Jeremi 7 - U TIENU MAAMA TILI 2013

Yaa dugidi n kan waagi

¹ O Diedo den maadi leni Jeremi yaa maama n tie ne:

² «Gedi o Diedo diegu buliñoabu kani, ki maadi yaa maama n tie ne, ki yedi: ‹Cengi mani o Diedo maama, yinba yaaba n tie Juda yaaba, ki koa o buliñoana kani, ki baa cua ki gbaani ki pugi o Diedo.›

³ Li Miali Diedo U Paaciamu Kuli Daano, Isidayeli Tienu yedi: ‹Lebidi mani yi sani leni yi tuada, lani n tie min cedi yin yaa ye nekanba.›

⁴ Yin da dugi mani i boandi po, ki yedi: ‹Nekanba n tie o Diedo diegu, o Diedo diegu, o Diedo diegu nne!›

⁵ Li yaa tie ke yi lebidi yi tagi leni yi tuada i moamoani, ki tieni bi niba kuli po, nani lan pundi maama,

⁶ yi yàá mabini o caano, ki kpienbiga leni li kpepuoli, kaa wuli yua n ki pia tagili soama u naa kaanu, yi yàá ŋoadi tientoe yii n baa cuani yi po fala,

⁷ lani, n baa cedi yin yaa ye u naa kaanu, min puni yi baanba yaa diema yaa yogu n tuu yaa yogu.

⁸ Ama, yi dugi i boandi, yii n ki pia fuoma po.

⁹ Yi su, ki kpaani, ki conbi, ki pua mi faama, ki polini, ki padi o bulo Baali po, ki tiini ki ŋua yin kaa pia ŋantaadi leni yaa buli.

¹⁰ Li yaa puoli, yi yen cua ki sedi n nintuali ku naa diegu nni, ban kpiagidi n yeli naankani, ki yedi: ‹Ti baa mi faabima!› Ki nan go baa ki tuuni a naa tuongunda kuli.

¹¹ Naani yi tama ban taagi n yeli yaa diegu nne niinni, tie suuda wuonkaanu yo? Mini o Diedo, n laa ke li tie yene. O Diedo n yedi yeni.

¹² Gedi mani n kaangagidiŋamu yuu n ye Silo yeni, min den cedi ke n yeli ye naani, ki le min soani u kaanu yeni maama, kelima n niba Isidayeli yaaba biadima po.

^13-14 Mini o Diedo yedi: ‹Nani yin soani laa tuona kuli yeni, nani min maadi leni yi, ke yi naa cengi, nani min yini yi, ke yii tuo yeni, yin dugi yaa diegu po, ki taagi n yeli ku nii nni, min den puni yi baanba yaa kaanu yeni, n baa soani laa kaanu nani min den soani Silo maama yene.

¹⁵ N baa deli ki foagidi yi n kani, nani min yie yi kpiiba, Efrayimi puoliŋuani kuli maama yeni.› »

U Tienu n kan cengi yaa jaanma

¹⁶ Fini Jeremi, amo n da jaandi bi po. Ŋan da kpaani, ŋan da jaandi bi po. Da cua n kani ki mia min todi ba, kelima n kan cengi a maama.

¹⁷ Naani ŋaa nua ban tuuni yaa tuona, Juda dogi nni leni Jerusalemi sani nni?

¹⁸ A bila kpaagi ti daadi, bibaanba cuondi u mu, bi puoba kaaliti mi yoma, ki baa pua ti lalaadi Tanpoli badipua po. Bi go cabini tientoe po, ki biendi n pali.

¹⁹ O Diedo yedi: «Naani bi tudi mini yaa po yo? Naani baa tudi bi yula po ka? I fe ki tie bi yaa yii ka?»

²⁰ Lani n teni ke o Diedo U Tienu yedi mi naa maama: «Diidi n pabiencianli baa nandi u naa kaanu koatiidi, li niba, li yandi leni li tinga bonluonkaala kuli. U mu baa yaa siagi la ki kan gbindi.»

Yaa nibuolu n ki cengi U Tienu maama

²¹ Li Miali Diedo U Paaciamu Kuli Daano, Isidayeli Tienu yedi mine: «Taa mani yi padijuukaana, ki pugini yi pada po, ki ŋmani li nandi.

²² Min den ñani yi baanba yaa daali Ejipiti diema nni, mii den mia ba padijuukaana ki bagi padifana.

²³ Ama n den yedi ba yaa maama n tie ne: ‹Cengi mani n maama, n baa yaa tie yi Tienu, yimo n yaa tie n niba. Yaa cuoni mani, min yedi yin tagini yaa sani nni kuli, lani n tie yi yema n yaa mani yi po.›

²⁴ Ba leni lani kuli, baa cengi. Baa diadi bi tuba ki cengi. Bi ŋoadi bi pajuaga ya joagini yaa tundi, ki guani puoli, kaa suagi liiga.

²⁵ Hali bi baanba n ñani Ejipiti diema nni yaa daali, ki taa ki pundi hali dinla, n soani yi po n naacenba bi saawalipuaba, u yogunu kuli ki naa cedi.

²⁶ Ama baa cengi n maama. Baa diadi bi tuba ki cengi. Bi juagi bi pala. Bi tieni yaala n bia ki cie bi baanba.

²⁷ A yaa maadi ba mi naa maama kuli, bi kan cengi a. A yaa pegidi ki teli bi po, ki kpaani ki maadi leni ba, bi kan guani a po.

²⁸ Lanwani, ŋan yedi ba: ‹Bi naa niba n ki cengi o Diedo bi Tienu nialu. Baa bua tundi. I moamoani bodi, i ñani bi maama nni.

Mi kuuma joaloangu

²⁹ Kuo ŋan den gagidi a yuli Ki bili yaa yudi yeni, ki ban lu. Gedi a juana yula po ki wanli, Kelima o Diedo fali, O yama mo sii yaa nifiima n biendi o pali Hali boncianla yeni po.›

³⁰ Mini o Diedo yedi: ‹Juda bijaba tieni n po yaala n bia. N yeli n taagi naankani yene, ke bi cuani bi cancaginbonla ki joagini n diegu.

³¹ Bi ŋanbi a pada kaani Beni-Hinomi joaloangu nni, ki baa yaa siagi bi bijaba leni bi bisiaba, min kaa den puni yi yaa sanu, min kaa den baa yaa yanjagili mo.› »

³² Mini o Diedo yedi: «Diidi mani a dana kpendi, ke bi kan go yedi: ‹Tofeti› bi ‹Beni-Hinomi joaloangu.› Ama bi baa yaa tua: ‹Mi bolinma joaloangu.› U kaanu n baa poadi maama po, bi baa yaa pii bi niba lankane.

³³ Bi naa niba tinkpiba baa tua jiema, tanpoli nuani leni ki tinga yandi po, niloba kuli kan cua ki yagi bi yama.

³⁴ N baa teni Juda dogi leni Jerusalemi niinni, i pamandanyani n gbeni. Togibaa leni toginaa moko yaa yani baa gbeni, kelima yaa nufanu n baa pua mi diema yeni po.»