Jeremi 5 - U TIENU MAAMA TILI 2013

Yaa dogu yaa yema n biidi cain

¹ Gaani mani Jerusalemi sani nni, ki diidi. Buali mani ki gaa laabaali. Lingi mani bi niba n yabi naani, Ki le yi yaa baa le ba niyendo, Yua n tiendi yaala n tiegi, Ki bua i moamoani. Lani, n baa tieni Jerusalemi po sugili.

² Ba bi yaa yedi: «O Diedo fo!» Bi polini faama bebe.

³ O Diedo, ŋan bua yaala ki tie I moamoani ka? A pua ba, laa koani ba mo. A nugi ba bonŋanla, Bi yie kaa gaa a bangima, Bi juagi bi pala ki cie ku tangu. Bi yie ke bi kan lebidi bi pala.

⁴ N den yedi: «Bi yama ka, Bi tuuni gaadituonle, Kelima baa bani o Diedo sanu, Baa bani bi Tienu bali maama mo.

⁵ N baa gedi a nigbenga po, Ki ban maadi leni ba mini n ba, Kelima bani wani bani o Diedo sanu, Bi bani bi Tienu bali maama mo. Bi bani bi Tienu n bua yaala.» Ama bikuli tie yenme, Bi miidi li bali maama, Ki fidi bani leni U Tienu ŋantaado.

⁶ Lani n teni ke li fuali nni yangbanlo baa kpa ba, O fuasangbanlo baa ŋmani ki toadi toadi ba, Ki gbiiga se bi dogu buliñoana kani, Ki guu ba. Yaaba n baa ña kuli, o baa toadi toadi ba, Kelima bi yiema yabi hali boncianla. Bi yenyiema mo yabi ki kandi.

⁷ Naani lani n baa teni min pa ŋa sugili? A bijaba ŋaa nni, Ki polini leni i buli. N den puni ba li jeeguoli ke bi fii ki conbi. Bi taagi ki kadi li puoconconli dieli nni.

⁸ Bi tie yaa tanjala n dini ki guo, Yuakuli ŋua ki coa o yieninlielo pua puoli.

⁹ Mini o Diedo yedi: «Naani n kan fii ki yie laa bonla po? Naani n kan fii ki tuu laa nibuolu li panli?»

¹⁰ Do mani u dogu bilini po, Ki pua ki mudi mudi yi. Ama yin da bolini yi cain. Ñani mani i beni, kelima o Diedo ki die yi.

¹¹ Isidayeli leni Juda yaaba kuli janbidi nni. Mini o Diedo n yedi yeni.

Mi yiema n baa cuani yaala

¹² Bi pia i boandi o Diedo po, Ki tua ke o Diedo ki ye, Fala kan baa ti, Koma mo kan baa ti ki buali toabu.

¹³ Bi go tua ke bi saawalipuaba li wolini bebe yo, Ke baa pia mamoanma ki baa maadi. Ban tua ke yaala n kpendi yeni n cua bi yula po.

¹⁴ Lani n teni ke o Diedo U Tienu U Paaciamu Kuli Daano yedi: «Nani ban maadi laa maama yeni, N baa teni min kuani fini Jeremi Ñoabu nni yaa maama yeni, N buoni ba nani ti daadi yeni.

¹⁵ Mini o Diedo n yedi yinba Isidayeli yaaba, N baa teni u nibuolu n ña foagima, Ki cua ki koani leni yi. Laa niba baa yaa pia u paalu boncianla. Laa nibuolu ye hali yogu. Yii gba laa nibuolu maama, Yi kan bandi wun maadi yaala mo.

¹⁶ Bikuli tie jakoandibiada yo, Ke bi luona mo tie takuyaama.

¹⁷ Bi baa je yi kpaandi leni yi jiema, Bi baa je yi bijaba leni yi bisiaba, Yi yangbenga leni yi yanbidi kuli, Yi duventiidi leni yi kankandi. Bu toabu baa bolini yi dopaali, Yin ye naani ki tama ke puu kan nandi yi yeni.

¹⁸ Ama ba laa dana nni moko, n kan bolini yikuli cain.» Mini o Diedo n yedi yeni.

¹⁹ Li yaa tie ke yi yedi: «Be yaa po yo ke o Diedo ti Tienu tiendi ti line?» Ŋan guani ki yedi ba: «Yaala n teni ke yi ŋaa nni, ki soani bi nilanba tieni po yi dogi nni yeni, lani n teni ke yi baa soani bi canba po, yaa dogi n ki tie yi docele nni.»

Bi nisaaliba yiema biidi ŋanduna

²⁰ Waani mani Jakob puoliŋuani yaa maama n tie ne: Teni mani Juda diema yaaba moko n gaa laabaali.

²¹ Cengi mani line, Yinba yaa niba n ki pia yama, Kaa pia kpaagili mo. Yinba yaaba n pia i nuni ki naa nua, Ki pia a tuba ki naa gba liba.

²² Mini o Diedo yedi: Naani yi kan yaa fangi nni? Naani yi kan yaa digibi n nintuali? Mini yua n teni ke mi tanbiima N tie mi ñincianma banlu, Yaa banlu ke mi kan fidi ki kandi abada. Mi ñingola lengidi, ama ŋaa pia paalu. Mi duni, ama mi kan fidi ki kandi.

²³ Ama bi naa niba pala juagi ki go pa. Bi piadi ki sedi ki sani ki foagidi.

²⁴ Baa tua bi pala nni: «Tin fangi mani o Diedo ti Tienu, Yua n puuni ti ki taaga ki yogunu, Ki takpiaga leni ki tayuankaaga, Ki bili a dana u jetaagu po.»

²⁵ Yi tagili n biidi likuli, Yi tuonbiadi mo n muni yi laa baali kuli,

²⁶ Kelima n niba siiga pia bi nibiadiba. Bi cuodi nani bi dia i nuani yeni, Ki bili bi diadi ki bua ki cuo bi niba.

²⁷ Nani i nuani n gbie ku cibiligu nni maama, Bani moko yaa diena gbie leni i janbi yene. Bi tiendi yene ki baadi ŋalimani ki kpandi paatieba.

²⁸ Bi noadi bonŋanla ke bi gbani ñuliti, Bi tuongunda ki pia bianu. Baa koani ki baa gaa ki kpienbiga, Bi bonla kuli cuoni bi po bonŋanla. Bi baga ki ye leni luodo.

²⁹ Naani n kan fii ki sedi laa niba po? Naani n kan fii ki tuu u naa nibuolu li panli? Mini o Diedo n yedi yeni.

³⁰ Li pabiidili leni yaala n gundi Tieni mi diema nni.

³¹ Lani n tie: Bi saawalipuaba pua mi saawalifaama, Bi kopadicianba lingi bi yucela ŋamu bebe, N niba mo sua ke lani n dagidi bi po. Yi baa tieni lede saala po?