Jeremi 49 - U TIENU MAAMA TILI 2013

Yaa saawalo n ye Anmoni yaaba po

¹ O Diedo maadi Anmoni yaaba po yaa maama n tie ne: «Naani Isidayeli ki pia bijabe? Waa pia yua n baa je o faali yo? Be yaa po yo ke Anmoni yaaba bado diedi Gadi, Ke o niba mo baa yaa ye Gadi dogi nni?»

² Li tie lani yaa po ke o Diedo yedi: «A dana kpendi ke n baa teni Bu toabu bubula n fii ki loli Anmoni yaaba dociamu nni. Raba baa tua paboanli kaanu. U mu baa je likani n die yaa tinbuona kuli. Isidayeli yaaba baa guani ki gaa ban den die yaala. O Diedo n yedi yeni.

³ Hesibon, buudi kelima Ayi pua nufanu! Yinba yaaba n kaa ki kuu Raba, Kuudi mani! Yie mani li paboanli tiadi! Mua mani i kumoe, Ki ña ki yaa baali i bilini kunkuni, Kelima o bulo Milikom baa gedi ti yonbidi, Wani, o kopadicianba leni o koanbala kuli.

⁴ Raba, be yaa po yo ke a pagi a gbanmanu? A gbanmanu gbeni n yeni! A bia n yeni, Fini yua n den dugi a ŋalimani po, Ki tua: ‹Ŋme n baa tuo ki cua ki baa nni?› »

⁵ Li Miali Diedo U Paaciamu Kuli Daano yedi: «N baa teni i jeje n cuo ŋa, Ki gaani ki cebini a i kaani kuli. Bi baa deli yikuli, Yuakuli n sani ki teli o nintuali, Oba kuli kan fidi ki yini ki taani yaaba n tiini.

⁶ Ama li yaa puoli n baa teni Anmoni yaaba yonbi n guani ki kpeni.» O Diedo n yedi yeni.

Yaa saawalo n ye Edomi po

⁷ Li Miali Diedo U Paaciamu Kuli Daano maadi Yaa maama n tie ne Edomi yaaba po: «Naani yanfuodanba ki go ye Temani? Naani i tundi bodi o bijaba kani? Naani bi yanfuoma kuli bode?

⁸ Yinba Dedani yaaba, Sani mani ki ban wuoni ti tanlondi nni, Kelima n teni ke o falabiado baa Esayu. O fala daali n pundi, Yaa daali ke o baa togidi yaala n ye.

⁹ Yaaba n ñandi duven tiidi bonluonkaala Yaa cua a kani yaa daali, bi kan ŋaa liba kuli. A suuda yaa cua ku ñiagu, Bi baa pua ban fidi yaala kuli nufanu,

¹⁰ Kelima mini n baa kpabidi Esayu. N baa doagidi o ŋalimano wuonkaani kuli. O kan go fidi ki wuoni. Bi baa bolini o puoliŋuani, O kpiiba, o yieninlieba kuli kaa go ye.

¹¹ Mini n ba baa kubi ŋan ŋaa yaa kpienbila yeni, Ki teni a kpepuona mo n yaa dugi n po.»

¹² Moamoani de! O Diedo yedi nanda: «Diidi ti buudi n ki bi ye yaaba yaa po yeni, baa ño ki tadiñokaaga tiladi, amo n tua i moamoani daano? Lani kan tuo, a kan luo tagili. Amoko baa ño ka.

¹³ N poli mini n ba yaa yeli nni, Botisira baa tua fe bonla, li baa yaa bia o po, o dogi mo kuli baa tua diegbendi yaa yogu n tuu yaa yogu. Mini o Diedo n yedi yeni.»

¹⁴ N gbadi o Diedo kani laabaali. Bi soani o tondo i nibuoli siiga ke wan yedi: «Fii mani ki bogini bu toabu po, Ki gedi ki ban tuogi Edomi.

¹⁵ N teni ke a wa i nibuoli kuli siiga, Ke bi niba fali a boncianla.

¹⁶ Ŋan jigini a yuli maama Leni a kafaama boandi a. Fini yua n ye ti tanlondi nni Leni mu joabimu tanpoli, A yaa tieni a tiali ke li kpedi Nani jiebani yeni, N baa tudi ki lu ŋa tiipo.» Mini o Diedo n yedi yeni.

¹⁷ Edomi baa tua diegbena. Yaaba n poandi likani kuli baa diidi lan yagi bi yama, ban fuoni, kelima wan laa yaa fala kuli po.

¹⁸ Nani Sodomi, Gomori leni yaa dogi n pugidi n den baa yaa falabiado yeni, o Diedo yedi ke oba kuli kan go kali lankani. Nisaalimiali kuli kan go kali likani.

