Jan n diani U Tienu Laabaaliŋamo maama 11 - U TIENU MAAMA TILI 2013

Lasari kuuma

¹ Niyendo den ye ki yia ke bi yi o Lasari. O den tie Betani yua. Betani yeni den tie Mariyama leni o naataanpuoga Marti dogu.

² (Laa Mariyama tie yua n den wuli Jesu taana po tulale, ki duuni a leni o yudi.) Lasari yua n den yia den tie o naataanjaga.

³ A naataanpola yeni den soani u tondu Jesu kani, ki yedi o: «Ti Daano, a buado yia.»

⁴ Jesu n den gbadi lani, o den yedi: «Laa yianu kan tua kuuma, ama u baa cuani U Tienu kpiagide. U Tienu Bijua moko baa baa ti kpiagidi kelima u yaa po.»

⁵ Jesu den bua Marti, o waalo leni Lasari kuli.

⁶ Wan den gbadi ke Lasari yia, o go den tieni danalie wan ye naani.

⁷ Lani n pendi, o den yedi o ŋoadikaaba: «Tin guani ki gedi Jude.»

⁸ O ŋoadikaaba den yedi o: «Canbaa, laa waagi ke Jufinba den bua ki lugidi a a tana likani. Moala, a go baa guani ki gedi lipo?»

⁹ Jesu den guani ki yedi ba: «Yentunmunli kuli pia piiga n leedolie ka? Yua n cuoni li yentunli nni kuli kan yaa tuudi, kelima o nua ŋanduna yenma.

¹⁰ Ama yua n cuoni ku ñiagu kuli baa yaa tuudi, kelima mi yenma ki ye o niinni.»

¹¹ Jesu n den maadi lani, o go den yedi ba: «Ti danli Lasari goa. N baa gedi ki ban fundi o.»

¹² O ŋoadikaaba den yedi o: «Ti Daano, o yaa goa yo wani, laafia baa tieni.»

¹³ Jesu den maadi o kuuma maama, ama o ŋoadikaaba den tama ke o maadi mi fuodima guama.

¹⁴ Lane Jesu den kadi ki waani ba: «Lasari kpe.

¹⁵ N pali mani ke mii den ye lipo, kelima yi yaa po, ke yin daani nni. Tin fii mani ki gedi o po.»

¹⁶ Lanwani, Toma, ban go yi yua ku poligu, den yedi o ŋoadikalieba: «Ti mo n gedi mani ki ban taani ki kpe leni o.»

Jesu n tie bi tinkpiba fiima leni li miali

¹⁷ Jesu den pundi likani ki sua ke Lasari ye li takuli nni, ke li pundi dananaa.

¹⁸ Li sua ke Betani kuu leni Jerusalemi kilo dajenataa,

¹⁹ ke Jufinba boncianla den cua Marti leni Mariyama kani, ki baa baagi ba kelima bi naataanjaga kuuma po.

²⁰ Marti n den gbadi ke Jesu kpendi, o den ñani ki tuogi o. Ama Mariyama den kaa li dieli nni.

²¹ Marti den yedi Jesu: «N Daano, a yaa den ye ne, n naataanjaga kan den kpe.

²² Ama n bani ke ba moala, ŋan baa mia U Tienu yaala kuli, o baa pa ŋa la.»

²³ Jesu den yedi o: «A naataanjaga baa fii bi tinkpiba siiga.»

²⁴ Marti den guani ki yedi o: «N bani ke o baa fii, bi tinkpiba kuli n baa fii ŋanduna juodima daali yaa fiima.»

²⁵ Jesu den yedi o: «Mini n tie bi tinkpiba fiima leni li miali. Yua n daani nni, ba o yaa kpe, o baa yaa fo.

²⁶ Yua n fo ki daani nni kan kpe abada. Naani a dugi mi naa maama po?»

²⁷ Marti den yedi o: «Mm, n Daano, n daani ke a tie U Tienu n Gandi Yua, U Tienu Bijua, yua n den baa cua ŋanduna nni.»

Jesu den buudi

²⁸ Wan den yedi yeni, o den gedi ki ban yini o waalo Mariyama ŋasiili nni, ki yedi o: «Canbaa cua. O yi ŋa.»

²⁹ Mariyama n den gbadi, o den fii tontoni ki gedi Jesu po.

³⁰ Li sua ke Jesu daa kua u dogu tugu nni. O da den li ye Marti n den tuogi o naankane.

³¹ Yaa Jufinba n den ye leni Mariyama li dieli nni ki baagi o, n den laa ke o fii tontoni ki ñani yeni, bimoko den fii ki ŋoadi o, kelima bi den tama ke o caa li takuli po ki baa n buude.

