - U TIENU MAAMA TILI 2013

Jesu n tie yaa sanu n caa Baa kani

¹ Yin da yagi mani yi yama. Daani mani U Tienu, daani mani mini moko.

² N Baa diegu nni pia i yekaani boncianla. Li yàá bi tie yeni, n bi baa waani yi. N caa ki baa n ŋanbi yi po u kaanu.

³ N yaa gedi ki ban ŋanbi yi po u kaanu yeni, n baa guani ki cua ki taa yi tin yegi, ke min ye naani, yimoko baa yaa ye lankani.

⁴ Yi bani min caa naanpo, ki go bani lipo sanu.»

⁵ Toma den yedi o: «N Daano, tii bani ŋan caa naanpo, ti baa gaa lede ki bandi lipo sanu?»

⁶ Jesu den yedi o: «Mini n tie u sanu, i moamoani leni li miali. Oba kuli kan pundi Baa kani, li yàá tie mini yaa po.

⁷ Yi yaa bi bani nni, yi bi baa yaa bani n Baa. Moala liiga yi bani o, yi laa o.»

⁸ Filipi den yedi o: «N Daano, waani ti Baa, lani bebe baa dagidi ti po.»

⁹ Jesu den yedi o: «Filipi, ba ke n waagi ki ye leni yi, a daa bani nni? Yua n laa nni kuli, laa Baa. Be yaa po ke a yedi min waani yi Baa?

¹⁰ Ŋaa daani ke n ye Baa niinni, ke Baa moko ye n niinni yo? Min maadi yi yaa maama yeni, maa ñani n yaa kani ka. Li tie Baa yua n ye n niinni n tuuni o tuona.

¹¹ Daani mani nni ke n ye Baa niinni, ke Baa moko ye n niinni. Lani yaa ka daani mani kelima a naa tuona po.

¹² N yedi yi i moamoani ke yua n daani nni kuli, o moko baa yaa tuuni min tuuni yaa tuona, ki go yaa tuuni ba ya n cie yeni, kelima n caa Baa po.

¹³ Yin baa mia yaala kuli n yeli nni, n baa tieni la, ke Baa n baa ti kpiagidi kelima Bijua po.

¹⁴ Yi yaa mia bonliba kelima n yeli nni kuli, n baa tieni la.

Jesu niani ke o baa soani U Tienu Fuoma Yua

¹⁵ Yi yaa bua nni moamoani, yi baa kubi n bali maama.

¹⁶ N baa mia Baa U Tienu, wan pa yi toa, yua n baa yaa tie yi Todika ki yaa ye leni yi hali yaa yogunu kuli.

¹⁷ Wani n tie i moamoani Fuoma. Ŋanduna yaaba kan fidi ki gaa o cangu, kelima baa nua o, baa bani o mo. Ama yinba wani, yi bani o kelima o ye leni yi, ki baa ki ye yi niinni.

¹⁸ N kan ŋaa yi yi bebe nani a kpienbila yeni, n go baa cua yi kani.

¹⁹ Li yaa go pugini waamu, ŋanduna kan go le nni. Ama yinba wani, yi baa le nni kelima n fo ki ye, yimo baa yaa fo ki ye.

²⁰ Landaali yi baa bandi cain ke n ye n Baa niinni, ke yi ye n niinni, ke nmo ye yi niinni.

²¹ Yua n tuo ki gaa n bali maama, ki go kubi ma, wani n tie yua n bua nni moamoani. Yua n bua nni yeni, n Baa baa bua o, nmoko baa bua o, ki doagidi o po min tie yua.»

²² Jude, laa tie Judasi Isikarioti ka, den buali o: «N Daano, be teni ke a baa doagidi a yuli ti po, ki nan kan doagidi li ŋanduna po wani?»

²³ Jesu den guani ki yedi o: «O nilo yaa bua nni moamoani, o baa kubi n maama. Lani, n Baa baa bua o. Ti baa cua o kani ki yaa ye o deni.

²⁴ Yua n kaa bua nni kan tuo ki yaa kubi n maama. Yin gbadi yaa maama yeni, maa ñani mini yaa kani ka, mi ñani Baa yua n soani nni yaa kane.

²⁵ N maadi yi lani kuli hali ke n da ye leni yi.

²⁶ O Todika, U Tienu Fuoma Yua, Baa n baa soani yua n yeli nni yeni, wani n baa bangi yi li bonla kuli, ki tiadi yi min waani yi yaala kuli.

²⁷ N ŋaa yi po mi yanduanma. N puni yi n yaa yanduanme. Mii puuni yi ma nani ŋanduna n puuni maama ka. Yin da yagi yi yama, yin da jie mani.

²⁸ Yi den gbadi ke n yedi yi ke n baa gedi ki ŋaa yi, ki go baa guani yi kani. Yi yaa bi bua nni moamoani, yi bi baa yaa mangidi yi pala ke n caa Baa po, kelima wani n cie nni.

²⁹ N tuodi ki waani yi lani kuli moala hali ke li daa pundi, ke yaa daali ke laa bonla kuli baa tieni, yin daani nni.

³⁰ N kan go maadi leni yi boncianla, kelima ŋanduna bado kpendi. Waa pia n po baliba kuli.

³¹ Ama li tie tiladi ke ŋanduna kuli n bandi ke n bua Baa, ki tiendi wan puogi nni yaala. Fii mani tin fuadi nekanba!