Jan n diani U Tienu Laabaaliŋamo maama 1 - U TIENU MAAMA TILI 2013

Jesu n tie yua leni o tuonli 1—12 Jesu n tie mi Maama

¹ Hali mi cilima, mi Maama den ye. Mi Maama den ye leni U Tienu. Mi Maama yeni den tie U Tienu.

² Mi den ye leni U Tienu hali mi cilima.

³ Mi Maama yeni den tagi li bonla kuli. Liba kuli ki ye, kaa tie mi Maama n tagi yaala.

⁴ Li miali den ye mi niinni, li miali yeni den tie mi yenma bi nisaaliba po.

⁵ Mi yenma yeni yendi li biigili nni, ama li biigili ki gaa ma.

⁶ U Tienu den soani niyendo ke o yi Jan.

⁷ O den cua ki tie siedi, ki baa yaa tiendi siedi mi yenma po, ke bi niba kuli n daani kelima o po.

⁸ Wani o ba ki den tie laa yenma, ama o den cua ki baa yaa tiendi siedi mi yenma yeni po.

⁹ Mi den tie mi yenmoanma, yaama n cua ŋanduna nni, ki yendi nisaalo kuli po.

¹⁰ Mi Maama yeni den ye ŋanduna nni, mani n den tagi ŋanduna, ama ŋanduna ki den bandi ma.

¹¹ Mi Maama den cua mi yaaba siiga, ama mi yaaba ki den tuo ki gaa ma.

¹² Ama yaaba n tuo ki gaa ma kuli, ki daani mi yeli nni, mi dini ba li bali ke bi tua U Tienu bila.

¹³ Ban tua U Tienu bila yeni, laa tie nani nisaalo n mali maama ka. Laa ŋoadi ti gbanandi yanbuama. Laa didi ŋoadi nisaalo yanbuama mo. Ama li tie U Tienu yaa yanbuama po yo.

¹⁴ Mi Maama yeni den tua nisaalo, ki ye ti siiga. Ti den laa wani ki Bonjayenyenga yeni, yua n gbie leni li ŋanbili leni i moamoani kpiagidi. O den baa laa kpiagidi Baa kani.

¹⁵ Jan den tieni o po siedi ki kpaani: «Wani n tie min maadi yua yaa maama ki yedi: ‹Yua n baa yuandi ki cua n puoli cie nni, kelima o den ye hali ke n daa ye.› »

¹⁶ Tikuli baa o ŋanbili ŋalimano, ki baadi la ki pugidi pugidi.

¹⁷ Musa den cuani li bali maama, ama li ŋanbili leni i moamoani cua kelima Jesu Kilisiti yaa po.

¹⁸ Oba kuli daa laa U Tienu. Ama ki Bonjayenyenga, yua n tie U Tienu ki ye Baa kani yogunu kuli, n teni ke ti bandi o.

Jan Batisi n tieni Jesu po yaa siedi

¹⁹ Line n tie Jan n den tieni yaa siedi. Jufinba yaaba n ye Jerusalemi den soani bi kopadicianba leni Levi buolu Jan kani, ki buali o: «A tie ŋme?»

²⁰ O den tieni bi po siedi ki tuo, kaa yie. O den yedi: «Mii tie U Tienu n Gandi Yua.»

²¹ Bi go den buali o: «Lanwani, a nan tie ŋme yo? Naani a tie Eli yo?» O den yedi: «Mii tie wani ba.» Bi go den buali o: «Naani a tie saawalipuale?» O den yedi: «Aa-a.»

²² Lanwani, bi den yedi o: «A nan tie ŋme yo? Ŋan waani ti tin ban waani yaaba n soani ti. A yedi a yuli po be?»

²³ O den yedi ke o tie: «Yua n kpaani mi fanpienma nni ki tua: ‹Naadi mani o Diedo sanu,› » Nani Esayi den yedi maama.

²⁴ Ban den soani yaaba yeni den tie Farisieninba.

²⁵ Bi go den buali o: «A yàá tie U Tienu n Gandi Yua, ki naa tie Eli, ki naa tie o saawalipualo, be yaa po ke a batisi bi niba?»

²⁶ Jan den guani ki yedi ba: «N batisi bi niba leni mi ñima, ama o nilo ye yi siiga ke yii bani o. O baa cua n puoli.

²⁷ Mii pundi ba yua n baa lodi o cacaagbansiama.»

