Jan n diani U Tienu Laabaaliŋamo maama 12 - U TIENU MAAMA TILI 2013

Mariyama wuli tulale Jesu taana po

¹ Lan den sieni danaluoba mi Pendima jaanma n pundi, Jesu den gedi Betani, Lasari, wan den fiini yua bi tinkpiba siiga, n ye yaa dogu nni.

² Bi den ŋanbi o po mi jiema likani. Marti den tendi ba mi jiema. Lasari den tie yaaba n kaa ki di leni Jesu siiga yendo.

³ Mariyama den taa yaa tulale n yi naari, kilo boagidima, ke o dunga yabi boncianla, ki wuli Jesu taana po, ki duuni a leni o yudi. Tulale yeni nuulu den yadi ki gbieni li dieli kuli.

⁴ Judasi Isikarioti, Jesu ŋoadikaaba siiga yendo, yua n baa ti janbi o, den yedi:

⁵ «Be yaa po ke baa kuadi tulale yeni ki gaa kujapiena kobitaa, ki puni a luoda?»

⁶ Wan den maadi yeni, laa tie ke o bua a luoda ka, li tie ke o den tie suudo. O den kubi bi ligiboagili ki yen ñandi o yuli po ban ŋu yaala lienni.

⁷ Jesu den yedi: «Ŋan cedi o. O kubi laa tulale n piinma daali po.

⁸ Yi baa yaa pia a luoda yi siiga yogunu kuli, ama yi kaa pia mini yaa yogunu kuli.»

Jufinba juogi ki baa kpa Lasari

⁹ Jufinba siiga yaa niligu n yabi n den gbadi ke Jesu ye Betani yeni, bi den cua likani. Baa den cua Jesu wani o ba bebe po ka, ama bi go den bua ki le Lasari, wan den fiini yua bi tinkpiba siiga.

¹⁰ Lanwani, bi kopadicianba yudanba den jagi ki bili ke bi baa kpa Lasari moko,

¹¹ kelima Jufinba boncianla den ŋaa ba, ki tuo ki daani Jesu, kelima wani Lasari po.

Jesu kua Jerusalemi

¹² Lan den fii ki faa, yaa niligu n den cua ki baa jaani mi jaanma den bandi ke Jesu kpendi Jerusalemi.

¹³ Bi den pedi i kpakpa-bensoangi, ki ñani ki tuogi o ki kpaani ki tua: «Ti pagi U Tienu. U Tienu n seligi yua n kpendi wani o Diedo yeli nni, Isidayeli bado.»

¹⁴ Jesu den laa li ŋunbisaagili, ki jagini li nani i Diani n yedi maama:

¹⁵ «Yinba Siyon dogu yaaba, da jie mani, Diidi ki le, yi bado kpendi na, Ki jagi li ŋunbisaagili.»

¹⁶ Jesu ŋoadikaaba naa den cili ki faami yaala n tieni yeni po. Ama Jesu n den baa ti kpiagidi yaa yogunu, bi den tiadi ke laa bonla kuli den diani ki maadi o po. Lanwani, bi den sua ke man den yedi o po yaala den kua.

¹⁷ Li den sua ke yaa niligu n ye Jesu kani wan den yini Lasari ke o ñani li takuli nni, ki fiini o bi tinkpiba siiga yaa yogunu, den tiendi lipo siedi ki yadi li laabaalo.

¹⁸ Li tie lani yaa po ke ku niligu den ñani ki tuogi o, kelima bi den gbadi ke o tieni laa bancianma.

¹⁹ Lani yaa po, Farisieninba den yedi biyaba: «Diidi ki le, yin tiendi yaala kuli, yi baa gbali, kelima ŋanduna kuli ŋoadi o.»

Girekinba tianba lingi Jesu

²⁰ Yaaba n den cua ki baa kpiagidi U Tienu mi jaanma yeni yogunu siiga, bi tianba den tie Girekinba.

²¹ Bi den cua Filipi kani, yua n tie Galile diema yaa Betisayida dogu yua, ki yedi o: «Canbaa, ti bua ki le Jesu.»

²² Filipi den gedi ki waani Andre, ke Andre leni Filipi kuli den yegi ki gedi ki waani Jesu.

²³ Jesu den guani ki yedi ba: «O Joa Bijua n baa baa ti kpiagidi yaa yogunu pundi.

²⁴ N yedi yi i moamoani, mi dibima yàá kua ki tinga nni ki kpe, mi baa yaa ye mi bebe lige. Ama mi yaa kpe, mi baa luoni yaa bonbii n yabi.

²⁵ Yua n bua o miali baa bolini li. Ama yua n nani o miali ŋanduna nni na, baa yaa pia li, yaa miali n kan gbeni po.

