Jeremi Bubula 2 - U TIENU MAAMA TILI 2013

Jerusalemi dogu fala 2 O Diedo, Jerusalemi yibali

¹ Jam, li gaa lede ke o Diedo pabienli nni, O teni ke ti tawaboandi libini Jerusalemi? O pieni ki luni Isidayeli kpiagidi tinga nni. Waa tiadi o diegu po. O pabienli nni, o sundi o taaŋmaakaanu po.

² O Diedo nali Jakob buoli diedi kuli, Ki naa gbadi bi po ninñima. O pabienli nni, O pua ki guli Juda dopaali kuli. O pua ki luni yikuli tiipo. O joagini mi diema leni mi badijaba.

³ O pabienli nni, o pua ki guli Isidayeli paalu. O yie ke o kan tieni bi po liba kuli Yibali n cua yaa yogunu. O cuoni Jakob diema nni u mu, Yuu n di i kaani kuli.

⁴ O kpali o dabanli nani yibali yeni. O jienbuagu mo dadi ki baa toa. O kpa yaala n bi pia n nuni po mi ñuadima kuli. O yadi o pabienli nani u mu yeni, Siyon yua ŋani gbandieli po.

⁵ O Diedo guani ki tua nani yibali yene, Ki nali Isidayeli. O nali o badidiedi kuli, Ki bolini o dopaali. O teni ke Juda yua n ŋani yenbidi ki go ñiindi. I kaliti leni i ñiindi yabidi.

⁶ O tudi ki luni o nagili yeni, Ki bolini wan den kadi leni ti naankani. O Diedo teni ke bi sundi Siyon nni Mi jaanma taana leni mi fuodima daali po. O pabienli nni, o teni ke bi fali Bi badiba leni bi kopadicianba.

⁷ O Diedo ñani o padibinbinli, Ki fali o kaangagidiŋamu. O luni Jerusalemi badidiegu bilini Yibali nuu nni. Bi laa ki yigini o Diedo diegu nni, Nani u badu daali yeni.

⁸ O Diedo bili ke o baa bolini Jerusalemi bilini. O tandi mi bolinma baabu, O kan poali o nuu se o bolini. O muani u dogu bilinliedi kuli i kumoe, Ki teni ke ikuli wudi ki baali.

⁹ Siyon buliñoana feli ki tinga nni. O bolini a, ki pua ki mudi o sendabila. O bado leni o koanbala kuli ye I nilanbuoli siiga. Bali maama ki go ye, Ba o saawalipualo ki go baadi Bonlekaala o Diedo kani.

¹⁰ Siyon nikpela kaa tiipo ki ŋmini. Bi wuli mi tama bi yula po, Ki lani li paboanli tiadi. Jerusalemi jafanba, Tibini bi yula ki diidi tiipo.

¹¹ N nuni mua ki coagi. N yama kuli paagi. Mii bani kuli min baa kua naani, Kelima n niba n ye yaa yebiadima nni po. A bila leni a biŋaanda Ŋmadi ki baali u dogu siiga.

¹² Bi den tua bi naanba: «Ti baa baa mi jiema leni mi daama le?» Bi den ŋmadi ki baali Nani yaaba n poagili u dogu siiga yeni. Bi yen ku bi naanba biina po yo.

¹³ N go baa waani a be yaa nannanle? N baa biigi a leni be yo, Jerusalemi jafanŋamo? N baa baagi a lede, Siyon jafanŋamo? Kelima yaa yebiadima n ŋmaa ŋa Yabi ki pundi mi ñincianma. Ŋme n baa fidi ki paagi a?

¹⁴ A saawalipuaba baa a po li bonlekaala, Yaa bonlekaala n ki pia ñuadiba, Kaa pia fuomiba kuli mo. Baa kadi ki waani a tagili kuli cain, Ki baa ñani a ti yonbidi nni. Bi baa a po yaa bonlekaala n kaa mani, Ki go pia i boandi.

¹⁵ Bi santagiba kuli puogi bi nii a po, Bi fuoni ki duani bi yula, Ki ñuadi Jerusalemi o badisalo. Naani baa den li yi laa dogu ka: «Yaa ŋamu n ki pia lie, Ki tinga kuli pamanli?»

¹⁶ A yibalinba kuli yaadi bi ñoana a po. Bi fuoni ki kadi bi ñina Ki tua: «Ti nali o. Tin den bua yaa daali n yeni, Ti nandi o, ti laa o n yeni.»

¹⁷ O Diedo tieni wan bi jagi yaala. O tieni wan bi yedi yaala, Wan den maadi yaa maama hali yogu. O bolini ke ninñima ki pia o, Ki teni ke a yibalinba laa a puoli. O pugini a yibalinba paalu.

¹⁸ Bi kuudi leni bi pala kuli o Diedo po. Siyon bisalo guonli po, Teni a nunsiidi n puubi nani u kpenu yeni. Da pa a yuli fuodimiba kuli, A nunbili mo n da fuodi ba waamu.

¹⁹ Fii ki mua boncianla. Li yaa pundi yoagisiigu, Ŋan togidi o Diedo a yantugu kuli. Yugidi a nii o po ki jaandi Ki mia a bila laafialo, Mi koma n caa ki baa je yaaba I sankuni kuli nni yeni.

²⁰ Diidi, o Diedo diidi! A soani ŋme yo li naa tuonli? Naani li bi tie tilade bi puoba N ŋmani bi bimadimu, Ban bua yaa biwaala bonŋanla? Naani li tie tiladi bi kopadicianba N kpe u kaangagidiŋamu nni?

²¹ Bi jawaaba leni a jakpela, Bikuli bili bili tiipo i sani nni. N jafanba leni n jawaaba, Bu toabu dini bikuli. A pabienli nni, a kpa ba ke ninñima ki cuo ŋa.

²² Nani u badu daali yeni, Ŋan yini n yieninlieba. O Diedo pabienli daali Kan yaa pia yua n baa sani ki cia, Li kan yaa pia yua n baa sieni leni miali. Min den bua yaaba bonŋanla ki wubi ba yeni, N yibali bolini ba.