Jeremi 40 - U TIENU MAAMA TILI 2013

Jeremi gedi ki kali Misipa dogu nni

¹ O Diedo den maadi leni Jeremi yaa yogunu, ke badidiegu guudikaaba yudaano Nebusaradani den ñani o Rama dogu nni. O den teni ke bi gedi ki ban taa o, yaa yonbi n sieni kuli siiga. Jeremi den luo leni i kugaali Jerusalemi yonbi leni Juda yonbi kuli siiga, ke bi caani ba ti yonbidi Babilonni diema nni.

² Badidiegu guudikaaba yudaano den yini Jeremi, ki yedi o: «O Diedo a Tienu den tuodi ki waani a, yaa fala n baa nandi u naa kaanu.

³ O Diedo teni ke wan den maadi yaala yaa maama cua. O tieni wan den yedi yaala, kelima yi tieni ti tuonbiadi o Diedo po, ki naa cengi o maama. Lani n teni ke wan den yedi yaala kuli nandi yi.

⁴ Moala n faabi a leni yaa kugaali n luo ŋa. A yaa sua ke li dagidi a po, ŋan cua Babilonni po leni nni, ŋan cua, n baa yaa faami a po bonŋanla. A yaa sua ke laa dagidi ŋan cua leni nni Babilonni po mo, ŋan da cua. Diidi mi diema kuli bili a nintuali, gedi ŋan sua ke naani n mani ki go dagidi a po.»

⁵ Nani Jeremi n ki den tua liba yeni, Nebusaradani den guani ki yedi o: «A fidi ki guani Safani yaabili Ahikami bijua Gedalia po, Babilonni bado n dini yua Juda diema dogi bali yeni. Ŋan kali a niba siiga bi ŋan gedi ŋan sua ke naani n dagidi a po kuli.» Badidiegu guudikaaba yudaano den puni o li bonjekaala leni bu paabu ki cabi o.

⁶ Jeremi den gedi Ahikami bijua Gedalia po Misipa dogu nni, ki ban ye leni o, yaa niba n den ye mi diema nni siiga.

Juda yaaba taani ki tuu ñoabu leni Gedalia

⁷ Bi toatieba yudanba yaaba n den ye ku muagu nni den gbadi bani leni bi niba, ke Babilonni bado dini li bali Ahikami bijua Gedalia, ki puogi o, ke wan yaa die bi jaba, bi puoba, a bila leni yaaba n tie luodipenpiena, ban n kaa den gedini yaaba ti yonbidi Babilonni diema nni.

⁸ Labi toatieba yudanba leni bi niba den gedi ki ban laa Gedalia Misipa dogu nni. Bani n den tie bine: Netania bijua Isimayeli, Yohanani leni Jonatan, bani bonbilie kuli tie Kalea bijaba, Tanehumeti bijua Seraya, Efayi bijaba Netofa yaaba leni Yaasania Maaka yua.

⁹ Ahikami bijua Gedalia, Safani yaabili den poli ki niani ba u ñoanianu ki yedi: «Da jie mani Kalide diema yaaba, tuo mani ban yaa die yi, yaa ye mani mi diema nni, yaa tuuni mani Babilonni bado po, yi baa sua ke yi yema mani yi po.

¹⁰ N baa yaa ye Misipa ki guu Babilonni yaaba, yaaba n baa cua ti kani. Yinba wani, yin ban ñani duven tiidi bonluonkaala leni yaa bonluonkaala n pugidi leni mi kpama ki tieni likuli yi tiadi nni. Yaa ye mani yin baa guani ki kali yaa dogi nni.»

¹¹ Juda yaaba, yaaba n den ye Moabi diema nni, Anmoni yaaba diema nni, Edomi diema nni leni dietoama nni kuli moko den gbadi ke Babilonni bado ŋaa Juda niba yaaba n sieni po u kaanu, ki den dini Ahikami bijua Gedalia, Safani yaabili li bali.

¹² Juda yaaba leni yaaba den yadi yadi ki ye poto kuli, den guani ki cua Misipa dogu nni, Juda diema nni, Gedalia kani. Bi den sobidi duven tiidi leni yaa tiidi n pugidi yaa bonluonkaala, kelima laa binli i tiidi kuli den loni hali ke li kandi.

Bi kpa Gedalia

¹³ Kalea bijua Yohanani leni bi toatieba yudanba kuli yaaba n den ye ku muagu nni, den cua Gedalia kani Misipa dogu nni.

¹⁴ Bi den yedi o: «Naani a bani ke Anmoni bado Baalisa soani Netania bijua Isimayeli, ke wan cua ki kpa ŋa?» Ama Ahikami bijua Gedalia naa den daani ke bi maama tie moamoani.

¹⁵ Kalea bijua Yohanani den yedi Gedalia ŋasiili nni Misipa dogu nni: «Pa nni u sanu, min gedi ki ban kpa Netania bijua Isimayeli. Oba kuli kan bandi moko. Be yaa po yo ke a baa ŋaa wan kpa ŋa? Be yaa po yo ke a baa teni Juda yaaba, yaaba n taani ki gaani ki lindi a kuli n yadi, yaaba n sieni Juda diema nni mo n bodi?»

¹⁶ Ahikami bijua Gedalia den guani ki yedi Kalea bijua Yohanani: «Da tieni yeni kelima ŋan maadi yaala Isimayeli po yeni naa tie moamoani.»