Jeremi 48 - U TIENU MAAMA TILI 2013

Yaa saawalo n ye Moabi yaaba po

¹ Moabi yaaba po, Li Miali Diedo U Paaciamu Kuli Daano, Isidayeli Tienu yedi nanda: «Fala nandi Nebo yaaba kelima o dogi bodi. Kiriyatayim dogu ye leni i fe kelima bi fie u. Misigaba dogu ye leni i fe kelima u baa.

² Moabi diema kpiagidi gbeni. Hesibon diema po, bi jagi yaala n bia, Ki yedi: ‹Tin ñani mani laa diema i nibuoli siiga. Madimeni, amoko li gbeni a po n yeni, Kelima bu toabu ŋua ki deli a.›

³ A bubula fii ki loli Horonayimi dogu nni, Kelima bi bolindi, ki mudi li bonla kuli.

⁴ Moabi pua nufanu n yeni! Cengi mani, o bila n buudi yeni.

⁵ Bi niba do ki caa Luhiti leni a bubula, Horonayimi jiidima mo, bi gba ke bi buudi Li paboanli bubula.

⁶ Bi buudi ki tua: ‹Yua tadi yua n pa! Sani mani, sani mani ki ña ne Ki yaa ban ye mi fanpienma nni Nani i fuaŋunbi yeni.›

⁷ Nani ŋan dugi a tuona leni a ŋalimani po yeni, Bi baa cuo fini moko. Bi baa gedini a bulo Kemosi ti yonbidi, Wani, o koanbala leni o kopadicianba kuli.

⁸ O bolindo baa kua dogu nni kuli, Doguba kuli kan cia. Ku joaloangu baa bodi, U tialu mo n bodi. O Diedo n yedi yeni.

⁹ Pa mani Moabi i fiabi wan yugi ki foagidi, O dogi baa yaa ye leni li paboanli, Yi kan go yaa pia niba.

¹⁰ U Tienu n naali yua n tuuni O Diedo tuonli leni mi gbefema, Ki muni o jugisiega mi soama.»

¹¹ O Diedo yedi: «Moabi den ye leni mi yanduanma Hali o panma nni. O den li kaa kaanyendu yo, Bi naa den gedini o yonbidi kaanuba. Waa den yagini o yama bonliba kuli po, Nani yaa daama n baani yeni. Bi naa den taa ma ki kuodi ki lebidi tiatoagu nni, Maa lebidi, mi li baa ki tie yenme. Baa mi nuulu moko naa lebidi.

¹² Lani n teni ke o Diedo yedi ke a dana kpendi, ke o baa soani bi niba, ban kuodi ki lebidi ma. Bi baa baadi man ye yaa boba kuli yaa niinni, ki mudi a.

¹³ I fe baa cuo Moabi yaaba bi bulo Kemosi po, nani yin den cuo Isidayeli yaaba bi bulo yua n den ye Beteli po maama, ban den dugi wani yua yaa po yeni.

¹⁴ Yi baa tieni lede ki yedi ke yi tie jakoanda, Yaa toatieba n bogini bu toabu po?

¹⁵ Yua n baa bolini Moabi diema cua, Ki baa mi dogi. Moabi nipanba tua yankodikaadi. Yaa bado n yi Li Miali Diedo U Paaciamu Kuli Daano n yedi yeni.

¹⁶ Moabi bodima yeni cua ki gbeni, Ke mi yebiadima baa Moabi.

¹⁷ Yinba yaa nibuoli n gaani ki lindi o, Ki bani o bonŋanla yeni, Gedi mani ki faandi Moabi i kufaandi, Ki buali: ‹Li tieni lede ke u naa paalu, Yuu n pia ti kpiagidi kuli gbeni?›

¹⁸ Yinba Divon dogu yaaba, Fii mani yi kpiagidi kalikaanu, Ki kali tiipo leni u ñuñuunu, Kelima Moabi bolindo yeni Fii ki sedi yimoko yaa po! O bolini yi kaanpaali.

¹⁹ Yinba Aroyeeri dogu yaaba, Fii mani ki sedi u sanu nni ki guudi. Buali mani yaaba n tiini leni yaaba n cia yaala n tieni?

²⁰ Moabi baa, ki go ye leni i fe. Kuudi ki mia mani mi todima! Waani mani Arinoni kpenjaali yaaba Ke Moabi pua nufanu!

²¹ Ti buudi cua u tialu diema po Leni yaa dogi n tie ne po: Holon, Yatisa, Mefaati,

²² Divon, Nebo, Beti-Dibilatayima,

²³ Kiriyatayim, Beti-Gamuli, Beti-Meyon,

²⁴ Kelioti leni Botisira. O nandi Moabi diema dogi yii n kuu Leni yii n foagi kuli.

