Jan n diani U Tienu Laabaaliŋamo maama 13 - U TIENU MAAMA TILI 2013

Jesu fala, o kuuma leni o fiima bi tinkpiba siiga Jerusalemi po 13—21 Jesu nigidi o ŋoadikaaba taana

¹ Hali ke mi Pendima jaanma daa pundi, Jesu den bani ke wan baa ña ŋanduna nni, ki gedi Baa po yaa yogunu pundi. O den bua o yaaba, yaaba n ye ŋanduna nni; O den bua ba hali mi juodima.

² Jesu leni o ŋoadikaaba den dini mi yenjuajiema. Li sua ke Sutaani den kua Simon Isikarioti bijua Judasi pali nni no, ke wan janbi Jesu.

³ Jesu wani o ba den bani ke Baa U Tienu dini o li bali ke o die li bonla kuli, ki go bani ke o den ñani U Tienu kani ki baa guani ki gedi U Tienu kani.

⁴ O den fii u saajekaanu kani, ki landi o tiadi, ki taa li cabili ki ñagini o ciaga.

⁵ Lani, o den kuodi mi ñima ku tadigu nni, ki cili ki nigidi o ŋoadikaaba taana, ki duuni a leni o cabiñaginkaali.

⁶ O den pundi Simon Pieli kani, ke o buali o: «N Daano, fine n nigidi n taana?»

⁷ Jesu den guani ki yedi o: «A daa bani min tiendi yaala moala, ama li yaa yeni waamu, a baa bandi.»

⁸ Pieli den yedi o: «N kan tuo ŋan nigidi n taana abada.» Jesu den guani ki yedi o: «N yàá nigidi a taana, ŋaa taa leni nni.»

⁹ Simon Pieli den yedi o: «N Daano, da nigidi n taana bebe ka, n nii leni n yuli kuli.»

¹⁰ Jesu den yedi o: «Yua n wali, waa go bua ki wali, kali wan nigidi o taana ki yaa ŋani cain. Yi ŋani, ama yikuli ka.»

¹¹ Jesu den bani yua n baa janbi o, lani yaa po ke o yedi: «Yikuli ka ŋani.»

¹² Wan den nigidi bi taana ki gbeni, ki go lani o tiadi ki guani ki kali u saajekaanu kani, o den yedi ba: «Naani yi faami min tieni yi po yaala ne?

¹³ Yi yini nni yi Canbaa leni yi Daano. Yi maadi moamoani, kelima n tie yeni lige.

¹⁴ To, mini yua n tie yi Daano leni yi Canbaa n nigidi yi taana yeni, li pundi ke yimo n yaa nigidi yiyaba taana.

¹⁵ N ŋaa yi po bontogidikaale, ke yimo n yaa tiendi nani min tieni yi po maama yeni.

¹⁶ N yedi yi i moamoani, o naacemo kan cie o canbaa, o tondo mo kan cie yua n soani o.

¹⁷ Yi yaa bani lani ki tiendi la, yi pia li pamanli.

¹⁸ Mii maadi yeni ki bagi yikuli ka. N bani min gandi yaaba. Ama tiladi, li baa tieni nani lan diani i Diani nni maama na: ‹Yua n taa ki di leni nni, lugidi nni u danbu.›

¹⁹ N tuodi ki wangi yi yaala n baa tieni hali ke li daa tieni, ke li yaa ti tieni yaa yogunu, yin daani ke N Ye.

²⁰ N yedi yi i moamoani, yua n gaa n tondo cangu kuli, o gaa mini n ba yaa cangu yo. Yua n gaa n cangu mo, gaa yua n soani nni yaagu yo.»

Jesu waani ba ke Judasis baa janbi o

²¹ Jesu n den maadi yeni, o yama den yagi. O den kadi ki yedi: «N yedi yi i moamoani, yi siiga yendo baa janbi nni.»

²² O ŋoadikaaba den diidi biyaba kaa bandi wan bagi yua.

²³ O ŋoadikaaba siiga, Jesu n den bua yua, den kpaagi ki kuu leni o.

²⁴ Lani, Simon Pieli den waani o o nuu ke wan buali Jesu wan maadi yua yaa maama.

²⁵ O den tabini Jesu ki buali o: «N Daano, ŋme yo?»

²⁶ Jesu den guani ki yedi o: «Min baa tali li saaboali ki teni yua, li tie wani.» O den tali li saaboali ki teni Simon Isikarioti bijua Judasi.

²⁷ Jesu n den teni o li yaa yogunu liga, Sutaani den kua o pali nni. Jesu den yedi o: «Ŋan baa tieni yaala, tieni la tontoni.»

²⁸ Yaaba n den taani ki ye u saajekaanu kani siiga, oba kuli ki den faami yaala yaa po ke Jesu yedi o yeni.

²⁹ Nani Judasi n den kubi bi ligiboagili yeni, bi tianba den tama ke Jesu yedi o: «Ŋan daa tin baa bua yaala kuli mi jaanma po,» yaa ka: «Ŋan ñani i ligi ki pa a luoda.»

³⁰ Judasi n den gaa li saaboali, lanyogunu liga, o den ñani. Ku ñiagu den bii.

Mi mabilikapanma

³¹ Judasi n den ñani, Jesu den yedi: «Moala o Joa Bijua baa ti kpiagidi. U Tienu mo baa ti kpiagidi kelima o po.

³² U Tienu yaa baa ti kpiagidi kelima o Bijua po, omo baa teni wan baa ti kpiagidi o yaa kani. O baa kpiagi o ke li kan waagi.

³³ N bibuadimu, n go baa yaa ye leni yi yogunu waamu bebe po. Yi baa lingi nni, ama n wangi yinba moko moala, nani min den waani Jufinba maama, ke yi kan fidi ki gedi min caa naankani.

³⁴ N bili yi po yaa mabilikapanma n tie ne: Yin yaa bua mani yiyaba. Nani min bua yi maama, Yimoko n bua yiyaba yeni.

³⁵ Yi yaa bua yiyaba, lani n baa teni bi niba kuli n bandi ke yi tie n ŋoadikaaba.»

Pieli baa ti nia ke waa bani Jesu

³⁶ Simon Pieli den buali o: «N Daano, a caa le?» Jesu den guani ki yedi o: «A kan fidi ki ŋoadi nni min caa naani moala, ama a baa ti yuandi ki ŋoadi nni.»

³⁷ Pieli den buali o: «N Daano, be yaa po ke n kan fidi ki ŋoadi a moala? Ba li yaa tie n miali ñama, n ye.»

³⁸ Jesu den guani ki yedi o: «Ba li yaa tie a miali ñama, a ye moamoani? N yedi a i moamoani, hali ke ku kootongu daa mua, a baa nia taalimitaa ke ŋaa bani nni.