Jeremi 45 - U TIENU MAAMA TILI 2013

O Diedo maama Baruki po

¹ Josiasi bijua Joakimi Juda bado bali binnaali, o saawalipualo Jeremi den maadi ke Neriya bijua Baruki dangi. O den yedi:

² «O Diedo Isidayeli Tienu maadi Baruki po yaa maama n tie ne.

³ A yedi: ‹Fala baa nni! Mii den pia yanduanma ka ke o Diedo mo nan go pugini n yanyagidi. N ñiindi ñiindi hali ki ban coagi! Fuodima mo ki ye n po.›

⁴ Ŋan baa maadi o maama nne: ‹Diidi, ki tinga nni kuli, n baa bolini min maa yaala. N baa ŋabi min ŋuu yaala.

⁵ Amo ki lingi yaali n yabi ka te? Ŋan da go lingi la, kelima n baa cuani mi yebiadima mialifo kuli po. Mini o Diedo n yedi yeni. Ama n baa ŋaa ŋa leni li miali, ŋan baa gedi naankani kuli.› »