¹⁹ O Diedo yedi: «N tie nani yaa yangbanlo n ñani Jurden fuali nni, ki caa li ñinbunli po yeni. N li baa yedi bugibu yenma Ki teni Sodomi n sani, Min kaani min gandi yua, Kelima ŋme naani leni nni? Ŋme n baa waani nni min baa tieni yaala? O laa gobidika n baa niagi leni nni?»

²⁰ Lanwani, cengi mani o Diedo n taa Yaa bali maama Edomi po, Leni wan pia yaa jaga Temani po: Laa pia kuli tama, Bi baa yaa dia ba nani ti yanbidi bila yeni. Laa pia kuli tama, Bi baa pua ban ye naani nufanu, Kelima bi po.

²¹ Bi tingbali moe teni ke ki tinga digibi. O moe ban pundi hali i kpenkagi ñincianma.

²² O tie nani jiebani n fii ki yugi, Ki fidi o fiabi Botisira po maama yeni. Edomi jakoanda tugusoama sani, Nani yaa pua n bua ki maa, Tugusoama n sani maama yeni.

Yaa saawalo n ye Damasi po

²³ Yaa maama n ye Damasi po. Hamati leni Alipadi ye leni i fe, Kelima bi gaa o laabaalibiado. Bi yama lengidi nani mi ñincianma yeni. Bi ye leni i yanbani ki kan fidi ki sedi suo.

²⁴ Damasi tadigi. O pegidi ki baa sani. Mi digibima cuo o. Li paboanli leni mi loma cuo o, Nani u maditugukoanu yeni.

²⁵ Li tieni lede ke bi ŋaa Damasi dogu, Yuu yaa yeli n den ñani Ki tie n pamanli yeni?

²⁶ Landaali bi baa kpa o nipanba o dogu sani nni. O jakoanda mo kuli baa bodi. Li Miali Diedo U Paaciamu Kuli Daano n yedi yeni.

²⁷ N baa juu Damasi bilini u mu. U mu yeni baa juu Beni-Adadi badidiegu.

Yaa saawalo n ye Arabi yaaba po

²⁸ Yaa saawalo n ye Kedari Arabi yaaba leni Hatisori diema Babilonni bado Nebukanesa n paadi yaaba po. O Diedo maadi yaa maama n tie ne: «Fii mani ki sedi Kedari po Ki bolini puoli diema yeni.

²⁹ Fie mani bi gbandiena leni bi yangola, Bi tiadi, bi yuoyuodi leni bi diema kuli, Ban tiani bi po ki yedi: ‹I jeje ye i kaani kuli!›

³⁰ Sani mani, jaligi ki sani mani, Gbi mani ti buodi ki wuoni lienni Yinba Hatisori yaaba, Kelima Babilonni bado Nebukanesa Jagi ki baa fii ki sedi yi po.

³¹ O yedi: ‹Fii mani ki ban koani Leni yaa nibuolu yaa niba N kaa leni mi yanduanma, Kaa bangi liba kuli po. O Diedo n yedi yeni. Bi dogu naa pia buliñoabu, Ki buali sendabiga. U li ye u bebe yo.›

³² Bi baa fagi bi yuoyuodi, Ki tugi bi yankuli mo kuli. N baa lendi ba leni ku faagu, Ki teni fala n ña i kaani kuli ki baa Yaaba n kuoni bi langbiana kunkuni kuli. Mini o Diedo n yedi yeni.

³³ Hatisori baa tua i tanboe yekaanu Leni li paboanli kaanu yaa yogunu kuli po. Oba kuli kan go yaa ye likani. Nisaalimialiba kuli kan go kali likani.»

Yaa saawalo n ye Elami po

³⁴ O Diedo n den maadi yaa maama o saawalipualo Jeremi Elami po, Juda bado Sedesiasi bali cilima yogunu.

³⁵ Li Miali Diedo U Paaciamu Kuli Daano n maadi yaa maama n tie ne: «N baa kua Elami dabanli, Lini yaali n tie o fidu yeni.

³⁶ N baa soani Elami kani tafaalinaa. I baa ña nujienu, nuganu, puoli leni nintuali kuli. N baa lendi ba i tafaali yeni niinni. Li kan yaa pia ki tinga nibuoli siiga, Elami yaaba n kan yadi ki pundi naani.

³⁷ N baa teni Elami yaaba n jeli, Ki digibi banbani yibalinba leni yaaba n bua Ki ñani bi miana kuli nintuali. N baa teni fala n baa ba n pabienli nni. N baa teni bu toabu n ŋoadi ba Hali min bolini ba cain.

³⁸ N baa bili n bali kalikaanu Elami, Ki teni o bado leni o koanbala kuli n bodi. Mini o Diedo n yedi yeni.

³⁹ Ama u yogunu kpendi ke n baa Guani ki ŋanbi Elami. Mini o Diedo n yedi yeni.»