Jeremi Bubula 3 - U TIENU MAAMA TILI 2013

Li paboanli leni mi suginma 3 Ba li pabiidicianli nni ti dugidi ye

¹ N tie yaa nilo n laa i fe Leni o Diedo pabienli gbiamu.

² O gobidi ki caani nni li biigili nni, Ama o naa caani nni mi yenma nni ka.

³ O Diedo fii ki sedi n po, Ki pua nni daali kuli.

⁴ O teni ke n gbanandi leni n gbangu kuli mali, O mudi n kpaba mo.

⁵ O teni ke n ye leni li paboanli, Ke n kan fidi ki cia. O bili n gaanilindima kuli, ti loabidi leni fala.

⁶ O teni ke n ye li biigili nni, Nani yaaba n kpe ke li waagi yeni.

⁷ O poali nni deeni ke min da ña. O loli nni leni i kugaali.

⁸ N kpaani ki mia o mi todima, Ama waa cengi min jaandi ki miadi o yaala.

⁹ O luoni n sanu leni a tana Ya n tie tangbenga, Ki bolini n sani.

¹⁰ O tie n po nani ki fuayanbiadiga ursi yua n wuo, Bi nani yaa yangbanlo n wuoni, Ki guu nni yeni.

¹¹ O teni ke n lagidi n sani, O cuo nni ki toadi toadi, Ki ŋaa nni leni li paboanli.

¹² O kpali o dabanli, Ki teli nni o piemu ki baa toa.

¹³ O toani n ciaga nni O luoli piemi kuli.

¹⁴ N kpandi ki tua n niba po laadi. Daali kuli n kpandi ki tua bi yani.

¹⁵ O teni ke n ye leni li paboanli hali boncianla, Ki ŋaa nni leni i yanbani.

¹⁶ O teni ke n ŋmani a tana leni n ñina, Ki guli nni ki fuli mi fantanpienma nni.

¹⁷ A teni ke mii go pia yanduanma. N sundi mi yemanma mo n tie yaala.

¹⁸ N yedi: «Mii go pia min daani yaala saala po.» Min den pia yaa dugidi o Diedo po mo gbeni.

¹⁹ Tiadi min laa yaa fe, Min den puagi yaa yogunu, Leni min den laa yaa paboanli kuli po.

²⁰ N baa ki tiani laa bonla kuli po, N gbanu mo wudi.

²¹ Diidi min bua ki bili yaala n pali nni, Min pia ti dugidi yaala yaa niinni.

²² N bani ke o Diedo ŋanma ki gbeni cain, Ke o ninñingbadima mo ki tuoni mi bianu.

²³ Mi baa yaa pandi tiŋaagu kuli. A buacianma mo ki pia lie.

²⁴ N yedi: «O Diedo n tie n biinu, Lani n teni ke n baa yaa dugi o po.»

²⁵ O Diedo ŋanma yabi yua n dugi o po kuli po Leni yua n lingi o kuli po.

²⁶ Li ŋani hali boncianla, O nilo n guudi o Diedo faabima Leni li juunli.

²⁷ Li go ŋani bonŋanla Wan bangi ki juuni fala nni o panma yogunu.

²⁸ O Diedo yaa bili o po yene, Wan kali suo ki yaa ŋmini.

²⁹ Wan labini ki miini o yuli, Lani, li fidi o Diedo n faabi o.

³⁰ Wan pegidi o kpianu yua pabi o po, Ki mangi o pali leni ti sugidi,

³¹ Kelima o Diedo kan lu, O nisaalo yaa yogu kuli po.

³² Ama o baa gbadi o ninñima, Kelima o ŋanma yabinu po.

³³ Waa yen fiagidi o nisaalo, Kelima o bua ki fiagi o ka.

³⁴ Bi yaa ŋmaa mi diema kpaada yaa yogunu,

³⁵ Ki lagidi ki ŋaa yaa bujiali n tiegi Tanpoli Badiciamo nintuali yaa yogunu,

³⁶ Ki jia o nilo buudi ki janbi o yaa yogunu, Naani o Diedo ki nua laa bonla kuli?

³⁷ Ŋme n yedi li bonla n tieni, ke li tieni? Naani o Diedo ka die li bonla kuli?

³⁸ Naani tanpoli Badiciamo ka teni Ke yaala n ŋani leni yaala n bia kuli tiendi?

³⁹ Be yaa po yo ke o nisaalo yenbidi? O yaa baa yenbidi, Wan yenbidi o tuonbiadi po.

⁴⁰ Tin diidi mani ti sani bonŋanla, Ki guani o Diedo kani.

⁴¹ Tin yugidi mani ti nii leni ti pala kuli, Ti Tienu yua n ye tanpoli po kani.

⁴² Tinba, ti tua niyiekaaba Leni yaaba n kaa tuo! Ama fini wani, ŋaa tieni ti po sugili!

⁴³ O Diedo, a taa a pabienli ki goli Nani bu kpalibu yeni, Ki ŋoadi ki deli ti, ki kpaani kaa gba ninñima.

⁴⁴ A taa ku tawaligu ki goli Kaa bua ki gbadi jaandiba kuli.

⁴⁵ A teni ke ti tua baadi, Ban sengi yaadi i nibuoli siiga.

⁴⁶ Ti yibalinba kuli yaadi ti po bi ñoana.

⁴⁷ Tinba yaa po wani, ti jawaandi Leni ki nunfufuuga, Mi bolinma leni fala bebe n kubi ti.

⁴⁸ N nuni nunsiidi wuliti Ki puubi nani i kpeni ñima yeni, Kelima n niba bodima po.

⁴⁹ N nuni nunsiidi wuliti kaa se, Kelima yii pia fuodima,

⁵⁰ Hali o Diedo yua n ye tanpoli po n baa faami, Ki diidi ki le yaa yogunu.

⁵¹ Min nua ke yaala n tiendi n dogu nni bonpola yeni, Koani nni boncianla.

⁵² Yaaba n tie n yibalinba fanma fanma yeni, Ŋua ki deli nni nani ki nuanga yeni.

⁵³ Bi bolini n miali ku buogu nni, Ki lugidi nni a tana.

⁵⁴ Mi ñima milini n yuli. N yedi: «N bia n yeni!»

⁵⁵ Hali ku buobiadigu nni, N tiani ki yini a ki mia a todima.

⁵⁶ A gba n nialu: «Da biini a tuba, Min miadi a todima yaa yogunu n fala po!»

⁵⁷ Min yini a yaa daali ki mia ŋa mi todima, A yedi nni: «Da jie!»

⁵⁸ O Diedo, n buudi nni, a maadi n po, Ki daa ki faabi n miali.

⁵⁹ O Diedo, a nua ban tudi n po maama, Saa n po n moamoani.

⁶⁰ A nua ban tuu bi panli maama Leni ban tuu ñoabu ki pia n po yaa janbi.

⁶¹ O Diedo, a gba bi sugidi kuli, Leni ban pia n po yaa janbi.

⁶² N yibalinba yenbidi leni bi maama kuli, Pegidi ki se n po daali kuli.

⁶³ Diidi, ban kaa leni ban se kuli, Bi bugini mine i yani ki ñuadi nni.

⁶⁴ O Diedo ŋan soani bani moko yeni. Ŋan guani ba bi janda.

⁶⁵ Teni lan paki ba, A solindi mo n jiidi bi yula po.

⁶⁶ O Diedo, ŋoadi ki deli ba leni li pabienli, Ki bolini ba fini o Diedo tinfanma nni.