Jeremi 46 - U TIENU MAAMA TILI 2013

Jeremi saawalilielo i nilanbuoli po 46—51

¹ Diidi o Diedo n den maadi Jeremi yaa maama i nibuoli kuli po:

Karikemisi toabu

² U Tienu n den maadi yaa maama Ejipiti diema po, mi bado Faraon Neko leni o toagoli po. Wani Ejipiti bado yeni den ye u kpenciamu Efrati kani Karikemisi dogu nni, Babilonni bado Nebukanesa n den cua ki pua ki paadi o yaa yogunu. Li den tie Juda bado Josiasi bijua Joakimi bijua bali binnaali binle.

³ Babilonni toatieba yudanba den tangi ki tua: «Caligi mani a gbankoanditi buoli kuli bu toabu po.

⁴ Doali mani yi taami, Yinba bi tandanba, jagini mani yi taami. Cua mani leni a kusana, Luani mani yi kpaana, Ki la ti kudi liada.»

⁵ Be n tieni? N nua be mo nne? Bi jigi kuli cie ke bi sudi puoli po. Bi pua ki guli bi jakoanda. Moala wani yua n tadi yua n pa jige! Oba kuli ki go tiini ki gbegidi ki nua! Ti jawaandi bebe n ye i kaani kuli. O Diedo n yedi yeni.

⁶ Yua n yua ki cie bikuli kan fidi ki fondi ki sani! O jakoando mo kan fidi ki sani ki cia! Nujienu kpenciamu po leni Efrati boanjaana po, Bi tuudi ki ŋmadi ki baali moko.

⁷ Ŋme mo n do nani u kpenciamu Nili yeni, Yuu yaa ñingola n pu loabiloabi?

⁸ Ejipiti n naani leni Nili yuu n gbie, Ke u ñingola mo pu loabiloabi. Ejipiti den tua: «N baa fii ki milini ki tinga, N baa bolini li dogi leni li niba kuli.

⁹ I taami, ña mani! Ti teliti, yi tiini mani! A jakoanda, ña mani! Yinba Etiopi leni Puti diema yaaba, Yaaba n bani li gbankoandigu mubinma, ña mani. Yinba Ludi yaaba, yaaba n bani li dabanli bonŋanla, ña mani!»

¹⁰ Ama landaali tie Li Miali Diedo U Tienu U Paaciamu Kuli Daano po yo. Li tie pantuuli daali. O baa guani o yibalinba bi panpaani. Ki jugisiega di, ki baa je ki guo, Ki ño mi soama bonŋanla, Kelima li tie li padili, Li Miali Diedo U Tienu U Paaciamu Kuli Daano po, Nujienu diema nni, Ki goa u kpenciamu Efrati po.

¹¹ Yinba Ejipiti yaaba, gedi mani Galaadi po, Ki ban lingi u ñoagu. Ama likuli ki pia yi po fuomiba, Kelima liba mo kuli kan fidi ki buu yi.

¹² I nibuoli kuli gbadi yi fe laabaalo. Yi bubula mo gbieni ki tinga, Kelima jakoando baa tuudi jakoando, Bikuli n taani ki baa.

Bi baa Ejipiti diema

¹³ O Diedo den maadi yaa maama n tie ne o saawalipualo Jeremi, ki waani ke Nebukanesa Babilonni bado baa cua ki baa Ejipiti diema bu toabu.

¹⁴ Waani mani laa bonla Ejipiti diema nni. Teni mani Migidoli yaaba n gaa laabaali. Teni Memifisi leni Tapanesi yaaba n gaa laabaali. Yedi mani: «Cua mani ki bogini bonŋanla Kelima bu toabu dini yi gaanilindima niba kuli.»

¹⁵ Be n teni ke yi bulo Apisi baa? O Diedo n pua ki guli o.

¹⁶ O Diedo n teni ke bi toatieba Boncianla jadibi jadibi, Ki ŋmadi ki baali biyaba po ki tua: «Fii mani tin guani ti diema nni, Ki foagidi leni bu toabu leni bu fala.»

¹⁷ Lanpo bi tangi ki tua: «Ban yini Ejipiti bado Faraon yaa yeli n tie ne: “Lanpaabu fanma fanma bebe.”»

¹⁸ O Badiciamo yedi: N ye, mini yua yaa yeli n tie: Li Miali Diedo U Paaciamu Kuli Daano, N ye nani Tabori, a juali kuli siiga, Ki se nani Karimeli juali mi ñincianma nni. N baa cua ki baa Ejipiti diema.

¹⁹ Yinba Ejipiti diema yaaba, Loli mani yi tiadi dietoama gedima po, Kelima Memifisi baa kpandi ki tua, Paboanli kaanu, Bi baa juu likani, Nilo kan go yaa ye likani.

²⁰ Ejipiti tie yaa naasalo n ŋani bonŋanla. Ama ki naasibiadiga ñani nujienu po ki cua ki tabini o.

²¹ Ejipiti diema nni, ba ban daa yaa toatieba Lebidi ki sani. Ba ke bi wubi ba nani a naatonbila yeni, Oba kuli naa sedi ki baa mua jama, Bi fala daali, Yaa daali n bi tie ban sedi jama.

²² Bi yibalinba toagola n nagini yaa yogunu, Ejipiti yaaba sani ki mua nani i we yeni. Bi cua ki baa ba leni a yala nani a dayagila yeni.

²³ Pedi mani bi fuali tiidi, Ba ke lienni kuama ki dingi, Kelima bi yabi nani a dondoba yeni, Ke bi coali mo ki pia bianu. O Diedo n yedi yeni.

²⁴ Ejipiti diema niba fiagi, Bi luni ba nujienu nibuolu nuu nni.

²⁵ Li Miali Diedo, U Paaciamu Kuli Daano, Isidayeli Tienu yedi: «N fii ki sedi Tebesi yaaba bulo Anmoni po, Ejipiti buli po, o badiba po leni yaaba n dugi o po kuli po.

²⁶ N baa lu ba, yaaba n bua ki ñani bi miana nuu nni. N baa lu ba Babilonni bado Nebukanesa leni o toagoli nuu nni. Li yaa puoli, Ejipiti diema baa guani ki tua nani man den kpa tie maama. Mini o Diedo n yedi yeni.

Isidayeli baa mi faabima

²⁷ Fini Jakob n naacemo, da jie liba. Yi jigi n da cie, yinba Isidayeli puoliŋuani, N kpendi ki baa faabi a, Fini Jakob buolu. N baa faabi a puoliŋuani, Min den yadi yaaba ke bi ye yaa diema n foagi nni. Jakob puoliŋuani baa guani Ki baa mi yanduanma. Liba kan go yagi bi yama.

²⁸ Fini Jakob, n naacemo, Da jie liba, o Diedo n yedi yeni. N ye leni a, ki baa bolini i nibuoli kuli, Min den yadi yi yaaba yaa siiga yeni. Ama fini wani, n kan bolini a, N baa mabini a bebe, N kan ŋaa ŋa nani yua n ki pia tagili yeni.»