²⁸ Lani kuli den tieni Betani, u kpenu Jurden kandima, Jan n den batisi bi niba naankani.

Jesu U Tienu Pebiga

²⁹ Lan den fii ki faa, Jan den laa Jesu ke o kpendi o kani, ki yedi: «Diidi mani U Tienu Pebiga, yua n ñandi ŋanduna tuonbiadi.

³⁰ Wani n tie min den maadi yua yaa maama ki tua: ‹O nilo baa cua n puoli, o cie nni, kelima o den ye hali ke n daa ye.›

³¹ Mii den bani wan tie yua, ama n cua ki batisi bi niba leni mi ñima, ke wan doagidi Isidayeli yaaba po.»

³² Jan go den tieni yaa siedi n tie ne: «N den laa ke U Tienu Fuoma Yua ñani tanpoli ki jiidi nani ki kpaajiega yeni, ki jagini o po.

³³ N daa den bani wan tie yua, ama yua n den soani nni, ke min batisi bi niba leni mi ñima den yedi nni: ‹Ŋan baa le ke U Tienu Fuoma Yua jiidi ki jagini yua yaa po, wani n baa batisi bi niba leni U Tienu Fuoma Yua.›

³⁴ N den laa, ki tieni siedi ke wani n tie U Tienu Bijua.»

Jesu ŋoadikakpiaba

³⁵ Lan go den fii ki faa, Jan den ye likani leni o ŋoadikaaba siiga nibilie.

³⁶ O den laa Jesu ke o cuoni ki yedi: «Diidi mani U Tienu Pebiga.»

³⁷ Jan ŋoadikaliediba yeni den gbadi wan yedi yaala, ki ŋoadi Jesu.

³⁸ Jesu n den jigidi ki sua ke bi ŋua o, o den buali ba: «Yi lingi be?» Bi den guani ki yedi o: «Rabi, lani n bua yedi: “Canbaa”, a denpo ye le?»

³⁹ O den yedi ba: «Cua mani ki ban le.» Li den tie u yienu n soangi yaa yogunu. Bi den gedi ki ban laa o deni n ye naani, ki juadi o kani.

⁴⁰ Yaa niliediba n den gbadi Jan maama ki ŋoadi Jesu yeni siiga, yendo den tie Simon Pieli waalo Andre.

⁴¹ O den jaligi ki tuogi o kpelo Simon ki yedi o: «Ti laa U Tienu n Gandi Yua, lani n bua ki yedi Kilisiti.»

⁴² O den gedini o Jesu kani. Jesu den nuali o ki yedi: «A tie Simon, Jan bijua. Moala a ji baa yaa yi Sefa.» Lani n bua ki yedi “Tanli.”

Filipi leni Natanayeli

⁴³ Lan den fii ki faa, Jesu den jagi ke o baa gedi Galile. O den tuogi Filipi ki yedi o: «Ŋoadi nni.»

⁴⁴ Filipi yeni den tie Betisayida yua, Andre leni Pieli n ñani yaa dogu.

⁴⁵ Filipi den tuogi Natanayeli ki yedi o: «Ti laa ban maadi yua yaa maama, Musa n den diani yua yaa po li bali maama nni leni bi saawalipuaba n den diani yua po, lani n tie Jesu, Nasareti yua Josefi bijua.»

⁴⁶ Natanayeli den buali o: «Naani yaala n ŋani baa fidi ki ña Nasareti dogu nni?» Filipi den yedi o: «Cua na, ki ban le!»

⁴⁷ Jesu n den laa Natanayeli ke o kpendi o kani, o den yedi: «Diidi, yua n kpendi na tie Isidayeli buolu yua moamoani, waa pia boandiba kuli o pali nni.»

⁴⁸ Natanayeli den buali o: «A gaa lede ki bani nni?» Jesu den guani ki yedi o: «Hali ke Filipi daa yini a, ŋan bi ye bu kankanbu tinga, n bi nua ŋa.»

⁴⁹ Natanayeli den guani ki yedi o: «Rabi, fini n tie U Tienu Bijua, fini n tie Isidayeli yaaba Bado.»

⁵⁰ Jesu den yedi o: «Li tie ke n yedi a ke n bi laa ŋa bu kankanbu kane, ke a daani. A baa le yaala n cie line.»

⁵¹ O go den yedi: «N yedi yi i moamoani yi baa le ke tanpoli luodi, ke U Tienu malekinba do tanpoli ki go jii o Joa Bijua po.»