Jeremi 51 - U TIENU MAAMA TILI 2013

¹ O Diedo yedi yaa maama n tie ne: «N baa fiini yaa tafaagu n bolindi Babilonni Leni Lebi-Kamayi yaaba po.

² N baa soani Babilonni kani yaaba n baa lendi, Ki yogidi ki ñani o diema niba kuli. U nufanu n baa pua o yaa daali, Bi niba baa ña i kaani kuli ki fii ki sedi o po.»

³ Da cedi mani Babilonni dabantuado Yua n kpali o dabanli, Bi yua n kpiagidi o yuli o gbankoandigu po, Bi o jawaaba yaaba n dagidinni toabu. Bolini mani o toagoli kuli.

⁴ Ban pua ki lu ba Kalide yaaba diema nni, Ki muu ki kpa ba Babilonni sani nni,

⁵ Kelima bi diema tudi hali boncianla O Diedo Isidayeli Tienu Yua n gagidi ki ŋani po. Isidayeli leni Juda Tienu naa bodi, Bi naa luo Li Miali Diedo U Paaciamu Kuli Daano.

⁶ Sani mani ki ña Babilonni nni, Yuakuli n faabi o miali! Yeni yaa ka o Diedo n baa cuo o O tudima po yaa yogunu, yi baa bodi. O baa pa o o tuona panpaani.

⁷ Babilonni den tie o Diedo nuu nni, Wula tadiñokaaga yo, Yaa tadiñokaaga nni ke tinga kuli ñuni ki gaadi. I nibuoli ñuni ki daama ke mi cuo ba.

⁸ Babilonni li fii yenma ki baa ki mudi. Mua mani o po, Tieni mani mi kpama o nala po. Daalinba o baa paagi.

⁹ Ti bi bua ki paagi Babilonni, Ama o kan fidi ki paagi. Ña mani o niinni, Yuakuli n guani o diema nni, Kelima o buudi baa pundi hali tanpoli, Ki kpedi ki pundi hali ti tawadi.

¹⁰ O Diedo, teni ti teginma n doagidi. Cua mani Siyon nni, Tin togidi o Diedo ti Tienu n tieni yaala.

¹¹ Sondi mani yi piemi bonŋanla. Gbieni mani yi luona! O Diedo jagi ki bolini Babilonni. O fiini Medi yaa badiba yo, Ke ban soani li tuonli. Li tie o pantuuli yaa yogunu yo, Wan baa tuu li panli o diegu po yaa yogunu.

¹² Fii ki sedi ki yie mani Babilonni bilini po. Pugini mani yaaba n guu u paalu. Baa mani yaaba n baa yaa se ki diidi. Dia ba mani ti dadi, Kelima o Diedo yedi yene Babilonni yaaba po. O tieni wan bili ke o baa tieni bi po yaala.

¹³ Fini yua n kaa mi ñincianma kani, Ki pia ŋalimani boncianla, A dana gbeni, A gaa a ñuadi kuli.

¹⁴ Li Miali Diedo U Paaciamu Kuli Daano poli Wani o ba yaa yeli nni ki yedi: «N baa gbieni a leni bi niba Nani a dondoba yeni. Bi baa kpaani a po i pamandankpaani!»

¹⁵ O Diedo tagi ki tinga leni o paalu, Ki diani u tinbianu leni o yanfuoma, Ki tieni ti tawadi mo leni o banma.

¹⁶ O yaa maadi se mi ñima n dogini ti tawadi nni. O yen teni ti tawadi n fii Ki tieni mi tañigima ki taaga po. O yen ñani u tafaalu wun ye naani.

¹⁷ Nilo kuli banma yen ti teni Wan tua yanpiidaano. Yaaba n duadi i buli se ke i fe pia ba, Kelima bi buli tie faame. O buli li tie boandi bebe, Fuomiba kuli ki ye o niinni.

¹⁸ Laa bonla kuli tie fanma. Li tuonli ki pia mayuli. Bi fala yaa cua yaa yogunu, Likuli baa bodi.

¹⁹ Yua n tie Jakob biinu, Naa tie nani bi buli yeni, Kelima wani n die likuli. Yua n tagi li ŋandunli yeni n go die Isidayeli. O yi Li Miali Diedo U Paaciamu Kuli Daano.

Babilonni juodima

²⁰ O Diedo yedi: «A den tie n po jatiagu bu toabu po. N teni ke a nugi i nibuoli boncianla, Ki teni ke a bolini yaa diema n ki wa.

²¹ N teni ke a nugi o taamo leni yua n jagi o. N teni ke a nugi ku teligu leni yua n jagi ku.

²² N teni ke a nugi o joa leni o pua. N teni ke a nugi o jakpelo leni ki biga. N teni ke a nugi o jawaalo leni o jafaano.

