Jeremi 52 - U TIENU MAAMA TILI 2013

Yibalinba n baa diedi Jerusalemi dogu maama 52 Nebukanesa cuo Sedesiasi

¹ Sedesiasi den pia piilie n binyenle, wan den tua Juda bado yaa yogunu. O den kali ti gbandi po piiga n binyenli Jerusalemi dogu nni. O naa den yi Amutali, ki tie Yirimeyahu Livina diema yua bisalo.

² O den tieni yaala n ki dagidi o Diedo po, nani Joakimi n den tieni maama yeni.

³ Yaala n den tiendi Jerusalemi dogu nni leni Juda diema nni kuli, den taani ki biendi o Diedo pali, hali yaala ke o den ñani bi maama nni cain. Sedesiasi den fiini mi yiema Babilonni bado Nebukanesa po.

⁴ Wan kali ti gbandi po li binyiali nni, cipiiga dapiiga, Babilonni bado Nebukanesa den cua leni o toagoli kuli, ki baa Jerusalemi. O den kpaa ki lindi u dogu.

⁵ Bi den gaani ki lindi u dogu ki kaa, hali o bado Sedesiasi piiga n binyenli.

⁶ Cinaa dayiali, mi koma den moandi u dogu nni boncianla. Bonjekaala ki go den ye bi niba po.

⁷ U folu den tieni u dogu nni, ke a jakoanda kuli den lundi likani, ki sani ki ñani u dogu nni ku ñiagu. Bi den tagini yaa buliñoabu n ye i bilinliedi siiga, ki kuu leni o bado salidingo. Ba ke Kalide yaaba den lindi ki cebini u dogu, bi den sani ki taa Araba sanu.

⁸ Ama Kalide yaaba toagoli den ŋoadi o bado Sedesiasi ki nandi o Jeriko tialu nni. O toagoli kuli den yadi ki ŋaa o.

⁹ Bi den cuo o bado Sedesiasi ki gedini o Babilonni bado yua n den ye Livila kani, Hamati diema nni. Bi den jia o buudi lankane.

¹⁰ Babilonni bado den teni ke bi kodi Sedesiasi bijaba o nunbu nni. O go den teni ke bi kodi Juda koanbala kuli Livila dogu nni.

¹¹ Lani n pendi, o den teni ke bi fiadi fiadi Sedesiasi nuni, ki teni ke bi loli o leni i kumoangaali. Babilonni bado den gedini o Babilonni diema nni, ki luoni o li kpaadidieli nni, hali o kuuma daali.

Nebusaradani biidi Jerusalemi ki dudi

¹² Nebukanesa Babilonni bado bali piiga n binyiali, cimuu dapiiga, Nebusaradani, yua n den tie Nebukanesa guudikaaba yudaano den cua Jerusalemi.

¹³ O den juu o Diedo diegu, o bado diegu leni Jerusalemi diedi kuli leni yaa diedi n den kpiagi kuli.

¹⁴ Lanwani, Kalide yaaba toagola ya n den ye leni bi guudikaaba yudaano yeni, den mudi yaa bilinciami n den lindi ki cebini Jerusalemi kuli.

¹⁵ Bi guudikaaba yudaano Nebusaradani den taa mi diema niba tianba yaaba n den luo, yaa niba n den sieni u dogu nni, yaaba n den taa bi yula ki puni Babilonni bado leni a tuonsoanbanda kuli, ki gedini ba ti yonbidi.

¹⁶ Ba leni lani kuli, Nebusaradani bi guudikaaba yudaano, den ŋaa bi nitianba nani taliginba, ke bi guu duven tiidi kuani, ki go ko bu kpaabu.

¹⁷ Kalide yaaba den mudi ti kumoandi dasaana ya n den ye o Diedo diegu nni leni ti ñinniditiadi tuankaani leni ti kumoandi ñintadiciangu, yaagu n den ye o Diedo diegu nni. Bi den taa ti kumoandi yeni kuli ki gedini Babilonni.

