Jeremi 43 - U TIENU MAAMA TILI 2013

Bi gedini Jeremi Ejipiti leni u paalu

¹ Jeremi n den maadi bi niba kuli o Diedo bi Tienu n den puogi o, wan waani ba yaa maama kuli,

² Hosaya bijua Asariya, Kalea bijua Yohanani leni bi japaadanba yeni kuli, den yedi Jeremi: «Ŋan yedi yaala yeni kuli tie faama. O Diedo ti Tienu ki soani a ŋan yedi: ‹Da gedi mani ki ban wuoni Ejipiti diema nni.›

³ Ama li tie Neriya bijua Baruki n sedi ti po, ki tudi a ki bua ki teni tin kali Babilonni yaaba siiga ban kpa ti, bi ban gedini ti ti yonbidi Babilonni diema nni.»

⁴ Kalea bijua Yohanani, bi toatieba yudanba leni bi niba kuli, naa den cengi o Diedo, wani yua n den yedi ke ban cedi ki yaa ye Juda diema nni maama.

⁵ Lani, Kalea bijua Yohanani leni bi toatieba yudanba, den taa yaa niba n sieni Juda diema nni leni yaaba n den sani ki kua buotoe nni, ki go den guani ki baa kali Juda diema nni kuli.

⁶ Lani, tie: li jaba, li puoba, li bila, o bado bisiaba leni Nebusaradani, badidiegu guudo n den ŋaa yaa niba kuli leni Ahikami bijua Gedalia, Safani yaabili. Bi den taa o saawalipualo Jeremi leni Neriya bijua Baruki moko.

⁷ Bi den gedi Ejipiti diema nni kelima baa den cengi o Diedo maama. Bi den cuoni ki pundi Tapanesi dogu nni.

Jeremi waani ke bi baa cua ki baa Ejipiti diema

⁸ O Diedo den maadi leni Jeremi Tapanesi dogu nni ki yedi:

⁹ «Taa a tankudigbenga ki bugini a o bado Faraon diegu yaagu n ye Tapanesi dogu nni, buliñoakoali binbinli nni, Juda yaaba tianba nintuali.»

¹⁰ Ŋan yedi ba: «Li Miali Diedo U Paaciamu Kuli Daano, Isidayeli Tienu yedi: ‹N soani ban yini Babilonni bado Nebukanesa n naacemo. N baa bili o bali kalikaanu, min teni ke a bugini yaa tana yeni po, ki ladi bu kpalibu.

¹¹ O baa cua ki pua Ejipiti diema. Mi kuuma baa taa bine, bine n gedi ti yonbidi, ki jugisiega mo n je yaaba n sieni.

¹² N baa juu Ejipiti buli diedi. Nebukanesa baa juu ti diedi yeni, ki taa bi buli ki gedini ti yonbidi. O baa yiedi Ejipiti diema, nani o yankpaalo n yen yiedi o tiadi ki ñani o gani maama yeni. O baa ña likani leni mi yanduanma.

¹³ O baa pua ki mudi yaa butana n ye Eliopolisi dogu nni Ejipiti diema nni, ki juu Ejipiti budiedi kuli u mu.› »