²³ N teni ke a nugi o yankpaalo leni o yankulu. N teni ke a nugi o kpakpaalo Leni wan ko leni yaa yandi. N teni ke a nugi guveneerinba leni bi bujiaba.

²⁴ N baa guani Babilonni leni Kalide yaaba kuli, Ban tieni Siyon yaa biadima kuli yi nunbu nni. Mini o Diedo n yedi yeni.

²⁵ N fii ki sedi a po, fini mi bolinma juali! O Diedo n yedi yeni. Fini yua n den bolini ki tinga kuli, N baa fii ki yie a po, Ki teni ŋan ña li juali yuli po ki bilini ki baa, Ki tua yaa juali n co u mu.

²⁶ Bi kan go ñani a kani mi logidima tana bi tanpuukaana, Kelima a baa tua li paboanli bonla. Mini o Diedo n yedi yeni.

²⁷ Sieni mani li jakoandicabili mi diema nni. Piebi mani li naatuntunli i nibuoli siiga! Yini mani i nibuoli kuli n taani, Ararati, Minni leni Asikenasi diema nni! Teni bi toatieba yudanba N lingi bi toatieba o po, Ki lingi i taami o po, Ban taani nani i naaci tawaligu yeni.

²⁸ Taani mani i nibuoli ki fii o po Leni Medi badiba, O guveneerinba, o bujiaba Leni ban die yaa diema kuli!

²⁹ O Diedo n den bili ke o baa tieni Babilonni diema yaala yaa tieni yaa yogunu, Ki tinga baa waagi ki jeli banbani. O baa teni Babilonni diema n tua diegbengu, Niba n ki go ye naani.

³⁰ Babilonni jakoanda gbali bu toabu, Ki sani ki wuoni a toadiena nni. Bi jie ki luodi, Ki kpandi ki tua puoba. Bi juu mi diema u mu, Ki mudi mi buliñoaluoditi sendabila.

³¹ A tonda lebidi biyaba ki tiini tontoni Ki bua ki ban pa Babilonni bado laabaali, Ke bi fie u dogu kuli cain.

³² U taginkaanu ki yaa, Bi sia ban dugi yaa kaanpaali po. Bi toatieba jie ki luodi,

³³ Kelima Li Miali Diedo U Paaciamu Kuli Daano, Isidayeli Tienu n maadi yaa maama n tie ne: Bi nugi Babilonni nani u jalu yene. Li kan go waagi ke u jetaagu yogunu baa pundi o po.

U Tienu baa tuu o niba po li panli

³⁴ Nebukanesa Babilonni bado dini nni, Ki liadi nni, ki fiadi nni, Ki teni ke n tua nani Ban fiadi yaa bobili yeni. O nali nni, nani o bonfuodibiado yeni. O gbieni o tugu leni n lonlogo.

³⁵ Yaa biadima n bi baa jiidi n yuli po, N jiidi Babilonni po. Yua n ye Siyon baa fidi ki yedi ke, O soama n jiidi Kalide yaaba po. Jerusalemi moko baa fidi ki yedi yeni.»

³⁶ Lani n teni ke o Diedo maadi nanda: «N baa koani ki gaa ŋa! N baa teni Babilonni ñincianma n ñuudi. N baa teni o ñinbunli n ñuudi.

³⁷ Babilonni baa kpandi diegbengu, I tanboe yekaanu, Likani n tua pakili leni laadi bonla. O kaa go pia niba mo.

³⁸ Bikuli baa taani ki duni nani A yangbanbisaaga yeni. Bi baa duni nani o yangbanñua bila yeni.

³⁹ Ban tongi bi gbani, N baa bogini bi po bi jiema, N baa ñuni ki guoni ba leni mi kuuma, Ban guani ki kan go fundi abada. Mini o Diedo n yedi yeni.

⁴⁰ N baa pigi ki gedini ba u yankodikaanu nani i pe yeni, Nani a ŋuabuana leni a petona yeni, n baa gedini ba u yankodikaanu.»

I wanli Babilonni po

⁴¹ Bee? Bi cuo Sesaki! Ki tinga kpiagidi kuli bodi. Babilonni guani ki kpandi paboanli bonla I nibuoli kuli siiga.

⁴² Bee? Mi ñincianma pundi o kani Leni ku fuugu boncianla. Mi ñima milini Babilonni.

⁴³ O dogi kpandi ki tua pabiidili kaanu. Likani kpandi ki tua tinkuonga Nilo n ki kaa yaa dogu nni, Nisaalimialiba mo n ki poandi naani.

⁴⁴ N baa fii ki sedi Beli po Babilonni nni. N baa lobidi wan kpibi yaala o ñoabu nni. I nibuoli kan go yaa tigibi ki caa o kani. Ba Babilonni bilinu ŋmadi ki baa.

