Jeremi 44 - U TIENU MAAMA TILI 2013

Yaa tondu n ye yaaba n ban wuoni Ejipiti diema nni po

¹ O Diedo n den yedi Jeremi yaala, Jufinba yaaba n ye Ejipiti diema nni kuli po, ki kaa Migidoli, Tapanesi, Memifisi leni Patilosi diema nni.

² Li Miali Diedo U Paaciamu Kuli Daano, Isidayeli Tienu yedi: «Yi laa min teni ke yaa fala n baa Jerusalemi dogu leni Juda. Dinla laa dogi kuli tie diegbendi. Niba ki ye i niinni.

³ N tieni la, kelima ban tieni yaa biadima po yo. Bi juugi a dugibila, ki gedi ki ban gbaani ki pugi bani leni bi baanba n kaa den bani yaa tieni, ki biidi n pali.

⁴ N lindi ki tuuni yi kani n naacenba bi saawalipuaba u yogunu kuli ke ban yedi yi: ‹Yin da tieni min nani yaa cancagintuona.›

⁵ Ama yi naa cengi, yi naa diadi yi tuba ki baa cengi, yi naa cedi ban den tieni nni yaa bonbiadila, yi naa ŋaa a dugibila juuma tientoe po.

⁶ N den jiini n pabienli leni n mutuoli, ki juu Juda diema dogi leni Jerusalemi sani, ke likuli kpandi diegbendi leni pabiidili kaani, nani tin nua ke li tie maama dinla yeni.»

⁷ Jeremi den pugini ki yedi: «Moala Li Miali Diedo U Paaciamu Kuli Daano, Isidayeli Tienu buali yi i naa buali: ‹Be yaa po yo, ke yi tiendi yi yula yaala n bia? Naani yi bua ki teni Juda n luo bi jaba, bi puoba, a bila leni a canpanda yo? Naani yi bua liba kuli n da go sieni yi kani yo?

⁸ Yi biidi n pali leni yi bontienkaala, kelima yi juugi a dugibila Ejipiti diema tieni po, yin cua ki wuoni naankani. Naani yi bua ban bolini yi, yin tua ti solindi leni fe bonla ki tinga nibuoli kuli siiga yo?

⁹ Naani yi sundi yi baanba, Juda badiba leni bi puoba, yinba leni yi puoba n den tieni yaa tuongunda Juda diema nni leni Jerusalemi sani nni?

¹⁰ Hali ki ban tuoni dinla, yi naa biidi yi pala, yi naa baa fangiliba, yi naa ŋoadi min den teni yinba leni yi baanba yaa bali maama leni yaa ñoamabonbilikaana.› »

¹¹ Lani yaa po yo, ke Li Miali Diedo U Paaciamu Kuli Daano, Isidayeli Tienu yedi yaa maama n tie ne: «N baa tieni yaala n bia, ki bolini Juda diema niba kuli.

¹² N baa taa Juda niba yaaba n sieni, bani yaaba n bili ke bi baa gedi Ejipiti diema nni ki ban kali yeni. N baa bolini bikuli Ejipiti diema nni. Bu toabu leni mi koma n baa bolini li bila leni li nikpela kuli. Yeni de! Bi baa kpe laa kuume, ki tua ti solindi, li paboanli, mi falima leni u yualu bonla.

¹³ N baa fii ki sedi yaaba n ye Ejipiti diema nni po leni bu toabu, mi koma leni u yianbiadipuodiko nani min sedi Jerusalemi yaaba po maama yeni.

¹⁴ Oba kan cia, yaaba n ñani Juda ki baa cua ki wuoni Ejipiti diema nni yeni siiga, oba kuli kan ŋmadi. Oba kuli kan go ti guani Juda diema nni, bi yama n baa ki ye ban guani ki ban kali naanpo. Li yàá tie yaaba n cia siiga niyendo yendo yaa ka.»

