Jeremi Bubula 4 - U TIENU MAAMA TILI 2013

Jerusalemi n biidi maama 4 Ban baa Jerusalemi dogu ki waani u yaa fala

¹ Jam, li gaa lede! Wula baa fidi ki joagini? Wulamoano ñuadi kpe! Li jaandieli tana yadi yadi i sani nni kuli.

² Siyon dogu yaaba, Yaaba n bi pia li mayuli boncianla, Li gaa lede ke bi ji nua ba nani O maado n maa yaa boba yeni?

³ Ba i tanboe tendi bi bila li biili. Ama n niba guani ki tua tugumoandanba, Nani mi fanpienma nni tataagu yeni.

⁴ U ñuñuunu teni ke ki canpandiga Lanbu tabi ki lanŋaandi nni. A biwaala miadi mi jiema, Ke oba mo ki puuni ba.

⁵ Yaaba n den di mi jemanma Ku mi koma po i sani nni. Yaa niba n fandi mi yemanma nni, Tungi bi nii ku tinbengu nni ki lingi liba.

⁶ N niba diema badisalo tagili cie, Sodomi dogu yaaba tuonbiadi, Yaaba n den ŋmadi ki baa yenma Ke niloba ki pieni ki luni ba.

⁷ O gobidikaaba pala den pieni ki cie a tatana, Ki go pieni ki cie mi naaŋanma. Bi gbananbili den ŋani ki go ñuliti, Ke bi go pia u fidu mo.

⁸ Ama moala bi nunmu gbidi. Bi kan go le ba i sani nni ki fidi bandi ba. Bi gbangu sani ki tabini bi kpaba, Ki kuodi nani ku daagu yeni.

⁹ Bu toabu n dini yaaba, Yaa yula mani ki cie mi koma n dini yaaba, Yaaba n dondi kelima li bonjekaala luoma po.

¹⁰ Diidi yaa puoba n tie ne, Ba ke bi gba mi ninñima, Bi taa bi bila ki ŋaani ba ki baa ŋmani, Mi yebiadima n ŋmaa n niba yaa yogunu.

¹¹ O Diedo teni ke o pabienli tuoni li bianu, O doagidi o pabiencianli. Siyon dogu nni o cuoni u mu, Yuu n dini u tanpuuna.

¹² Oba kuli, ki tinga badiba, Yaa niba n ye ŋanduna nni, Ki bi daani ke yibalinba kua Jerusalemi buliñoana kani.

¹³ Laa bonla tieni, Kelima o saawalipuaba tuonbiadi Leni o kopadicianba tagili po, Yaaba n den wuli bi niteginkaaba soama.

¹⁴ Bi tie juama yo ki puagi i sani nni. Mi soama joagini ba, Hali ke oba kan go fidi ki sii bi tiadi.

¹⁵ Bi den kpaani ki tua: «Yaa niba n joagini yeni, fuadi mani! Fuadi mani! Fuadi mani! Da sii ti mani!» Yaa yogunu ke bi tiini ki puagi I nibuoli siiga, bi tua bi po: «Bi kan go fidi ki yaa ye ti siiga.»

¹⁶ O Diedo wani o ba n yadi ba. Waa go bua ki le ba. Bi naa jigini bi kopadicianba, Ki buali ban miini bi yula a nikpela kani.

¹⁷ Tinba wani yaa nuni baa ki mua yo, Ki guu yaa todima n ki kpendi. Ti den waagi ki se ki guu Yaa nibuolu n baa cua ki kan fidi ga ti.

¹⁸ Bi den ŋua ki bolindi ti taaboe kuli, Ki baa yie ti po ke tin da go guani ti kaani po. Ti miana juodima nagini, ti dana tuoni! Yeni de! Ti kuuma nagini!

¹⁹ Ti yibalinba jaligi ki cie jiebaninba. Bi ŋua ki deli ti a juana po, Ki dia ti ti dadi mi fanpienma nni.

²⁰ Yua n den tie ti miali, o Diedo tondo yeni, Bi cuo o bi buodi nni, Tin den maadi yua yaa maama ki tua Ke o baa kubi ti tin yaa ye i nibuoli siiga yeni.

²¹ Edomi diema badisalo, mangi a pali, Fini yua n kaa Utisi diema nni. Amoko baa mubini ki tadiñokaaga Ki ño ki gaadi, Ki sedi mubima.

²² Fini Siyon dogu badisalo, A tagili gbeni. O kan go gedini a ti yonbidi. Edomi diema badisalo, O baa waani a tagili, Ki doagidi a tuonbiadi kuli.