Jeremi 42 - U TIENU MAAMA TILI 2013

Yaaba n sani ki cia cua ki buni Jeremi

¹ Bi toatieba yudanba, Kalea bijua Yohanani, Hosaya bijua Yesania leni bi niba, taliginba leni bi paatieba kuli den cua

² o saawalipualo Jeremi kani ki yedi o: «Cengi ti po ti miabu: mia o Diedo a Tienu tinba yaaba n sieni nne kuli po! Ti den yabi boncianla, ama moala nani ŋan nua maama, tii go fuu.

³ O Diedo a Tienu n waani ti, tin baa tagini yaa sanu leni tin baa tieni maama.»

⁴ O saawalipualo Jeremi den yedi ba: «N gbadi. N baa jaandi ki mia o Diedo yi Tienu, nani yin yedi maama, n baa wani yi, o Diedo n baa yaa pia yi po yaa maama. N kan wuoni yi liba kuli.»

⁵ Bi den yedi Jeremi: «O Diedo yua n tie o moamoandaano n tua ti po siedi. O ñoabu n cuo ti, ti yàá tieni wan baa puogi a ŋan yedi ti yaala.

⁶ Lan ŋani bi lan bia, ti baa tuo ki ŋoadi o Diedo ti Tienu, tinba ti ba n soani a yua yaa kani. Yeni ti pala baa yaa mani, kelima ti tuo o Diedo ti Tienu mayedikaama.»

⁷ Dana piiga n den pendi, o Diedo den maadi leni Jeremi.

⁸ Lani, Jeremi den yini Kalea bijua Yohanani, yaa toatieyudanba n den ye leni o leni bi niba kuli, li bila leni li nikpela kuli.

⁹ O den yedi ba: «O Diedo Isidayeli Tienu yin soani nni, min mia yua bu miabu yeni maadi nanda:

¹⁰ ‹Yi yaa tuo ki ye mi naa diema nni, N baa pugini yi paalu, N kan bolini yi. N baa ŋuu yi, n kan ŋabi yi, Kelima n pali ki go mangi Min tieni yi yaa biadima po.

¹¹ Da go jie mani Babilonni bado, Yin se yua yaa nintuali leni ti jawaandi. Da go jie o mani. O Diedo n yedi yeni. N ye leni yi, ki baa faabi yi o nuu nni.

¹² N baa teni yi ninñima n cuo o, Yeni o baa gbadi yi po mi ninñima, Ki teni yin guani yi tinga nni.›

¹³ Ama yi yaa yedi: ‹Ti kan yaa ye mi naa diema nni!› Ki yie yeni o Diedo yi Tienu nialu,

¹⁴ ki yedi: ‹Ti baa gedi Ejipiti diema nni. Lanpo ti kan baa toabu, ti kan gbadi naatuntunli piebima, ti kan luo jiema mo. Ti baa n yaa ye lanpo yo.›

¹⁵ Juda yaaba, yaaba n sieni, cengi mani o Diedo maama. Li Miali Diedo U Paaciamu Kuli Daano, Isidayeli Tienu yedi: ‹Yi yaa yedi ke yi baa gedi Ejipiti diema nni Ki ban kali lipo,

¹⁶ Yin jie yaa toabu yeni, Baa nandi yi Ejipiti diema nni. Yin jie yaa koma yeni, Baa ŋoadi ki baa yi lipo. Lanpo yo, ke yi baa kpe.

¹⁷ Yaaba n bili ke bi baa gedi Ejipiti Ki ban yaa ye kuli, Bu toabu, mi koma leni u yianbiadipuodiko N baa kpa ba. Bi kan baa yua n baa cia. Min baa teni fala n cua bi po yaa yogunu, Oba kuli kan ŋmadi.›

¹⁸ Li Miali Diedo U Paaciamu Kuli Daano, Isidayeli Tienu yedi: ‹Nani n pali n beni Jerusalemi yaaba po maama yeni, n pali baa be yi moko yaa po yene, yi yaa gedi Ejipiti diema nni. Yi baa tua ti solindi leni li pabiidili bonla, mi falima leni u yualu bonla. Yi kan go le u naa kaanu mo abada.› »

¹⁹ Jeremi den yedi: «O Diedo yedi yinba Juda yaaba, yaaba n sieni, da gedi mani Ejipiti. Bandi mani ke n kadi ki waani yi i moamoani cain dinla.

²⁰ Yi boandi yi yula, kelima yi soani nni o Diedo yi Tienu kani, ki yedi: ‹Jaandi ki mia ti po o Diedo ti Tienu, o Diedo ti Tienu yaa yedi yaala kuli, ti baa tieni la.›

²¹ N doagidi yi po laa bonla, ama yi naa cengi o Diedo yi Tienu maama, ki buali wan puogi nni min yedi yi yaala kuli.

²² Bandi mani line bonŋanla: bu toabu, mi koma leni u yianbiadipuodiko n baa kpa yi yin bua ki gedi ki ban wuoni yaa diema nni.»