Li padili tanpoli badipua po

¹⁵ Yaa jaba n den bani ke bi puoba juugi a dugibila yeni kuli, yaa puoba n den ye li taanli nni kuli, ki juugi a dugibila tientoe po leni yaa niba n den ye Patilosi Ejipiti diema nni kuli, den guani ki yedi Jeremi:

¹⁶ «Ba a yaa maadi ti Diedo yeli nni, ti kan cengi a.

¹⁷ Ti bua ki ŋoadi ti pali nni jaga, ki juu tanpoli badipua po a dugibila, ki cabi o po nani ti baanba, ti badiba leni ti koanbala n den tiendi maama Juda dogi nni leni Jerusalemi sani nni. Li yogunu ti den pia mi jiema ke li dagidi, ti yema den mani ke falaba ki ye.

¹⁸ Ama hali tin cedi ki naa go juugi, ki naa go cabini tanpoli badipua po, ti luo likuli, bu toabu leni mi koma bolini ti.»

¹⁹ Bi puoba den pugini ki yedi: «Ti yaa padi tanpoli badipua po a pada daa, naani tinba leni ti ciaba ka yen taani ki juogi? Bi bani ke ti pua o po yaa maada n naani leni o, ki go cabini o po duven daama.»

²⁰ Jeremi den yedi li nitaanli, li jaba, li puoba leni yaa niba n den maadi ki guani o yeni kuli:

²¹ «Yin juu yaa dugibila Juda dogi nni leni Jerusalemi sani nni, yinba, yi baanba, yi badiba, yi koanbala leni mi diema nni niba yeni daa, naani o Diedo ki tiani lipo ki kubi la o pali nni?

²² Yi tuongunda leni yi tuonyuogidi teni, ke o Diedo kan go bi fidi ki juuni leni yi. Li teni ke yi diema kpandi diegbendi, paboanli leni falima bonla, nilo n ki ye naani, nani yin nua maama dinla.

²³ O naa fala ŋmaa yi dinla, kelima yi juu a dugibila, ki tieni ti tuonbiadi, kaa cengi o Diedo maama, kaa cuoni nani li bali maama n bili maama.»

²⁴ Jeremi go den maadi leni laa niba kuli, bi jaba leni bi puoba ki yedi: «Yikuli n cengi o Diedo maama, yinba Juda yaaba, yaaba n ye Ejipiti diema nni.

²⁵ Li Miali Diedo U Paaciamu Kuli Daano, Isidayeli Tienu yedi: ‹Yinba leni yi puoba maadi leni yi ñoana ki tieni leni yi nii yin yedi yaala, ke yi bua ki kuani yin bili yaa ñoanianu, ki juu a dugibila tanpoli badipua po, ki go cabi o po. Lanwani, yi baa kubi ki go tieni yin niani o yaala.›

²⁶ Lani yaa po, yinba Juda yaaba, yaaba n kaa Ejipiti diema nni, cengi mani mini Li Miali Diedo maama! N poli n yeli yaali n yabi po, ki bili ke Juda yaaba siiga oba kuli kan go poli Ejipiti diema nni, ki yedi: ‹Li Miali Diedo U Tienu fo!›

²⁷ N baa faami bi po, ki tieni ba yaala n bia. N kan pa ba yemanma. Juda yaaba, yaaba n kaa Ejipiti diema nni kuli, bu toabu leni mi koma n baa je bikuli cain.

²⁸ Bi niba waamu, bu toabu n ki nandi yaaba, baa ña Ejipiti diema nni, ki guani Juda diema nni. Ama Juda niba yaaba n sieni ki den cua ki wuoni Ejipiti nni yeni kuli, baa bandi mini leni bani siiga, yua n pia moamoani.

²⁹ Mini o Diedo, n baa fii ki sedi yi po u naa kaanu. N baa tieni yi po sinankeene. Lani n tie yin bandi ke min yedi ke yaa yebiadima n baa ŋmaa yi yeni, baa cua. Laa sinankeene n tie one:

³⁰ N baa lu Ejipiti bado Faraon Hofida, yaaba n bua ki ñani o miali nuu nni, nani min den luni Juda bado Sedesiasi, Nebukanesa Babilonni bado yua n den bua ki kpa o nuu nni maama yeni. Mini o Diedo n yedi yeni.»