³² Mariyama n den pundi Jesu n ye naani ki laa o, o den gbaani o taana kani ki yedi o: «N Daano, a yaa den ye ne, n naataanjaga kan den kpe.»

³³ Jesu n den laa o ke o buudi, ke yaa Jufinba n yegi leni o moko buudi, li paboancianli den cuo, ke o fuo ki jiini.

³⁴ O den buali ba: «Yi piini o le?» Bi den yedi o: «Canbaa, cua ki ban le.»

³⁵ Jesu den buudi.

³⁶ Lani yaa po, Jufinba den yedi: «Diidi ki le mani wan den bua o maama.»

³⁷ Bi siiga nni bi tianba den yedi: «Wani yua n den teni o juamo noadi, naani o kan den fidi ki teni Lasari n da kpe?»

Jesu fiini Lasari bi tinkpiba siiga

³⁸ Li paboanli go den cuo Jesu ke o fuo ki jiini. O den pundi li takuli kani. Li takuli yeni den tie tanlongu, ke ku tanpabigu bii bu ñoabu.

³⁹ Jesu den yedi: «Biidi mani ku tanpabigu ne!» Marti, yua n kpe naataanpuoga den yedi o: «N Daano, moala o baa nuugi, kelima hali ban piini o, dinla n tie dananaa.»

⁴⁰ Jesu den yedi o: «Mii yedi a ke a yaa daani, ke a baa le U Tienu kpiagidi?»

⁴¹ Lani, bi den biidi ku tanpabigu. Jesu den yaadi ki nuali tanpoli ki yedi: «N Baa, n tuondi a ke a cengi n maama.

⁴² N bani ke a cengi n maama yogunu kuli, ama n yedi yeni, kelima yaa niligu n lindi nni ne yaa po. Yeni bi baa daani ke fini n soani nni.»

⁴³ Wan den jaandi yeni, o den kpedi o nialu ki kpaani: «Lasari, ña na!»

⁴⁴ Yua n den kpe yeni den ñani, ke o nii leni o taana kuli fini fini a caba, ke li cabili pini o nunga mo. Jesu den yedi: «Findi findi o mani ki cedi wan gedi!»

Bi cancantieba juogi ke bi baa kpa Jesu

⁴⁵ Yaa Jufinba n den cua Mariyama kani ki laa Jesu n tieni yaala yeni siiga, boncianla den tuo ki daani Jesu.

⁴⁶ Ama bi siiga bi tianba mo den gedi Farisieninba kani, ki waani ba wan tieni yaala.

⁴⁷ Lanwani, bi kopadicianba yudanba leni Farisieninba den taani bi cancantieba, ki yedi: «Ti baa tieni be? Laa nilo tiendi mi bancianma boncianla.

⁴⁸ Ti yaa cedi o ke o tiendi yeni ki pugidi, bi niba kuli baa tuo ki daani o. Yeni mo, Loma yaaba baa ti cua ki bolini ti kaangagidiŋamu leni ti buolu.»

⁴⁹ Bi siiga nni yendo, yua n yi Kayifa ki tie bi kopadicianba bado laa binli, den yedi ba: «Yii bani liba.

⁵⁰ Yii kpaagi ki sua ke li baa yaa ŋani yi po, niyendo n kpe ti buolu kuli po yo? Lani n baa yaa cie ti buolu kuli n bodi.»

⁵¹ Waa den maadi laa maama o yama po ka, ama wan tie bi kopadicianba bado laa binli yeni, n teni ke o den pua saawali, ke Jesu baa kpe bani Jufinba buolu kuli po.

⁵² Laa tie Jufinba buolu po bebe ka, ama o kuuma baa taani U Tienu bila yaaba n yadi yadi i kaani kuli, ban taani ki tua yenma.

⁵³ Ki cili landaali, bi den jagi ki bili ki baa teni ban kpa o.

⁵⁴ Lani yaa po, Jesu den cedi kaa go goadi Jufinba siiga. O den ñani likani ki gedi yaa kaanu n kuu leni mi fanpienma, ban yi yaa dogu Efrayimi. O den kali lipo, wani leni o ŋoadikaaba.

⁵⁵ Jufinba Pendima jaanma n go den nagidi, bi niba boncianla den ñani i dogi nni ki gedi Jerusalemi, ki baa ŋanbi biba hali ke mi Pendima jaanma daa pundi.

⁵⁶ Bi den lingi Jesu. Ban den ye U Tienu diegu nni, bi den tua biyaba: «Yi tama be? O nan ko baa tuo ki cua mi jaanma na bi?»

⁵⁷ Li sua ke bi kopadicianba yudanba leni Farisieninba den ñani li ñoamabonli, ke yua n bani Jesu n ye naani, wan teni ban bandi, ban fidi ki cuo o.