¹⁸ Bi go den taa mi fantanpienma tiadi, pelinba, mu jugimu, mu tadiñokaamu, mu tadibuomu leni ban den tuuni U Tienu diegu pada tuonli leni yaa tiadi ke ti tie kumoandi kuli.

¹⁹ Bi guudikaaba yudaano go den taa ti ñingaandi, u mu tiadi, mu tadiñokaamu, mu tadibuomu, yaala n den tie wula leni ŋanjilifa kuli.

²⁰ Baa den fidi ki baa biigi o bado Salomon n den taa yaa kumoandi ki kuani o Diedo diegu maama nni kpiagu. Li kumoandi tiadi n den tie tine: a bunbunlieda, ku tadiciangu leni a piiga n naatonlieda ya n den tugi gu leni ti teliti.

²¹ A bunbuna yeni siiga, bonyenli kuli yaa kpedima den tie piiga n nukpandunanii. A gaanilindima den tie piiga n nukpandunalie. A bunbuna yeni den tie bonlondi, ke a gbebilu tie nibilanaa.

²² Li bunbunli yuli po den pia bontuankaala ke li tie kumoandi ki kpedi ki pundi nukpandunamuu. Li bunbunli yuli gaanilindima den pia bu ganbu leni grenadi bonluonkaala nannanli, ke likuli tie kumoandi. Li den tie yene li bunbunli yaali n den sieni leni grenadi tiidi bonluonkaala kuli po.

²³ Grenadi tiidi bonluonkaala yaala n den gaani ki lindi den tie piiyia n bonaluoba. Yaa grenadi tiidi bonluonkaala n den gaani ki lindi bu ganbu den tie bona kobiga.

²⁴ Bi guudikaaba yudaano den cuo bi kopadicianba bado Seraya leni o duogili Sefania leni U Tienu diegu buliñoa-guuditaadiba.

²⁵ O den cuo moagiliyenga, yaaga n den tie bi toatieba yudaano. O den cuo ban den laa u dogu nni o bado cancantieba yaaba siiga nibilele leni bi toatieba yudaano tidianlo, yua n yen dangi yaaba n baa gedi bu toabu. O den cuo li dobila niba, niba piiluoba, yaaba n den ye Jerusalemi dogu nni.

²⁶ Nebusaradani bi guudikaaba yudaano, den taa ba ki gedini Babilonni bado kani Livila dogu nni.

²⁷ Babilonni bado den kpa ba Livila dogu nni, Hamati diema nni.

²⁸ Diidi Nebukanesa n den gedini yaa niba ti yonbidi: li binleleeli, Jufinba tudataa n piilie n nibitaa (3 023).

²⁹ Nebukanesa piiga n binniili, o den ñani Jerusalemi kobinii n piitaa n nibilie.

³⁰ Nebukanesa bali piilie n bintaali, bi guudikaaba yudaano Nebusaradani, den gedini Jufinba kobilele n piinaa n bonbimuu ti yonbidi. Bi niba kuli coali den tie tudanaa n kobiluoba (4 600).

Babilonni bado tieni sugili Joakini po

³¹ Ban den gedini Juda bado Joakini ti yonbidi, ke li tieni piitaa n binalele yo, ke Evili-Merodaki den tua Babilonni bado. Laa binli piiga n cilie piilie n daleleele, ke o den gbadi Joakini po mi ninñima, ki ñani o li kpaadidieli nni, ki go kaani o ti gbandi po.

³² O den maadi leni o leni mi buama, ki teni ke o bali kpiagi ki cie yaa badiba n den taa ki ye leni o Babilonni nni kuli.

³³ Babilonni bado den teni ke Joakini landi o kpaaditiadi, ki lani tiatoadi, ki di wani o bado saajekaanu kani o miali dana nni kuli.

³⁴ O miali dana nni kuli, hali o kuuma daali, Babilonni bado n den kuandi o po o ŋantaadi, daali kuli.