Jeremi 9 - U TIENU MAAMA TILI 2013

Mi faama n diedi yaa niba

¹ Bi yaa bi puni nni mi fanpienma nni Bi sancenba n baa wuoni naani, N baa sani ki ŋaa n diema niba ki foagidi leni ba, Kelima bikuli tie conconma danba. Bikuli tie janbi danba bebe.

² Bi landi coa nani a dabana yeni mi faama po, Bi yantugupiendi mo ka teni Ke bi pia u paalu mi diema nni. Se biadima n tuu biadima. Baa bani nni. Mini o Diedo n yedi yeni.

³ Yuakuli n fangi o yuli leni o danli, Oba n da dugi o kpiilo ba yendo po, Kelima kpiilo kuli baa fidi ki lu i janbi, Danli kuli mo pia bu tingbangbaabu.

⁴ Bi boandi biyaba, Baa maadi i moamoani, Bi maani mi faama puama, Bi coagini bi yula ki tiendi i tagili.

⁵ O Diedo yedi: «Bi yen ña tugumoangu nni Ki ban kua tugumoantoagu nni, Ki ña faama nni ki ban kua mine nni, Ki yiedi ke bi kan bandi nni.»

⁶ Lani n teni ke Li Miali Diedo U Paaciamu Kuli Daano yedi: «N baa teni ban nandi ba u mu nni, Min biigi ba. N baa tieni n niba lede?

⁷ Bi landi tie nani yaa piemi n sondi bonŋanla yene. Bi li pia i boandi bebe. Bi baa maadi leni bi yieninlielo mi yanduanma maama, Ki nan bani bi pala nni, ke bi dia o ku diagu.

⁸ O Diedo yedi daa, Naani lani yaa po, n kan fii ki sedi bi po? Naani n kan tuu u naa nibuobiadu li panli?»

I moe leni i wanli yogunu

⁹ A juana po, N baa mua ki figindi. Mi fanpienma nni, i yankpaakaani nni, N baa wanli i wanli kelima bi juu ba. Oba ki poandi likani. Baa go gba yankuli lanbu, Ki cili tanpoli nuani, Ki ban taani leni ti yandi, Likuli bodi cain.

¹⁰ O Diedo yedi: «N baa teni Jerusalemi diema n tua diegbengu, I tanboe n ye naankani. N baa teni Juda dogi n tua paboanli kaanu, Niba n ki go ye naani.»

¹¹ Naani li pia yua yaa yama n fo bonŋanla, Ki baa fidi ki doagidi laa bonla n tie yaala? Li yaa tie ke o Diedo n maadi leni o, Wan doagidi ki waani yaala yaa po, Ke mi diema bodi Leni yaala yaa po ke mi tua fanpienma, Nilo n ki go poandi naankani!

¹² O Diedo yedi: «Li tie ke bi ŋaa n bali maama, min den teni ba yaama yeni. Baa cengi n nialu, baa ŋoadi nani min den bili bi po maama.

¹³ Bi ŋoadi bi pala juagu leni i buli Baali, bi baanba n den teni ke bi maani yaaba.

¹⁴ Lani n teni ke Li Miali Diedo U Paaciamu Kuli Daano, Isidayeli Tienu yedi nanda: Lani yaa po, n baa ñuni bi naa niba ti loabidi, ki teni ban yaa ye leni li paboanli.

¹⁵ N baa yadi ba i nibuoli nni, bani leni bi baanba n kaa den bani yaa nibuoli. N baa teni bu toabu n ŋoadi ba hali ki ban bolini ba cain.»

¹⁶ Li Miali Diedo U Paaciamu Kuli Daano yedi nanda: «Kpaagi mani! Yini mani yaa puoba n mua i kumoe, Yini ba mani ban cua. Ban yini mani yaa puoba n bani li tuonli, Ki teni ban cua.

¹⁷ Ban jaligi ki mua ki wanli ti po. Ti nuni n wuli ti nunsiidi, Ti nunsiidi n wuli boncianla,

¹⁸ Kelima i ñiindi ña Siyon po ki kpendi. Diidi ban baa ti ke ti laa i fe maama. Ti ñani mi diema nni tiladi, Kelima bi pua ki mudi ti diedi!»

¹⁹ Bi puoba, cengi mani o Diedo maama, Yi tuba mo n gbadi o ñoabu n yedi yaala. Bangi mani yi bisiaba, Ban baa yaa mua ki figindi maama. Bangi mani yiyaba i wanli n wanli maama,

²⁰ Kelima mi kuuma kua ti diebona kani. Mi kua ti dieŋama nni. Mi guu a bila i sani nni, Ki guu bi nipanba mo mu daamu nni.

²¹ O Diedo ñoamabonli nne: Bi niba baa kpe ki wudi, Nani ti bugidi yeni i kuani nni, Nani ban yendi yaa dikala Ki luni yua n yendi puoli po yeni, Oba kuli kan taa ba.

Mi yanfuomoanma n tie o Diedo bandima

²² O Diedo yedi nanda: «O yanfuodaano n da jigini o yuli o yanfuoma po. O gbanmandaano n da jigini o yuli o gbanmanu po. O piado n da jigini o yuli o piama po.

²³ Yua n bua ki jigini o yuli, N jigini o yuli kelima o pia mi yanfuoma ki bani nni, Ki bani ke n tie Li Miali Diedo, Yua n tiendi mi ŋanma, Ki ja yaa buudi n tiegi, Ki tiendi yaala n tiegi ki tinga nni. Min bua yaala n yeni.» Mini o Diedo n yedi yeni.

Yaaba n tama ke bi kua ku koanciagu n fangi bi yula

²⁴ O Diedo n yedi ke a dana kpendi, Ki yedi ke o baa fii ki sedi Yaaba n ki lebidi bi pala yeni po.

²⁵ Bani n tie ne: Ejipiti yaaba, Juda yaaba, Edomi yaaba, Anmoni buolu, Moabi yaaba leni yaaba n yen kugini Ki kuo bi langbiadi kuli, Yaaba n ye mi fanpienma nni, Kelima i nibuoli kuli pala naa lebidi. Isidayeli yaaba mo pala tie jifola yo.