Jeremi 4 - U TIENU MAAMA TILI 2013

¹ Isidayeli, mini o Diedo n yedi a: «A yaa lebidi ki guani n kani, Ki ñani a cagindi kuli n nintuali, Yeni, a kaa go puagi.

² A yaa poli hali Li Miali Diedo yua n fo po, Ke li tie moamoani, papienli leni teginma nni, Lanwani, i nilanbuoli baa yaa gaaliti biyaba o yaa yeli nni, Ki go diidi wane ki jigini bi yula.»

³ O Diedo yedi yinba Juda leni Jerusalemi yaaba po, Yaa maama n tie ne: «Kaagi mani u koapaanu yi yula po, Ki da buli ti konkondi nni.

⁴ Kua mani ku koanciagu o Diedo po. Yinba Juda leni Jerusalemi yaaba, Lebidi mani yi pala. Lani n tie n pali n da be, Ki cuo nani u mu yeni, Ki cuo yaa cuoma ke bi kan fidi ki gbindi u, Kelima yi tuadibiada n gundi maama po.

⁵ Pa mani o naa laabaalo Juda diema nni, Ki waani Jerusalemi mo ki yedi: ‹Piebi mani li naatuntunli mi diema nni.› Kpaani mani boncianla ki yedi: ‹Taani mani tin gedi ti dopaali po!›

⁶ Sieni mani li jakoandicabili Siyon po. Sani mani ki ban wuoni, Kelima n teni ke mi yebiadima ñani nujienu po, Ki kpendi leni li yuboancianli!

⁷ O yangbanlo sani ki ñani o wuonkaanu, Yua bolindi i nibuoli fii ki cili li cenli. O ñani o deni, Ki baa kuani mi diema nni li paboanli. A dogi baa bodi u mu nni, Nilo kan sieni i niinni.

⁸ Lani yaa po, yie mani li paboanli tiadi. Buudi mani ki yaa kaliti, Kelima o Diedo pabiencianli kan cedi yi.»

⁹ Laa daale ke mini o Diedo yedi: «O bado leni o koanbala jigi baa cie, Bi kopadicianba pala baa biidi, Li baa lidini bi saawalipuaba.»

¹⁰ N den yedi: «Ŋain n Diedo U Tienu! A taani ki boandi Jerusalemi dogu Leni bi naa niba kuli, ki yedi ba: ‹Yi baa baa mi yanduanma! Ke bu toabu mo nan cua ki baa ñani ti miana.› »

Yibalinba ñani i kaani kuli

¹¹ Lanyogunu bi baa yedi Laa niba leni Jerusalemi dogu: «Mi fawaatonma ñani hali mi fanpienma po, Ki piebi Jerusalemi dogu niba po. Maa piebi ki baa lendi mi bima ka.

¹² Laa faagu pia mi jama. Mini n yedi ke kun ña lipo ki cua. Moala n baa jia bi buudi.»

¹³ Diidi, wani n do tanpoli nani ti tawadi yeni. O toateliti tie nani o pinpinjoa yeni, O taami jaligi ki cie jiebaninba. Ti bia n yeni! Bi soani ti tuonli!

¹⁴ Jerusalemi, ñani a pali nni mi biadima, Lani n tie ŋan baa mi faabima. Hali u laa yogunu yo, ke a baa waagi Ki kubi a pali nni ti yantiabiadi?

¹⁵ O laabaalibiado ñani hali Dan diema. Hali Efrayimi juana po yo, Ke bi puuni laa laabaalo.

¹⁶ Tiadi mani i nibuoli line, Teni mani Jerusalemi dogu n bandi Ke bi niba ñani li banfoagili, ki cua ki baa baa yi. Bi cili Juda diema dogi po yo, ki kuudi bu toabu kuudi.

¹⁷ Bi gaani ki lindi Jerusalemi dogu, Nani yaaba n guu u kuanu yeni, Kelima laa dogu fiini n po mi yiema. Mini o Diedo n yedi yeni.

¹⁸ A tagu leni a bontienkaala N cuani a po yaali n yeni. Diidi, a biadima li to yo bagibagi. Laa bonla baa nandi hali a pali.

Jeremi jigi cie leni wan nua ke fala kpendi

¹⁹ Ŋain n tugu, n tugu! Ŋain, n tugu koani! Ŋain, n pali koani! N tugusoama sani, N kan fidi ki yaa ŋmini, N gba li naatuntunli piebima Leni bu toabu kuudi.

²⁰ Bi puuni laabaalibiado, N tuu laabaalibiado, Mi diema mo kuli jugi cain. Bi li cua ki ludi ti yenme, Ki jugi ti gbandiena. Bi li cua yenme ki bolini ti diena.

²¹ Hali u laa yogunu yo, Ke n baa yaa baa ki nua li jakoandicabili, Ki go gbadi li naatuntunli piebima?

²² N niba ye leni mi yanpiima, Baa bani nni. Bi tie yanluodanbe, Baa pia yama. Ban li bani ki tieni yaala bebe n tie mi biadima. Ama baa bani ki tieni yaala n ŋani.

²³ N diidi ki tinga ki sua kaa pia nunga, Puu ki ye ki niinni mo. N diidi tanpoli mo ki sua yenma ki go ye.

²⁴ N diidi a juana, ŋani mo bendi ki baali, A joabila kuli begibi.

²⁵ N diidi ki sua niba ki go ye, Tanpoli nuani mo kuli sani.

²⁶ N diidi ki sua ke Karimeli Kpandi ki tua fanpienma. O dogi mo taani ki tie yoala o Diedo nintuali, Kelima o pabienkandikaali po.

²⁷ O Diedo yedi mi naa maama: «Mi diema kuli baa jugi, Ama n kan bolini mikuli.

²⁸ Lani n teni ke mi diema ye leni li paboanli, Ke tanpoli mo biigi, Kelima lani n tie min jagi yaala. N kan lebidi puu, N kan guani puoli mo.»

Bi nikpaba kua Siyon dogu nni

²⁹ Bi tanjagiba leni a dabantuada lanbu teni Ke u dogu nni yaaba kuli sani. Bi tiini ki koa ti tudi nni, Ki tiini ki do ti tanciandi po. U dogu kpandi dokuomu, Nilo kuli ki go ye u niinni.

³⁰ Fini Jerusalemi ban jugi yua, A go baa tieni be? Naani a go baa la yaa tiadi n moani colicoli? Naani a go bogidi a baa leni wula tiadi? Naani a go baa diani a nuni cilo? A bobi ki ŋanbidi a yuli fanme, A jaconcona fali a, Bi ji lingi a kuume.

³¹ N gba li dunli nani yaa pua n bua ki maa yaa dunli yeni. N gba i yanbani ñiidi, Nani yaa puosiaga n baa maa yeni. Li tie Siyon badisalo yaa nialu yo. O fuo ki dogi, O tandi o nii ki yedi: «N bonla pia mi ninñima, Bi nikpaba baa pua ki kpa nni.»