⁴⁵ Ña mani bi siiga, n niba. Yuakuli n faabi o miali Ki foagidi leni o Diedo pabienli.

⁴⁶ Yi jigi n da ti cie, ki teni yaa laabaali n sandi mi diema nni yeni, n puoni yi ti jawaandi, kelima dunla o naa laabaalo n ye, binli po mo laabaalitoa didi. Ki mabinga baa yaa kandi mi diema nni. Paatielo baa fii ki deli paatielo.

⁴⁷ Lani n teni ke a dana kpendi, ke n baa fii ki sedi Babilonni buli po. O diema kuli baa yaa ye i fe nni. O niba kuli baa kpe o diema nni.

⁴⁸ Lanwani, i pamandanyani baa fii ki loli tanpoli leni ki tinga nni, kelima Babilonni tingbali po. Yaaba n kpendi ki baa baa ba, baa ña nujienu po. Mini o Diedo n yedi yeni.

⁴⁹ Babilonni baa ŋmadi ki baa, kelima Isidayeli tinkpiba yaa po, nani Babilonni wani o ba n teni ke li ŋandunli kuli niba baa maama yeni.

⁵⁰ Yaaba n ciadi ki jugisiega, sani mani, da sedi mani! Yaa tiadi mani hali foagima o Diedo po, ki nan da sundi Jerusalemi mo yaa po!

⁵¹ Ti yaa gbadi u nisugidu yaa yogunu, i fe yen cuo ti hali boncianla. Tii yen bani tin caani ti yula naani, bi canba n cua yaa yogunu o Diedo kaangagidiŋamu nni.

⁵² Diidi o Diedo yedi ke a dana kpendi, ke o baa fii ki sedi ban tagi yaa buli po. O diema nni mo kuli, yaaba n poagili ki baa kpe, baa yaa duni.

⁵³ Ba Babilonni yaa kpedi hali ki siigi ti tawadi, ba bi yaa tieni maama ke bi kan fidi ki kua bi dopaali nni, n baa soani yaaba n bolindi n baa o. Mini o Diedo n yedi yeni.

⁵⁴ Cengi mani, Babilonni dogu nne, ke i kuudi fii ki loli leni yaa lancianbu n tiendi, kelima Kalide yaaba diema mudima po.

⁵⁵ O Diedo n bolindi Babilonni, ki teni ke u nialiciamu ŋmini. Ba bi kuudi yaa bi tie nani a ñingola dunli yeni, li baa ŋmini.

⁵⁶ Yeni yua n baa bolini nagidi Babilonni kani, o baa baa o, ki cuo o jakoanda, ki kua bi dabana, kelima o Diedo tie yaa Tienu n bani ki tuu li panli. O pa yuakuli o tuona panpaani.

⁵⁷ N baa ñuni ki gaadi o koanbala, o yanfuodanba, o guveneerinba, o bujiaba leni o jakoanda. Bi baa guani yaa guama ke bi kan go fundi. Bi kan go fundi abada. O Bado yua yaa yeli n tie Li Miali Diedo U Paaciamu Kuli Daano n yedi yeni.

⁵⁸ Li Miali Diedo U Paaciamu Kuli Daano n go yedi mine: «Babilonni bilinciami baa baa cain. U mu baa juu o buliñoana Ya n kpedi boncianla yeni. Bi niba baa sua ke bi soani fanma po yo. I nibuoli baa sua ke bi coagi bi yula u mu po.»

Ban luni yaa tondu Efrati kpenu nni

⁵⁹ Sedesiasi bali binnaali, o bado guudikaaba yudaano Seraya leni wani Juda bado Sedesiasi, n den caa Babilonni yaa yogunu, o saawalipualo Jeremi den soani ba u tondu.

⁶⁰ Jeremi den diani li tili nni yaa fala n baa baa Babilonni. Laa maama kuli den diani li tili nni Babilonni po.

⁶¹ Jeremi den yedi Seraya: «Ŋan moandi a yaa pundi Babilonni, ŋan cogi laa maama kuli.

⁶² Ŋan yedi: ‹O Diedo, fini a ba n bili ke u kaanu na baa kpandi ki tua diegbengu, ki kaa go taa baanli nni. U baa yaa tie niba leni yandi n ki ye naani. Lan tua diegbengu yaa yogu n tuu yaa yogu.›

⁶³ A yaa ban cogi ki gbeni li tili na, ŋan gbini li leni li tanli, ki lu li tanli yeni Efrati kpenu siiga. Lani yaa pendi, ŋan yedi:

⁶⁴ ‹Babilonni n baa bodi cain maama n yeni. Min baa teni yaa fala n baa o n yeni. O kan go fidi ki fii ki sedi.› » Jeremi maama kuli n yeni.