²⁶ O nilo yaa tuuni n po, wan yaa ŋua nni. Min baa yaa ye naani, wani n naacemo mo baa yaa ye lankane. Yua n tuuni n po kuli, n Baa baa jigini o.

Jesu maadi o kuuma maama

²⁷ Moala n yama yagi. Naani n baa yedi: ‹N Baa, faabi nni leni u naa yogunu fala? Ama li nan tie laa fala po ke n cua ki ye hali moala.

²⁸ N Baa, teni a yeli n baa ti kpiagidi.› » Lani, u nialu den maadi hali tanpoli po, ki yedi: «N teni ke li baa ti kpiagidi no, n go baa teni lin baa ti kpiagidi ki pugini.»

²⁹ Yaa niligu n den se likani ki gbadi u nialu yeni, bine den yedi ke ki taaga duni, bine mo ke maleki n maadi leni o.

³⁰ Jesu den yedi ba: «Laa tie mini yaa po ka ke u naa nialu maadi, ama li tie yi yaa po yo.

³¹ Moala ŋanduna buudi baa jia ki kadi. Moala, bi baa deli ki ñani ŋanduna bado.

³² Bi yaa fiini nni ki tinga po, n baa dadi bi niba kuli yama ban cua n kani.»

³³ Jesu den maadi yeni ki doagidi wan baa kpe yaa kuume.

³⁴ Ku niligu den guani ki yedi o: «Ti gbadi U Tienu bali maama nni ke U Tienu n Gandi Yua n baa yaa ye hali yaa yogunu kuli. Be yaa po ke fini yedi ke li tie tiladi ban fiini o Joa Bijua. O Joa Bijua yeni, tie ŋme yo?»

³⁵ Jesu den guani ki yedi ba: «Mi yenma da baa yaa ye yi siiga u yogunu waamu po. Yin yaa cuoni mani hali yin pia mi yenma yaa yogunu kuli, ke li biigili n da ludi yi. Yua n cuoni li biigili nni naa bani wan caa naani.

³⁶ Hali ke yi da pia mi yenma, yin dugi laa yenma po, ke yin tua mi yenma yaaba.» Jesu n den maadi lani, o den ñani bi kani ki ban wuoni.

Jufinba naa daani Jesu

³⁷ Ba ke o den tieni yaa bancianma n yabi bi kani, baa den tuo ki daani o.

³⁸ Li den tua yeni ke o saawalipualo Esayi n maadi yaa maama na n tieni: «O Diedo, ŋme daani ti maama? Fini o Diedo nuu paalu doagidi ŋme yaa po?»

³⁹ Baa den fidi ki daani Jesu nani Esayi n go maadi maama:

⁴⁰ «U Tienu juani bi nuni, Ki juagi bi pala, Ke ban da le leni bi nuni, Ki da gaa leni bi pala, Ke ban da ti lebidi ki ŋaa bi tuonbiadi, Min paagi ba.»

⁴¹ Esayi den maadi lani kelima o den laa Jesu kpiagidi ki maadi o maama.

⁴² Ba leni lani kuli, Jufinba yudanba siiga boncianla den tuo ki daani Jesu, ama baa den tuo ki doagidi ke bi ŋoadi o, kelima Farisieninba po. Bi den jie ban da deli ki ñani ba li bali maama bangima diena nni.

⁴³ Bi den tieni yeni, kelima bi den bua bi niba pagidi ki cie U Tienu yaadi.

Jesu maama baa jia bi niba buudi

⁴⁴ Jesu den kpaani: «Yua n daani nni, waa daani mini bebe ka, o daani yua n soani nni moko.

⁴⁵ Yua n nua nni, laa yua n soani nni.

⁴⁶ Mini n tie mi yenma, ki cua ŋanduna nni ke yua n daani nni kuli n da go ye li biigili nni.

⁴⁷ Yua n gbadi n maama, ki naa kubi ma kuli, mini ka bu leni o. Mii cua ki baa bu leni ŋanduna yaaba ka. Ama n cua ki baa faabi ba.

⁴⁸ Yua n yie nni kaa gaa n maama kuli, pia o bujialo. Min den maadi yaa maama yeni, mani n baa bu leni o li juodidaali.

⁴⁹ Mii maadi n yuli bali po ka, Baa U Tienu yua n soani nni, wani n bili n po min baa yedi yaa maama leni min baa maadi ma maama.

⁵⁰ N bani ke o mabilikaama yeni tie yaa miali n kan gbeni. Lani yaa po, min maadi yaa maama kuli tie Baa U Tienu n waani nni min maadi yaame.»