Jeremi Bubula 1 - U TIENU MAAMA TILI 2013

Jerusalemi yaaba paboanli 1 Jerusalemi, ban luni yaa kpepuoli

¹ Jam, li gaa lede ke, Yaa dogu n den gbie bonŋanla yeni, N ji ti bili bonkuongu, Ki naani leni li kpepuoli! I nibuoli diema siiga, Jerusalemi den tie dociamu, Ki tie badisalo a dogbenga siiga. Wani n ji guani ki tuuni li yonbituonli!

² Ñiagu kuli o mua, O nunsiidi mo tagidi o tankpina po. O jaconcona siiga, Oba kuli ki baagidi o. O buakaaba kuli ñani o puoli, Ki kpandi ki tua o yibalinba.

³ Bi gedini Juda ti yonbidi ke o laa i fe. O fala kandi hali boncianla, Ke o kaa i nibuoli siiga kaa pia yanduanma. Yaaba n sedi o po kuli baa paadi o, O paboankandikaali siiga.

⁴ Siyon sani kuli ye leni li pabiidili, Kelima oba ki go kpendi o kani. O buliñoana kuli biidi cain, Ke o kopadicianba duni, Ke u dogu badisiaba ye leni li paboanli, O dogu baa yaa ye leni li pabiidicianmoanli.

⁵ O yibalinba paadi o, Ke o koanginkaaba kaa leni mi yanduanma, Kelima o Diedo waani o fala, O tuongunda leni o yiema po. O yibalinba gedini o bila ti yonbidi.

⁶ Siyon nua ke o kpiagidi kuli bodi. O badijaba kuli guani ki tua kabili, Yaaba n ki pia moaŋmankaadi, Ki tiini o tuado nintuali. Baa go pia fidu.

⁷ Jerusalemi baa ki tiani o puagidi dana po, Wan laa i fe yaa dana nni. O baa ki tiani o piamoanma kuli po, Yibali daa paadi o yaa yogunu, Ke niloba kuli ki cua ki baa todi o. O yibalinba den nua o bodima ki laa.

⁸ Jerusalemi tieni ti tuonbiadi boncianla, Lani n teni ke o joagini, Ke yaaba n den kpiagidi o kuli fali o, Kelima bi laa o mubima. O duni ki guani puoli po.

⁹ O joagindi gbiabi o liadili nni, Waa faami yaala n baa faa Ki tieni o po. O tingbali ki pia maama! Yua n baa baagi o kuli ki ye. O yedi: «Ŋain o Diedo, n laa i fe, Ke n yibali mo yaa bali doni.»

¹⁰ Yibali tandi o nuu Ki taa wan pia yaa bonmoanla kuli. O laa ke i nilanbuoli kua O kaangagidiŋamu nni, Ŋan den kuani yaaba Ke ban da kua a nitaanli nni yeni.

¹¹ O niba kuli duni ki lingi bi bonjekaala. Bi taa ban den pia yaa bonŋanla kuli, Ki lebidi leni mi jiema, Ki bua ki faadi bi miali. «Diidi fini o Diedo, ŋanbi ki diidi, Diidi ban fali nni maama.»

¹² Lan da tua mani yeni yinba yaaba N tagi u sanu kuli po. Diidi mani ki le, Li yaa pia yaa fala n naaninni, O Diedo n waani nni yua, O pabiencianli daali.

¹³ Hali tanpoli, o teni ke u mu Kua n kpaba nni, ki juugi a. O dia nni ti cuadi, Ki teni ke n ŋmadi ki baa. O teni ke n pali boandi, Ke n ye leni fala li yentunli kuli nni.

¹⁴ O loli n biadima kuli ki tuni nni. O Diedo gbeni n biadima kuli yene. O gbeni n paalu, Ki muubi nni leni yaa nuu, Ke n kan fidi ki ŋmadi.

¹⁵ O Diedo deli ki ñani Yaa jakoanda n den ye n kani kuli. O yini li toagocianli n po. O yini li ke lin cua ki nugi n jawaaba. O Diedo nugi nni, Mini Juda jafaano.

¹⁶ N mua lani yaa po yo, Ke n nuni kuli tie nunsiidi, Kelima o baagika foagidi leni nni. Wani yua n baa guani ki faadi n miali. N bijaba ye leni li paboanli Kelima yibali pa ki cie ba.

¹⁷ Siyon tandi o nii, Niloba kuli ki nanli o. O Diedo teni ke Isidayeli yieninlieba Kpandi ki tua o yibalinba, Jerusalemi tua joagindi bi siiga.

¹⁸ O Diedo n tiegi, Kelima n den yie o bali maama. Cengi mani yinba i nibuoli kuli, Diidi mani n fala! Bi gedini n jafanba leni n jawaaba ti yonbidi.

¹⁹ N yini n jaconcona, Ama bi boandi nni. N kopadicianba leni n nikpela Kpe u dogu nni, Ban den lingi mi jiema yaa yogunu, Ki bua ki gaa bi miana.

²⁰ O Diedo, diidi n paboanli! N tugusoama sani! N yama kuli yagi boncianla, Kelima n tua niyieka moamoani. I sani nni bu toabu di a miana, Ti diedi tugu nni moko, kuuma bebe.

²¹ Bi den gbadi ke n duni, Ama oba kuli naa den baagi nni. N yibalinba kuli gbadi n yebiadima, Ki mangi bi pala leni ŋan soani nni yaa tuonli. A teni ke ŋan den bili yaa daali cua. Ŋan teni lan tua bimoko yaa po yeni.

²² Bi biadima kuli n cua a nintuali. Ŋan soani bani moko, Nani ŋan den soani nni maama, Kelima n yiema po. Moamoani n ñiindi yabi, N pali mo ye leni fala.