Jan n diani U Tienu Laabaaliŋamo maama 10 - U TIENU MAAMA TILI 2013

O yankpaaŋamo leni o pe

¹ N yedi yi i moamoani, yua n ki tagini bu buliñoabu kani ki kua li yanloli nni, ama ki doni kaanto yo ki kua, tie suudo leni sanjialo.

² Ama yua n tagini bu buliñoabu ki kua li yanloli nni, tie i pe yankpaalo.

³ O jiidika luodi o po, i pe mo cengi o nialu. O yini wan die yaa pe, yuakuli leni o yeli, ki ñani ba.

⁴ O yaa ñani wan die yaa pe kuli, o baa kua bi liiga, ban yaa ŋua o, kelima bi bani o nialu.

⁵ Bi kan ŋoadi caano, ama bi baa sani ki ŋaa o, kelima baa bani bi canba niali.»

⁶ Jesu den pua ba laa kpanjama, ama baa den bandi wan maadi ba yaala.

Jesu tie o yankpaaŋamo

⁷ Jesu go den yedi ba: «N yedi yi i moamoani, mini n tie bu buliñoabu i pe po.

⁸ Yaaba n den cua ke n daa cua kuli, tie suuda leni sanjiaba, ama i pe ki den cengi ba.

⁹ Mini n tie bu buliñoabu. Yua n tagini n yaa kani ki kua kuli, baa faabi. O baa kua ki ña, ki go yaa baadi mi jiema.

¹⁰ O suudo kpendi ki baa su, ki kpa, ki go bolini i pe. Mini n cua, ke ban baa li miali, ki yaa pia li ke li dua bi po.

¹¹ Mini n tie o yankpaaŋamo. O yankpaaŋamo puuni o miali o pe po.

¹² Ama yua n tie naacemo kaa tie i pe kpaalo, ki naa die ba yaa laa ke o fuasangbanlo kpendi, o baa sani ki ŋaa i pe. O fuasangbanlo baa cuo bi tianba, ki yadi yaaba n sieni.

¹³ O naacemo baa sani kelima o tie naacemo, waa yagini o yama i pe po.

¹⁴ Mini n tie o yankpaaŋamo. N bani n pe, n pe mo bani nni,

¹⁵ nani n Baa n bani nni ke nmo bani o maama yeni. N puni n miali n pe po.

¹⁶ N go pia yaa pe n kaa ye li naa yanloli nni. Li tie tiladi min cuani bani moko. Bimoko baa cengi n nialu. Lani, n pe kuli baa taani ki tua yangoyenli, ki yaa pia yankpaayendo.

¹⁷ N Baa bua nni, kelima n puni n miali ki go baa ti gaa li.

¹⁸ Oba kuli kan fie nni li, n puni li n yama po yo. N pia li bali ki pa li, ki go pia li bali ki gaa li. Lani n tie n Baa n den teni nni yaa ñoamabonli.»

¹⁹ Mi paadima go den tieni Jufinba siiga, kelima laa maama po.

²⁰ Bi siiga nni niba boncianla den tua: «O pia ki cicibiadiga. O gaadi. Be yaa po ke yi cengi o?»

²¹ Nitoaba mo den tua: «Yua n pia ki cicibiadiga kan yaa maadi mi naa maama. Naani ki cicibiadiga baa fidi ki teni a juama n noadi?»

Jufinba yie Jesu

²² Li den tie ku fawaagu yogunu, ke bi jaani yaa jaanma n yi U Tienu diegu gagidima jaanma Jerusalemi po.

²³ Jesu den cuoni U Tienu diegu nni Salomon janli kani.

²⁴ Jufinba den taani ki lindi o, ki yedi o: «Hali u laa yogunu ke a baa waani ti, ti yama n duani? A yaa tie U Tienu n Gandi Yua, ŋan kadi ki waani ti.»

²⁵ Jesu den guani ki yedi ba: «N den waani yi, ama yii daani n maama. Min tuuni yaa tuona n Baa yeli nni tiendi n po siedi.

²⁶ Ama yii daani, kelima yii tie min die yaa pe siiga nni yaaba.

²⁷ N pe cengi n nialu. N bani ba, bimo ŋua nni.

²⁸ N puuni ba yaa miali n kan gbeni. Bi kan bodi abada. Oba kuli kan fie ba n nuu nni mo.

²⁹ N Baa yua n den puni nni ba, cie yuakuli. Oba kuli kan fidi ki fie ba Baa nuu nni mo.

³⁰ Mini leni Baa tie yendo.»

³¹ Jufinba go den taa a tana ki baa lugidi o.

³² Jesu den yedi ba: «N den teni ke yi laa a tuonŋama boncianla, ya n ñani Baa kani. Li laa tuonli yaa po yo ke yi baa lugidi nni a tana?»

³³ Jufinba den guani ki yedi o: «Ti kan lugidi a a tana kelima tuonŋanliba po ka. Li tie ke a sugidi U Tienu, kelima fini yua n tie nisaalo tua ke a tie U Tienu.»

³⁴ Jesu den guani ki yedi ba: «Laa diani yi bali maama nni ki yedi: ‹N yedi ke yi tie tieni?›

³⁵ Li bali maama yi U Tienu n yini yaaba tieni, ke ba li bali maama mo kan lebidi.

³⁶ Li gaa lede ke yi yedi ke n sugi U Tienu, kelima n yedi ke n tie U Tienu Bijua, mini U Tienu yua n tie ti Baa n gandi ki gagidi yua, ki soani nni ŋanduna nni?

³⁷ N yàá tuuni n Baa tuona, yin da daani n maama.

³⁸ Ama n yaa tuuni o tuona, ba ke yii daani n maama, daani mani kelima min tuuni yaa tuona po, ke yin bandi bonŋanla ke Baa ye n niinni, ke nmo ye Baa niinni.»

³⁹ Bi go den lingi ki baa cuo o, ama o den cia.

⁴⁰ Lani, Jesu go den gedi Jurden kpenu kandima, Jan n den kpa batisi bi niba naankani, ki kali likani.

⁴¹ Bi niba boncianla den cua o kani. Bi den tua: «Jan ki den tieni bancianmiba. Ama wan den maadi yaa maama o naa joa po kuli, tie moamoani.»

⁴² Bi niba boncianla den daani o likani.