Jeremi 41 - U TIENU MAAMA TILI 2013

¹ O cileleelo nni, Netania bijua Isimayeli, Elisama yaabili yua n den tie badibiga, ki tie badidiegu nni nikpiaga siiga yendo, den yegi leni o bado nikpiaga niba piiga, ki gedi Ahikami bijua Gedalia kani Misipa dogu nni. Lankani bikuli den taani ki kali ki dini Misipa dogu nni.

² Ban kaa ki di, Netania bijua Isimayeli den fii leni wan den yegi leni yaa nipiiga yeni, ki kpa Ahikami bijua Gedalia, Safani yaabili leni ki jugisiega. Bi den tieni yene, ki kpa Babilonni bado n den dini yua li bali, mi diema nni.

³ Isimayeli go den kpa Juda yaaba, yaaba n den ye Gedalia kani kuli Misipa dogu nni leni Babilonni jakoanda yaaba n den ye likani kuli.

Isimayeli kpa sancenba piinii

⁴ Gedalia n den kpe, li den pundi danalie ke oba kuli ki pia laabaali.

⁵ Jaba piinii yaaba n den kuo bi langbiadi, ki yie yaa tiadi n padi, ke bi gbani mo den jia jia den pundi Sikemi, Silo leni Samari, ki kubi bu paabu pada leni a dugibila. Bi den cuani la o Diedo diegu nni.

⁶ Netania bijua Isimayeli den ñani Misipa ki tuogi ba. O den cuoni ki buudi ki togidi ba. Wan den pundi bi kani, o den yedi ba: «Cua mani ki le Ahikami bijua Gedalia.»

⁷ Ama ban den pundi u dogu siiga nni yaa yogunu, Netania bijua Isimayeli leni yaa jaba n den pugidi o po, den kpa ba ki luni ba li caakuonli nni.

⁸ Ama bi siiga den pia niba piiga, yaaba n den yedi Isimayeli: Ŋan da kpa ti, kelima ti pia ŋalimani ke li wuo ku muagu nni: ŋalikama, orje, mi kpama leni ti siadi. Lanwani, o den bili ke o kan kpa ba nani bi lieba yeni.

⁹ Isimayeli n den kpa yaa niba kuli, o den luni ba li caakuonli nni. Juda bado Asa n den gbini laa caakuoncianli Isidayeli bado Bayesa n den baa o bu toabu yaa yogunu. Netania bijua Isimayeli den gbieni li leni bi tinkpiba.

¹⁰ Isimayeli den taa yaa niba n sieni Misipa dogu nni, ki gedini ba ti yonbidi. Lani n tie: o bado bisiaba leni yaaba n bi sieni Misipa Nebusaradani badidiegu guudikaaba yudaano n den piani Ahikami bijua Gedalia yaaba. Netania bijua Isimayeli den cuo ba ti yonbidi ki gedini ba. O den fii ki gedi Anmoni yaaba diema nni.

Isimayeli kpaada baa mi faabima

¹¹ Kalea bijua Yohanani leni bi toatieba yudanba yaaba n den ye leni o, den gbadi Netania bijua Isimayeli n soani yaa tuongunda kuli.

¹² Bi den taa bi jaba kuli, ki gedi ki ban baa Netania bijua Isimayeli bu toabu. Bi den ŋoadi ki nandi o, yaa ñincianma n ye Gabaon kani.

¹³ Isimayeli n den cuo yaa niba ti yonbidi, n den laa Kalea bijua Yohanani leni bi toatieba yudanba, bi pala den mangi.

¹⁴ Isimayeli n den caani yaa niba ti yonbidi kuli, den lebidi ki taani Kalea bijua Yohanani po.

¹⁵ Ama Kalea n den nagidi, Netania bijua Isimayeli den sani ki cia wani leni nibinii, ki gedi Anmoni yaaba diema nni.

¹⁶ Kalea bijua Yohanani leni bi toatieba yudanba yaaba n ye leni o, den taa yaa niba n sieni, yaaba n baa ki pia li miali ki tie Netania bijua Isimayeli n den ñani yaaba Misipa, wan den kpa Ahikami bijua Gedalia yaa yogunu. O den ñani Gabaon a jakoanda, bi puoba, a bila, mu moagilimu kuli ki kpenni ba.

¹⁷ Bi den fii bi cenli, ki ban pundi yaa candiegu n kuu leni Betelemi dogu, ki yi Kimihami. Bi ji den se ki bua ki suagi Ejipiti yo.

¹⁸ Bi den tiini Babilonni yaaba, ban jie yaaba, kelima Netania bijua Isimayeli den kpa Ahikami bijua Gedalia, Babilonni bado n den dini yua mi diema bali.