Jeremi 8 - U TIENU MAAMA TILI 2013

¹ Lanyogunu o Diedo den yedi: «Bi baa bugidi ki ñani bi takula nni Juda badiba kpaba, a koanbala, bi kopadicianba, bi saawalipuaba leni Jerusalemi niba kpaba kuli.

² Bi baa deni laa kpaba u yienu nni, o ŋmaalo leni a ŋmabila nintuali, ban den bua bani yaaba ki pugi ba yeni. Bi kan wodi a kpaba yeni, bi kan piini a mo. Ama a baa tua bugidi u tingbanu po.

³ Yaaba n sieni laa nibuobiadu siiga, bani yaaba ke n yadi yadi ba i kaani kuli yeni, mi kuuma baa yaa tuninni bi po li miali. Mini Li Miali Diedo U Paaciamu Kuli Daano n yedi yeni.»

Li gaa lede ke n niba tie nanda?

⁴ Ŋan yedi ba: O Diedo yedi nanda: «Naani yua n baa ki yen fii ka? Naani yua n jadi ki ŋaa u sanu ki yen ti guani?

⁵ Be n teni ke Jerusalemi niba jadi ki ŋaa u sanu? Bi suagi liiga leni i janbi, Ki yie ke bi kan guani n kani.

⁶ N tie suo ki cengi. Bi maama ki dagidi. Oba kuli ki miadi sugili o biadima po, Oba ki tua: ‹Ŋain, n tieni be nno?› Bikuli li tiini ki suagi liige, Nani yaa taami n tiini bu toabu nni yeni.

⁷ Ba goliya yua n ye ti tawadi nni bani o yogunu, Ki kpaajiefanga, ki tancancalinga leni ku kulijaŋmaangu Kuli bani ban baa yaa lebidi ki kpendi yaa yogunu. Ama n niba wani naa bani o Diedo n bili Li bonla n yaa cuoni maama.»

Bi tuofaa-yanfuodanba

⁸ Yi gaa lede ki yedi: «Ti tie yanfuodanbe, O Diedo bali maama ye leni tinbe?» Mi faama po yo ke a tidianla fii, Ki baa diani leni bi tuofaa-tidianmuani.

⁹ Bi yanfuodanba fiagi, Ki jie hali boncianla ke bi cuo ba. Diidi, ban fali o Diedo maama yeni, Bi yanfuoma go pia bi po mi laa fuome?

Yaaba n pua mi faama

¹⁰ Lani n teni ke n baa taa bi puoba ki teni nitoaba, Ki teni yaaba n paadi ba mo n diedi bi kuani, Kelima ki cili ki bonwaaga ki ban pundi o nikpelo, Bikuli li tiini ki lingi bi yucela ŋamu bebe. Ki cili o saawalipualo ki ban taani o kopadiciamo, Bikuli li ye i janbi po yo.

¹¹ Bi nua yaa nufanu n pua n niba leni mi kafaama. Bi kpaagi ki tua: «Mi yanduanma ye, mi yanduanma ye,» Ke yanduanma naa ye.

¹² Li bi pundi i fe n cuo ba, Ban tuuni yaa tuongunda po. Ama i fe naa cuo ba, Baa go bani fe n tie yaala, Lani n teni ke bi baa kpe nani biyaba yeni. Min baa ti fii ki sedi bi po yaa yogunu, Bi baa yaa tuudi ki baali. O Diedo n yedi yeni.

U Tienu pali biidi ke bi niba mo yaa jigi cie

¹³ O Diedo yedi: «N baa baa min baa bili ba naani. Duven tiidi kan luoni puu kuli. Bu kankanbu kan go yaa pia kankana, Ti faadi baa mali, N baa ŋaa ba bi yibalinba nuu nni.»

¹⁴ Bi tua: «Be yaa po yo ke ti nan baa ki kaa? Taani taani mani Tin gedi i dopaali nni Ki ban kpe, Kelima o Diedo ti Tienu teni ke ti baa kpe, O teni ke ti ñuni yaa ñima n pia ti loabidi, Kelima ti tieni o po ti tuonbiadi.

¹⁵ Ti den kaa ki daani mi yanduanma, Ama bonŋanliba kuli naa ye. Ti den guu mi paagima yogunu, Ama ti jawaandi n sani ki cua.

¹⁶ Bi gba i taami dunli hali Dan diema nni, A tanjala dunli teni Ke ki tinga kuli digibi. Bi cua, bi ŋmani Mi diema leni yaala n ye mi niinni, U dogu leni yaaba n ye u niinni.»

¹⁷ Mini o Diedo n yedi: «N soani i webiadi, Ban ki pia yaaba yaa ñoagi. Bi baa ñidi yi.»

Jeremi payianu

¹⁸ N payianu ki pia ñoagu, N gbanu mo kuli wudi.

¹⁹ Cengi mani n niba ñiindi, Yii n ña hali foagima: «Naani o Diedo ki go ye Siyon? Naani u dogu ki go pia bado? Be yaa po yo ke bi biidi n pali leni bi buli, Yaa bonyuogidi n tie nibuotoe yaa bonla?»

²⁰ U jetaagu gbeni, ku siagu pendi, Tinba wani daa baa faabima.

²¹ N niba poagilima coagi nni. N pali boandi ke n ye leni li pabiidili boncianla.

²² Naani kpasogikaama ki ye Galaadi diema nni? Naani lotoli ki ye lipo? Be yaa po yo ke laafia naa go tiendi n niba po?

²³ Ŋain, n yuli yaa bi tie ñima, Ke n nuni mo tie nunsiidi ñinbunli, N bi baa yaa mua u yensiinu leni ku ñiagu, N diema niba yaaba n kpe po.