Jeremi Bubula 5 - U TIENU MAAMA TILI 2013

Bi mia ke U Tienu n gbadi bi ninñima 5 O Diedo, teni tin guani a kani

¹ O Diedo, tiadi yaala n tieni ti! Diidi ki le ti fe!

² Bi canba gaa ti faali. Ti diedi mo tua bi nilanba yaade.

³ Ti kpandi ki tua kpienbila, Ti naanba mo tua kpepuona.

⁴ Ti ñima, ti baa da ma yo ki ño. Ti daadi moko, ti baa daa ti yo ki kuuni.

⁵ Ti yibalinba fii ki sedi ti po. Bi coagi ti hali boncianla, Baa puni ti fuodima ba waamu.

⁶ Li den tie tiladi yo tin gedi Ejipiti Leni Asiiri ki ban mia mi jiema.

⁷ Ti baanba den tudi, ama bi naa go ye. Tinba n ji tugi bi tagili.

⁸ I yonbi n die ti. Oba kuli mo ki ye ki baa faabi ti bi nuu nni.

⁹ Ti jiema baama ki tie faala bonla, Li tie yaala n baa fidi ki ñani ti miali, Kelima mi fanpienma sanjiaba po.

¹⁰ Ti gbanandi siage nani ki buaga yeni, Kelima mi koma n bia maama po.

¹¹ Bi ñii bi puoba leni u paalu Siyon dogu nni, Ki ñiigi bi jafanba Juda dogi nni.

¹² Bi soadi a koanbala leni bi nii. Baa jigindi a nikpela.

¹³ Bi nipanba tugi li naali, Ke bi jawaaba mo tuudi ki baali ti daadi nni.

¹⁴ A nikpela ki go taagi, Bi jawaaba mo ki go yiini.

¹⁵ Li pamanli ñani ti pala nni, Ti ciaga kpandi ki tua kuciaga.

¹⁶ Ki badifogiliga cibidi ti yuli po ki baa. Fala baa ti kelima ti tudi.

¹⁷ Lani n teni ke ti pali ye leni fala Ke ti nuni mo juani.

¹⁸ Siyon juali biidi. Lankane ke i coli ji goadi Ban bua maama!

¹⁹ Fini o Diedo yua n kaa Ti gbandi po yaa yogunu kuli, A bali baa waagi ki ye yogunu kuli.

²⁰ Li gaa lede ke a sundi ti po yogunu kuli, Naani a baa lu ki diani ti daali kuli po yo?

²¹ O Diedo, teni tin guani a kani, Lani, ti baa guani! Guani ki pandi ti dana nani u yogu nni yeni.

²² A li luni ti cain yo? Naani a pali li beni ti po hali ki duode?