²⁵ Moabi diema paalu gbeni, mi fidu mo gbeni! O Diedo n yedi yeni.»

²⁶ O Diedo yedi: «Ñuni o mani wan gaadi, kelima o fii ki sedi o Diedo po. Moabi n yaa faligidi o siindi nni, ki guudi ki gaa i fe.

²⁷ Moabi, naani laa tie moamoani ka, ke Isidayeli tie a po ñuali bonla? A den cuo o a suuda siiga yo, ki baa yaa maadi o maama ki digini a boacaba?

²⁸ Yinba Moabi yaaba, Ña mani i dogi nni ki ban yaa ye a juana nni. Tua mani nani yaa kpaajiega n tiendi o tiali Mi joayidima po yeni.

²⁹ Ti gba ke bi maadi Moabi japaadi maama, O kafaama, wan jigini o yuli maama Leni wan faadi o yuli ke li duodi maama.

³⁰ N bani o japaadi po, ama tii pia yuli. O Diedo n yedi yeni. O japaadi leni o tuada kuli ki pia yuli.

³¹ Lani n teni ke n kaliti Moabi po, N kpaani Moabi kuli po, Ki yenbidi Kili-Elesi yaaba po.

³² N mua Sibima duven tiidi kuanu po, Ki cie min mua Yaeseli yaaba po maama. A beni den tandi ki pendi mi Ñincianyaama, Ki ban pundi Yaeseli ñincianma. O bolindo gedi ki baa a kpaandi Leni a duventiidi bonluonkaala.

³³ Li pamankandikaali gbeni u kuanu Leni Moabi diema nni kuli. N teni ke mi daama gbeni a boba nni. Niba ki go ye yaaba n baa tuoni Duven tiidi bonluonkaala Leni i pamandankuudi.

³⁴ Hesibon bubula pundi hali Eleale, ki ban tuodi hali Yahatisi, ki ña Tisoari ki caa hali Horonayimi leni Egilati-Selisiya, kelima Nimirimi moko yaa ñima tua paboanli kaanu.

³⁵ Moabi diema niinni, n baa bolini yaa niba n caa ki padi a pada i buli po a juana padibinbina po. O Diedo n yedi yeni.

³⁶ N mua n pali nni Moabi leni Kili-Elesi niba po, nani ki kuyeliga n piebi maama yeni, kelima ban baa yaa ñuadi kuli bia fanma.

³⁷ Li paboanli teni ke bi niba kuo ti kuyudi, ki koagidi bi langbiadi, ki badi bi nii kuli i be. Bi niba kuli la ti paboantiadi.

³⁸ Moabi diedi yula kuli po leni mu daamu nni kuli, bi muandi mi kuuma, kelima n mudi Moabi nani ban kaa go bua yaa bobili yeni. O Diedo n yedi yeni.

³⁹ Diidi mani wan jie ki luodi maama, mua mani! Moabi buli o nunga kelima i fe po. Moabi kpandi ti laadi leni i jeje bonla yaaba n gaani ki lindi o kuli po.»

⁴⁰ O Diedo yedi nanda: «Diidi o bolindo yugi nani jiebani yeni, Ki fidi o fiabi Moabi po.

⁴¹ Yibali fie Keriyoti leni Mesatidoti. Moabi jakoanda tugusoama tiini, Nani yaa pua n baa maa, Yaa tugusoama n tiini maama yeni.

⁴² Moabi baa bodi, o kaa go tie nibuolu, Kelima o fii ki sedi o Diedo po.

⁴³ Ti jawaandi, ku buogu leni i taali Ye yinba Moabi yaaba yaa po yo. O Diedo n yedi yeni.

⁴⁴ Ti jawaandi n deli yua, Baa baa ku buogu nni. Yua n ñani ku buogu nni mo, Baa baa i taali nni, Kelima n baa teni o falaciamo n cua Moabi po. Laa binle ke o baa togidi yaala n ye. O Diedo n yedi yeni.

⁴⁵ Hesibon soangu nni, Yaaba n sani ki coagi cua ki wuoni. Ama u mu ña Hesibon kani, U mu ñani Siyon dogu niinni. U juu Moabi kali Leni bi tugumoandanba yukuokuodi.

⁴⁶ Fala n baa ŋa, fini Moabi! Fini o bulo Kemosi niba mo bia n yeni, Kelima a bijaba gedi ti yonbidi, A bisiaba mo kuli kua li kpaadidieli nni!

⁴⁷ Ama li daali kpendi, Ke n baa guani ki ŋanbi Moabi. O Diedo n yedi yeni.» Lani n tie Moabi diema buudi gbenma.