Jeremi 6 - U TIENU MAAMA TILI 2013

Mi yebiadima baa baa Jerusalemi dogu

¹ Benjamen buolu, sani mani ki ña Jerusalemi. Piebi mani li naatuntunli Tekoa dogu nni, Fiini ki sieni mani li jakoandicabili Beti-Keremi dogu nni, Kelima fala leni mi yebiadima Ñani nujienu po ki kpendi.

² Fini Jerusalemi, ba ke a ŋani bonŋanla, A nan baa bodi!

³ Bi niba kpendi Siyon kani nani Bi yankpaaba leni bi yangola yeni, Ki sieni bi gbandiena ki gaani ki lindi o, Ki baa baa o bu toabu. Yuakuli se o kaanu leni o toagola. Bi kpaa yuakuli o kaanu.

⁴ Bi tua: «Fii tin baa o mani bu toabu! Fii mani tin gedi u yensiicocolu! Ti yula ki mani, li nan ji bua ki biige, Li ŋmani ke li bii ki gbeni.

⁵ Fii mani ku ñiagu Ki gedi ki ban bolini Jerusalemi dieŋama!»

⁶ Li Miali Diedo U Paaciamu Kuli Daano yedi nanda: «Pedi mani ti daadi, Ki tiini ki deni i bilini, Ki gaani ki cebini Jerusalemi. Mini n taa u dogu yeni ki teni yibalinba, Kelima mabinga bebe n ye laa dogu nni.

⁷ Nani ku ñinbuogu n kubi mi ñima maama, Laa dogu moko kubi u biadima yene. Tugumoangu leni bolinma bebe n ye u dogu yeni niinni. N li nua u niinni poagilima leni fala bebe.

⁸ Jerusalemi dogu, gaa mi bangima, Lani n tie min da paadi leni a, Ki teni ŋan kpandi paboanli kaanu Leni diegbengu, Nilo n ki ye yaa diema nni.»

⁹ Li Miali Diedo U Paaciamu Kuli Daano yedi nanda: «Bi baa sobidi yaaba n sieni Isidayeli nni, Nani ban sobidi i duventiidi maama yeni.»

¹⁰ N baa maadi leni ŋme? N baa taa ŋme yo wan tua n siedo, Ban cengi nni? Diidi, bi tuba biini ki gbeni, Bi kan fidi ki cengi bonŋanla mo. Diidi mani, U Tienu maama tie bi po fe yo. Maa go nuagi bi po.

¹¹ O Diedo pabiencianli ye leni nni, N kubi li ki coagi mo. O Diedo yedi: «Wuli li yaa bila n puagi i sani nni po Leni bi nipanba po, Kelima bi baa cuo joa leni pua, Nikpelo leni yua n podi boncianla kuli.»

¹² N baa fii ki sedi mi diema yaaba po, Ki teni nitoaba n fie bi diedi, Bi puoba leni bi kuani kuli. O Diedo n yedi yeni.

¹³ A bonwaala leni a nikpela kuli, Lingi bi yucela ŋamu bebe yo. Ki cili o kopadiciamo ki ban tuoni o saawalipualo, Bikuli ye i janbi po yo.

¹⁴ Bi nua yaa nufanu n pua n niba yeni leni mi kafaama, Ki kpaagi ki tua: «Yanduanma, yanduanma.» Ki nan sua yanduanma ki ye.

¹⁵ Li bi pundi i fe n cuo ba, Kelima bi tuongunda po. Ama i fe naa cuo ba. Baa go bani fe n tie yaala. Lani n teni ke n yaa fii ki sedi bi po yaa yogunu, Bi baa ŋmadi ki baa leni yaaba n baali. N yaa fii ki sedi bi po yaa yogunu, bi baa yaa jadibi jadibi. O Diedo n yedi yeni.

¹⁶ O Diedo yedi nanda: «Sedi mani i sani nni ki diidi bonŋanla. Buali mani yi yaajanba sani n ye naani. U sanŋamu ye le yo? Lanwani, tagini mani wuni, Ki baa yi yula po mi fuodima. Ama bi guani ki yedi: ‹Ti kan tagi u niinni ba!›

¹⁷ N lingi yi po yaaba n baa yaa guu yi diema, Yin yaa yen faami li naatuntunli piebima po. Ama bi guani ki yedi: ‹Ti kan yaa faami li po ba.›

¹⁸ Lani yaa po, yinba mi diema yaaba, Cengi mani bonŋanla! Fini li nitaanli, a mo n moandi ki bandi Yaala n tiendi bi siiga.

¹⁹ Ki tinga, cengi bonŋanla! Mini n teni ke mi yebiadima ŋmaa bi naa niba, Li tie bi yantiabiada panpaani yo, Kelima baa soangi bi yama ki gaa n maama. Bi fali n bali maama.

²⁰ N baa tieni be yo Saba diema dugibila? Yaa kpenmuadi yaa nuulu n mani, Ki ñani hali yaa diema n ye foagima, Pia be yaa fuome n po? Mii bua yi padijuukaana, Yin kpendinni n po yaa pada mo fa.»

²¹ Lani n teni ke o Diedo maadi yaa maama n tie ne: «N bili a tantuudikaana u naa nibuolu nintuali, Bi baanba leni bi bijaba kuli baa yaa tuudi ki baali lankane. Bi yieninlieba leni bi danlinba kuli baa kpe.»

Yibali ñani nujienu po ki kpendi

²² O Diedo yedi mi naa maama: «Diidi yaa nibuolu n tie ne ñani nujienu diema po. Nibuociamu ñani hali u tinbianu po ki kpendi.

²³ Bi kubi li dabanli leni li kpaanli. Bi pia ku tugumoangu leni i nunkuomi, Bi niali duni nani mi ñincianma yeni. Bi jagi i taami ki caligi bonŋanla bu toabu po, Ki baa koani leni Siyon badisalo.

²⁴ Ti baa laabaali ke ti gbani wudi. Ti jawaandi cuo ti. Li koani ti nani u maditugukoanu yeni.

²⁵ Da ña mani i kuani nni, Ki da gedi i sani nni, Kelima yibali se lipo leni o jugisiega. I yanbani mo ye i kaani kuli.

²⁶ N niba, yie mani li paboanli tiadi, Bili ki lebidi mani mi fantanpienma nni, Mua mani boncianla, Nani bonjayenyenga kuuma yeni, Kelima yua n cua ki baa bolini yeni, ludi ti.

²⁷ Jeremi, mini n teni a yaa niba n ye ne, Ke ŋan biigi ba ki bandi bi tagu, Nani o maano n biigidi ti kudi maama yeni.

²⁸ Bikuli tie niyiekaaba, tingbangbaaba, Ki juagi nani ti kumoandi bi ti kuboandi yeni. Bikuli tie dokpala yo.

²⁹ Ki buaga tongi ke ti noabindi nandi. Ba ke o maano biandi o yogunu ki duadi likuli, Ti joagindi yeni nan kan ña.

³⁰ Bi tie ban yi yaaba: “ban fali yaa ŋanjilifa,” Kelima o Diedo n fali ba.»